ຄະນະລັດຖະມົນຕີການເງິນຂອງກຸ່ມປະເທດທີ່ໃຊ້ເງິນຢູໂຣ ໄດ້ແຜ້ວທາງໃຫ້ປະເທດກຣີສ ໄດ້ຮັບເງິນງວດນຶ່ງ ຈໍານວນ 17 ພັນລ້ານໂດລາ ພາຍ ໃນວັນທີ່ 15 ເດືອນກໍລະກົດນີ້ ອັນເປັນພາກສ່ວນນຶ່ງຂອງເງິນຊ່ວຍເຫລືອ ຈໍານວນ 156 ພັນລ້ານດອລລາໃຫ້ແກ່ປະເທດກຣີສ ທີ່ເປັນໜີ້ຖ້ວມໂຕນັ້ນ ຊຶ່ງສະຫະພາບຢຸໂຣບ ແລະກອງທຶນສາກົນ ຫລື IMF ໄດ້ຮັບປາກໄວ້ເມື່ອປີຜ່ານມານັ້ນ.
ລຸນຫລັງການປະຊຸມທາງໂທລະສັບກັນເມື່ອຕອນບ່າຍວັນເສົາວານນີ້ ຄະນະລັດຖະມົນຕີ ການເງິນເວົ້າວ່າ ພວກເຂົາເຈົ້າຍັງຈະສຶກສາເບິ່ງລາຍ ລະອຽດຕ່າງໆຂອງຄໍາຮ້ອງຂອງກຣີສ ເພື່ອການຄໍ້າປະກັນເທື່ອທີ່ສອງໃນ ຈໍານວນເງິນປະມານເທົ່າໆກັນກັບຂອງປີຜ່ານມາ ໂຮມ ທັງການປະກອບຂອງພາກສ່ວນເອກະຊົນ. ແຕ່ແນວໃດກໍດີ ຄາດວ່າພວກເຂົາເຈົ້າຈະບໍ່ລົງມື ປະຕິບັດການໃດໆໃນເວລານີ້ ກ່ຽວກັບການປະກັນຄັ້ງໃໝ່ ຈົນກວ່າທ້າຍ ປີນີ້.
ພວກເຈົ້າໜ້າທີ່ກ່າວວ່າ ເງິນຊ່ວຍເຫລືອງວດທໍາອິດຈໍານວນ 17 ພັນລ້ານ ດອລລານັ້ນ ແມ່ນຈະພຽງພໍສໍາລັບໃຫ້ກຣີສຊໍາລະໜີ້ສິນຕ່າງໆຂອງຕົນ ກຸ້ມເຖິງສາມສີ່ເດືອນຕໍ່ໜ້າ.
ຄະນະລັດຖະມົນຕີເຂດ eurozone ໄດ້ອະນຸມັດເງິນ ຈໍານວນ 17 ພັນ ລ້ານດອລລານີ້ ຫລັງຈາກສະພາແຫ່ງຊາດກຣີສໄດ້ຮັບຜ່ານແຜນການ ປະຢັດມັດທະຍັດໃນຕົ້ນອາທິດນີ້ ເພື່ອເພີ່ມອັດຕາພາສີ ຕັດຄ່າໃຊ້ຈ່າຍ ຂອງລັດ ແລະ ຂາຍທອດຊັບສິນຕ່າງໆຂອງລັດ.
