ພວກສະໜັບສະໜຸນພັກຄອມມີວນີສຈໍານວນຫລາຍພັນຄົນ ໄດ້ພາກັນເດີນຂະບວນໃນ ນະຄອນຫລວງ Athens ເພື່ອປະທ້ວງແຜນການປະຢັດມັດທະຍັດຂອງລັດຖະບານ ທີ່ແນ ໃສ່ເພື່ອປ້ອງກັນບໍ່ໃຫ້ປະເທດຜິດສັນຍາໃນການ ຊໍາລະໜີ້ສິນນັ້ນ.
ພວກປະທ້ວງປະມານ 5,000 ຄົນ ໄດ້ເດີນຂະບວນໄປຍັງສະພາແຫ່ງຊາດຂອງກຣີສ ໃນ ວັນເສົາວານນີ້ ນໍາໂດຍທ່ານ Alex Papariga ຜູ້ນໍາພັກຄອມມີວນີສ ທີ່ກ່າວຫາລັດຖະ ບານວ່າ ສົມຮູ້ຮ່ວມຄິດກັບພວກເຈົ້າໜີ້ ເພື່ອລອກໜັງປະຊາຊົນທັງເປັນ ກໍຄືຂູດຮີດປະຊາຊົນ. ການເດີນຂະບວນປະທ້ວງໄດ້ສິ້ນສຸດລົງ ໂດຍບໍ່ມີເຫດການຮ້າຍແຮງຫຍັງ ເກີດຂື້ນ.
ນັບເປັນເວລາຫລາຍອາທິດມາແລ້ວຢູ່ໃນປະເທດກຣີສ ທີ່ມີການປະທ້ວງ ເກືອບວ່າທຸກມື້ ຕໍ່ຕ້ານແຜນການຂອງທ່ານ George Panandreou ນາຍົກລັດຖະມົນຕີພັກສັງຄົມນິຍົມ ຂອງກຣີສ ທີ່ຈະຂື້ນພາສີ ຕັດການໃຊ້ຈ່າຍ ແລະຂາຍຊັບສິນຂອງລັດ ທີ່ພວກເຈົ້າໜີ້ຕ່າງ ປະເທດໄດ້ທວງໃຫ້ເຮັດເພື່ອແລກປ່ຽນກັບການກູ້ຢືມສຸກເສີນນັ້ນ.
ທ່ານ Papandreou ໄດ້ສັບຊ້ອນຄະນະລັດຖະບານຂອງທ່ານເມື່ອວັນສຸກ ຜ່ານມານີ້ ໂດຍໄດ້ແຕ່ງຕັ້ງຄູ່ແຂ່ງຄົນສໍາຄັນຂອງທ່ານຈາກພັກສັງຄົມນິຍົມ ໃຫ້ເປັນລັດຖະມົນຕີ ກະຊວງການເງິນ ເພື່ອລົດຜ່ອນການຕໍາໜິຕິຕຽນຂອງພັກ ກ່ຽວກັບວິທີການແກ້ໄຂວິກິດ ການຂອງທ່ານ. ລັດຖະບານຊຸດໃໝ່ຂອງ ທ່ານປະເຊີນກັບການລົງຄະແນນສຽງໄວ້ວາງໃຈ ໃນວັນອັງຄານໜ້ານີ້ ໃນສະພາ ຊຶ່ງພັກຂອງລັດຖະບານຂອງທ່ານ ເປັນຜູ້ກໍາສຽງສ່ວນ ຫລາຍພຽງໜ້ອຍດຽວ ຄື 155 ບ່ອນນັ່ງ ໃນຈໍານວນທັງໝົດ 300 ບ່ອນນັ່ງ ໃນສະພາ ແຫ່ງຊາດ.
ຖ້າຫາກວ່າລັດຖະບານຊະນະການລົງຄະແນນສຽງໄວ້ວາງໃຈດັ່ງກ່າວ ກໍຄາດວ່າ ທ່ານ Papandreou ຈະຂໍໃຫ້ສະພາອະນຸມັດແຜນການປະຢັດ ຂອງທ່ານໃນທ້າຍເດືອນນີ້ ບັນດາສະຫະພັນກໍາມະບານກຣີກ ໄດ້ຂູ່ທີ່ຈະ ນັດຢຸດງານປະທ້ວງເປັນເວລາ 48 ຊົ່ວໂມງ ຖ້າແຜນການດັ່ງກ່າວຜ່ານ.
