ທ່ານ Eric Schmidt ປະທານບໍລິຫານບໍລິສັດ Google ທີ່ສິ້ນສຸດການຢ້ຽມຢາມເກົາຫຼີເໜືອຢ່າງເປັນການສ່ວນຕົວເມື່ອວັນພະຫັດມື້ນີ້ ຮຽກຮ້ອງໃຫ້ປະເທດຄອມມີວນີສ ທີ່ຢູ່ໂດດດ່ຽວດັ່ງກ່າວ ເປີດໂອກາດໃຫ້ປະຊາຊົນຂອງຕົນໄດ້ຊົມໃຊ້ອິນເທີແນັດຫຼາຍຂຶ້ນ.
ໃນການຖະແຫຼງຕໍ່ພວກນັກຂ່າວ ທີ່ສະໜາມບິນປັກກິ່ງ ທ່ານ Schmidt ເວົ້າວ່າ ທ່ານໃຊ້ການຢ້ຽມຢາມຂອງທ່ານຄັ້ງນີ້ເພື່ອຕັກເຕືອນເກົາຫຼີເໜືອ ວ່າ ເກົາຫຼີເໜືອສ່ຽງຕໍ່ການມີເສດຖະກິດທີ່ລ້າຫຼັງໝູ່ລົງໄປເລື້ອຍໆ ຖ້າປະ ເທດດັ່ງກ່າວຫາກຍັງສືບຕໍ່ບັງຄັບຕົນໃຫ້ຢູ່ໂດດດ່ຽວຕໍ່ໄປນັ້ນ.
“ສຽງ”
ທ່ານ Schmidt ເວົ້າວ່າ: “ລັດຖະບານເກົາຫຼີເໜືອຈະຕ້ອງກະທໍາຢ່າງໃດ ຢ່າງນຶ່ງ ຄືຕ້ອງເຮັດໃຫ້ເປັນໄປໄດ້ເພື່ອໃຫ້ປະຊາຊົນ ສາມາດໃຊ້ອິນເທີແນັດໄດ້ ທີ່ລັດຖະບານເກົາຫຼີເໜືອຍັງບໍ່ໄດ້ປະຕິບັດ ບັດນີ້ມັນເປັນທາງເລືອກຂອງເກົາຫຼີເໜືອແລ້ວ ແລະໃນທັດສະນະຂອງຂ້າພະເຈົ້າ ມັນເປັນເວລາທີ່ພວກເຂົາເຈົ້າ ຈະເລີ່ມຕົ້ນໄດ້ແລ້ວ ຖ້າບໍ່ດັ່ງນັ້ນເກົາຫຼີເໜືອ ຍັງຈະລ້າຫຼັງຢູ່ຕໍ່ໄປ.”
ທ່ານ Schmidt ໄດ້ໄປຢ້ຽມຢາມເກົາຫຼີເໜືອ ຮ່ວມກັບອະດີດເອກອັກຄະລັດຖະທູດສະຫະລັດປະຈໍາສະຫະປະຊາຊາດ ທ່ານ Bill Richardson ຜູ້ທີ່ເວົ້າວ່າ ທ່ານໄດ້ຮຽກຮ້ອງ ໃຫ້ເຈົ້າໜ້າທີ່ເກົາຫຼີເໜືອ ຈົ່ງດຳເນີນການຢຸດເຊົາເປັນການຊົ່ວຄາວໃນການທົດລອງລູກສອນໄຟຂີປະນາວຸດ ແລະ ອາວຸດນີວເຄຼຍທີ່ອາດເປັນໄປໄດ້ນັ້ນ.
ທ່ານ Richardson ເວົ້າວ່າ ຄະນະຜູ້ແທນຂອງທ່ານ ບໍ່ສາມາດເຂົ້າພົບກັບຊາວອະເມຣິ ກັນເຊື້ອສາຍເກົາຫຼີ ທີ່ຖືກກັກຂັງຢູ່ນັ້ນທ້າວ Kenneth Bae ຜູ້ທີ່ເກົາຫຼີເໜືອຂູ່ວ່າຈະດໍາເນີນຄະດີໃນຂໍ້ຫາກໍ່ອາດຊະຍາກໍາທີ່ບໍ່ເຈາະຈົງຕໍ່ຕ້ານເກົາຫຼີເໜືອນັ້ນ.
ກະຊວງຕ່າງປະເທດສະຫະລັດ ໄດ້ກ່າວໂຈມຕີໄລຍະເວລາໃນການຢ້ຽມ ຢາມຄັ້ງນີ້ ຊຶ່ງມີຂຶ້ນໃນເວລາທີ່ວໍຊິງຕັນ ແລະພັນທະມິດຂອງຕົນຜັກດັນໃຫ້ລົງໂທດພຽງຢາງຕື່ມອີກ ຫຼັງ ຈາກການທົດລອງຍິງຈະຫຼວດເມື່ອເດືອນທັນວາ ຜ່ານມາ.
