ເບິ່ງວິດີໂອກ່ຽວກັບໄພແຫ້ງແລ້ງຢູໃນພື້ນທີ່ສ່ວນໃຫຍ່ຂອງສະຫະລັດ
ນັກເຄື່ອນໄຫວທີ່ເປັນຜູ້ເລີ້ມຕົ້ນຜູ້ນຶ່ງ ແລະເປັນຜູ້ສະໜັບສະໜູນຄວາມຄິດທີ່ວ່າ ສະພາບ
ອາກາດອົບເອົ້າ ຫລື global warming ແມ່ນເກີດຂຶ້ນຍ້ອນການກະທໍາຂອງມະນຸດນັ້ນ
ເວົ້າວ່າ ຕົນໄດ້ຕີລາຄາຕໍ່າເກີນໄປ ໃນເລື້ອງທີ່ກ່ຽວກັບສະພາບຄວາມຮຸນແຮງຂອງອາກາດ
ຮ້ອນເອົ້າ ແລະໄພແຫ້ງແລ້ງທີ່ສ້າງຄວາມຫາຍຍະນະ ຕໍ່ພື້ນທີ່ສ່ວນໃຫຍ່ຂອງສະຫະລັດ ແລະພາກສ່ວນອື່ນໆຂອງໂລກ ໃນໄລຍະນຶ່ງທົດສະວັດ ທີ່ຜ່ານມານັ້ນ.
ທ່ານ James Hansen ຜູ້ອໍານວຍການສະຖາບັນສຶກສາອາວະກາດ Goddard ຂອງ
ອົງການ NASA ຂອງສະຫະລັດກ່າວວ່າ ທ່ານບໍ່ປະສົບຜົນສໍາເລັດໃນການຄົ້ນຄວ້າຂອງ
ທ່ານ ໃນຊຸມປີ 1980 ເພື່ອຊອກຮູ້ວ່າການເພີ້ມຂຶ້ນໂດຍສະເລ່ຍຂອງອຸນນະຫະພູມ ຈະ
ສາມາດ ຜັກດັນໃຫ້ອາກາດຖີບຕົວສູງຂຶ້ນເຖິງຂີດສູງສຸດ ໄດ້ໄວຫລາຍປານໃດນັ້ນ
ໃນບົດຂຽນທີ່ລົງພິມໃນໜັງສືພິມ Wahsington Post ນັ້ນ, ທ່ານ Hansen ເວົ້າວ່າ
ການທໍານາຍຂອງທ່ານ ທີ່ໄດ້ບັນລະຍາຍຢູ່ໃນບົດນໍາສະເໜີຄັ້ງປະຫວັດສາດຕໍ່ສະພາສູງ
ສະຫະລັດໃນປີ 1988 ນັ້ນ ແມ່ນອ່ອນເກີນໄປ.
ບົດຂຽນນັ້ນ ໄດ້ຖືກພິມເຜີຍແຜ່ໃນຂະນະທີ່ທ່ານ Hansen ແລະພວກນັກຄົ້ນຄວ້າຄົນ
ອື່ນໆ ຈະພິມເຜີຍແຜ່ການວິເຄາະອຸນນະຫະພູມຂອງໂລກຢູ່ໃນ 6 ທົດສະວັດ ຊຶ່ງໄດ້
ສະແດງໃຫ້ເຫັນໃນອັນທ່ານເວົ້າວ່າ “ການເພີ້ມຂຶ້ນທີ່ໜ້າອັດສະຈັນໃນຄວາມຖີ່ຂອງລະດູ
ຮ້ອນທີ່ຮ້ອນສຸດຂີດ” ນັ້ນ. ການສຶກສາຄົ້ນຄວ້ານີ້ ຈະລົງພິມຢູ່ໃນເອກະສານສະສົມ ການສຶກສາດ້ານວິທະຍາສາດແຫ່ງຊາດ ຫລື the Proccedings of National
Academy of Science ໃນວັນຈັນມື້ອື່ນ.
ໃນນັ້ນທ່ານ Hansen ອ້າງເຖິງຄື້ນຟອງອາກາດຮ້ອນທີ່ກັນດານໃນຢູໂຣບ ເມື່ອປີ 2003,
ລະດູຮ້ອນທີ່ຮຸນແຮງເຜົາໃໝ້ໃນຣັດເຊຍ ເມື່ອປີ 2010 ແລະໄພແຫ້ງແລ້ງທີ່ສ້າງຄວາມຫາຍະ
ນະ ຢູ່ໃນສະຫະລັດ ໃນປີກາຍນີ້ ຊຶ່ງທ່ານບອກວ່າສາເຫດຕ່າງໆ ທີ່ພາໃຫ້ມີໄພພິບັດທັງ
ສາມຢ່າງນີ້ ແມ່ນມາຈາກການປ່ຽນແປງຂອງດິນຟ້າອາກາດ ຊຶ່ງສ່ວນໃຫຍ່ເປັນຜົນພອຍໄດ້ ມາຈາກມົນລະພິດຂອງອາຍຄາບອນ ໃນອາກາດ.
ແຕ່ຢ່າງໃດກໍຕາມ ທ່ານ Hansen ສະເໜີວ່າ ຍັງມີເວລາທີ່ຈະຫລີກລ່ຽງບໍ່ໃຫ້ສະພາບການ
ດິນຟ້າອາກາດ ຮ້າຍແຮງລົງໄປອີກໄດ້ຢູ່ ແລະທ່ານສະໜັບສະໜຸນໃຫ້ມີການເກັບຄ່າທໍານຽມ ເພີ້ມຂຶ້ນເທື່ອລະໜ້ອຍ ສໍາລັບການປ່ອຍອາຍແກສຄາບອນ ໂດຍພວກບໍລິສັດທີ່ໃຊ້ເຊື້ອເພີງ
ແບບເກົ່າແກ່ນັ້ນ.