ມີຜູ້ຄົນເສຍຊີວິດ ຫຼາຍກວ່າ 5 ລ້ານຄົນໃນແຕ່ລະປີ ຍ້ອນການສູບຢາຊຶ່ງຈໍານວນຫລາຍ
ໃນນັ້ນແມ່ນເສຍຊີວິດຢູ່ໃນປະເທດພວມພັດທະນາ. Dr. Thomas Frieden ຫົວໜ້າ
ສູນກາງຄວບຄຸມພະຍາດຂອງສະຫະລັດ ຫລື CDC ກ່າວວ່າ ມີນ້ອຍກ່ວາ 10% ຂອງ
ບັນດາປະເທດໃນທົ່ວໂລກ ທີ່ວ່າເອົາໃຈໃສ່ແລະເອົາບາດກ້າວຢ່າງພຽງພໍ ຕໍ່ການປ້ອງ
ກັນບັນຫານີ້. ທ່ານຊີ້ໄປໃສ່ ສະຫະລັດແລະ Uraguay ວ່າ ເປັນສອງປະເທດທີ່ມີການ
ຈັດຕັ້ງປະຕິບັດໂຄງການຕໍ່ຕ້ານຢາສູບ ຢ່າງມີປະສິດທິຜົນ ຊຶ່ງທ່ານກ່າວເນັ້ນວ່າ ບັນດາ
ປະເທດອື່ນໆຄວນຈະເອົາເປັນແບບຢ່າງ. ທ່ານໝໍ Thomas Frieden ກ່າວວ່າ:
“ປັດຈຸບັນ ຢາສູບເປັນຕົ້ນເຫດອັນນຶ່ງອັນດຽວ ຊັ້ນນຳ ຂອງການຕາຍຂອງຄົນ
ໃນໂລກ. ຢາສູບເອົາຊິວິດຜູ້ຄົນໄປຫຼາຍກວ່າໂຣກເອດສ, ໂຣກປອດແຫ້ງ
ແລະໂຣກໄຂ້ຍຸງ ໂຮມເຂົ້າກັນ. ແລະບໍ່ຄືກັນກັບພວກໂຣກເຫລົ່ານັ້ນ ທີ່ກໍາລັງ
ຫຼຸດໜ້ອຍຖອຍລົງນັບມື້ ຢາສູບຊໍ້າພັດເພີ່ມຄວາມຕາຍຫຼາຍຂຶ້ນ."
ທ່ານໝໍ Frieden ກ່າວວ່າ ແຕ່ວ່າການສູບຢາ ບໍ່ແມ່ນບັນຫາໃຫ່ຽສຸດອັນດຽວຂອງໂລກ
ໂດຍທ່ານຊີ້ອອກວ່າ ການຕາຍຍ້ອນອຸບັດຕິເຫດທາງຍວດຍານພາຫານະນັ້ນ ກໍໄດ້ກາຍ
ມາເປັນບັນຫາເຮື້ອຮັງໄປແລ້ວ ແລະໄດ້ມີຫຼາຍກວ່າ 1 ລ້ານຄົນຕາຍຍ້ອນສາເຫດດັ່ງກ່າວ
ໃນແຕ່ລະປີ ຊຶ່ງຮວມທັງພວກທີ່ຍ່າງແລະໃຊ້ລົດຖີບນຳ. ທ່ານໝໍ Thomas Frieden
ກ່າວຕື່ມວ່າ:
“ສິ່ງທີ່ຈະເກີດຂຶ້ນ ພາຍໃນ 25 ປີ ຫຼື 20 ປີຂ້າງໜ້າ, ເວ້ນເສຍແຕ່ວ່າພວກ
ເຮົາຈະເອົາບາດກ້າວຢ່າງຮີບດ່ວນ ກໍຄືວ່າ ການບາດເຈັບຍ້ອນການຈະລາ
ຈອນຕາມທ້ອງຖະໜົນ ຈະເພີ້ມຂຶ້ນຈາກ 2 % ຂອງການຕາຍທັງໝົດ ເປັນ
3 % ເຄິ່ງ ຂອງການຕາຍທັງໝົດ ແລະຈະກາຍເປັນສາເຫດ ຊັ້ນນຳໜ້າ
ອັນດັບທີ 5 ຂອງການຕາຍ ຢູ່ໃນທົ່ວໂລກ."
ທ່ານໝໍ Thomas Frieden ກ່າວວ່າ ພະຍາດທີ່ເກີດຈາກການຕິດເຊື້ອໂຣກທາງລະບົບ
ຫາຍໃຈ ເຊັ່ນໂຣກປອດແຫ້ງນັ້ນ ກໍຍັງເປັນບັນຫາໃຫຍ່ຢູ່ຕໍ່ມາ. ທ່ານກ່າວອີກວ່າ 1 ພັນ
ລ້ານຄົນ ແມ່ນບໍ່ມີນໍ້າດື່ມນໍ້າໃຊ້ທີ່ສະອາດ ແລະ 2 ພັນ 500 ລ້ານຄົນ ບໍ່ມີຮອດລະບົບ
ສຸຂະນາໄມໃຊ້ ຊຶ່ງທ່ານກ່າວວ່າ ການມີສອງຢ່າງທີ່ກ່າວມານັ້ນໃຊ້ ຈະສາມາດຊ່ອຍປ້ອງ
ກັນການເສຍຊີວິດໄດ້ເປັນລ້ານໆຄົນ ຊຶ່ງຮວມທັງພວກເດັກນ້ອຍ ທີ່ລົ້ມຫາຍຕາຍຈາກ
ໄປຍ້ອນໂຣກທ້ອງຂີ້ຮາກ. ທ່ານໝໍ Thomas Frieden ກ່າວວ່າ ຍັງມີໂຣກອະຫິວາ
ກໍຄືທ້ອງຂີ້ຮາກຂັ້ນຮ້າຍແຮງນັ້ນ ຢູ່ໃນຫລາຍໆເຂດຂອງໂລກ ຊຶ່ງເປັນການສະທ້ອນໃຫ້
ເຫັນເຖິງຄວາມລົ້ມແຫລວຂອງລັດຖະບານ ທີ່ບໍ່ສາມາດສະໜອງນໍ້າສະອາດແລະລະບົບ
ສຸຂະນາໄມຢ່າງພຽງພໍ ໃຫ້ປະຊາຊົນ.
ຜູ້ອໍານວຍການສູນກາງ CDC ກ່າວຕໍ່ໄປວ່າ ໂຣກ AIDS ຍັງຄົງເປັນສາເຫດໃຫຍ່ຂອງ
ການຕາຍຢູ່ໃນທະວີບອາຟຣິກາ ຊຶ່ງທ່ານກ່າວວ່າ ບັນຫາສ່ວນນຶ່ງກໍ ແມ່ນເປັນຍ້ອນວ່າ
ຜູ້ຄົນທີ່ຕິອເຊື້ອໄວຣັສ HIV ທີ່ພາໃຫ້ເປັນໂຣກ AIDS ນັ້ນ ບໍ່ຮູ້ຊໍ້າວ່າ ຕົນມີເຊື້ອ HIV.
ທ່ານກ່າວດັ່ງນີ້:
"ພວກເຮົາຮູ້ວ່າ ຜູ້ຄົນທີ່ຮູ້ວ່າຕົນເປັນໂຣກດ່ັງກ່າວນັ້ນ ຈະບໍ່ນຳເອົາເຊື້ອ
ໂຣກນັ້ນໄປຕິດແປດຄົນອື່ນ ແລະທາງດຽວທີ່ເຂົາເຈົ້າຈະໄດ້ຮັບຄວາມຊ່ອຍ
ເຫຼືອດ້ານສຸຂະພາບ ກໍຄືເຂົາເຈົ້າຕ້ອງຮູ້ວ່າ ຕົນເປັນໂຣກດ່ັງກ່າວເທົ່ານັ້ນ."
ທ່ານໝໍ Thomas Frieden ກ່າວວ່າໂຣກອ້ວນນັ້ນ ກໍກໍາລັງກາຍມາເປັນບັນຫາສຸຂະ
ພາບຫລາຍຂຶ້ນເລື້ອຍໆ ແລະທ່ານກ່າວວ່າ ປະຈຸບັນນີ້ຜູ້ຄົນອ້ວນພີຫຼາຍກວ່າຄົນຈ່ອຍ
ຢູ່ໃນທົ່ວໂລກ. ສໍາລັບໂຣກມະເຮັງ ສາເຫດສໍາຄັນອີກອັນນຶ່ງຂອງການຕາຍນັ້ນ ທ່ານ
Frieden ກ່າວວ່າ ຈໍານວນຄົນເສຍຊີວິດຍ້ອນໂຣກມະເຮັງໃນແຕ່ລະປີນັ້ນ ອາດຕັດລົງ
ໄດ້ເຖິງເຄິ່ງນຶ່ງ ຖ້າຜູ້ຄົນພາກັນຢຸດເຊົາສູບຢາ ແລະ ກິນອາຫານທີ່ມີຄຸນນະປະໂຫຍດ
ຕໍ່ຮ່າງກາຍ ແລະອອກກຳລັງກາຍຫລາຍຂຶ້ນ.
