ລິ້ງ ສຳຫລັບເຂົ້າຫາ

ວັນພະຫັດ, ໒໘ ມີນາ ໒໐໒໔

ຜູ້ນຳໂລກສະແດງຄວາມໝາຍໝັ້ນ ອີກເທື່ອໃໝ່ຕໍ່ການປັບປຸງ ຄວາມໝັ້ນຄົງຂອງສະບຽງອາຫານໂລກ


ໃນ​ກອງ​ປະຊຸມກັບ​ສະຫະພາບ​ຢຸ​ໂຣບ ​ແລະ​ສິບ​ປະ​ເທດ​ທີ່ຖືກເຊີນມາຮ່ວມປະຊຸມຈາກ​ຂົງ​ເຂດ​ອາ​ເມ​ຣິ​ກາ​ລາ​ຕິນ ​ແລະ​ອາ​ຟຣິການັ້ນ ພວກ​ຜູ້ນຳ​ແປດ​ເສດຖະກິດ​ທີ່ສຳຄັນໆຂອງ​ໂລກ ໄດ້ກ່າວຢໍ້າອີກ​ເທື່ອໃໝ່​ເຖິງຄວາມ​ໝັ້ນ ໝາຍທີ່​ໄດ້​ໃຫ້ໄວ້​ເມື່ອ​ລະດູ​ຮ້ອນ​ປີ​ກາຍ​ນີ້ ຕໍ່​ການປັບປຸງຄວາມ​ໝັ້ນຄົງ​ດ້ານ​ສະບຽງອາຫານຂອງ​ໂລກນັ້ນ.

ເນຶ່ອງຈາກ​ວ່າເວລາ​ນີ້ ມີ​ປະຊາຊົນ​ໃນຈຳນວນທີ່​ປະ​ເມີນ​ກັນ​ວ່າ​ມີປະມານ​ນຶ່ງ​ພັນ​ລ້ານ​ຄົນ​ ທີ່ບໍ່​ມີ​ອາຫານ​ການ ກິນພຽງພໍ​ຢູ່​ໃນ​ທົ່ວ​ໂລກ ​ພວກ​ຜູ້ນຳເຫລົ່ານັ້ນ ຈຶ່ງ​ຍືດໝັ້ນ​ຢູ່​ໃນ​ຄຳໝັ້ນ​ສັນຍາ​ທີ່​ພວກ​ຕົນ​ໄດ້​ໃຫ້​ໄວ້​ ທີ່​ວ່າ​ຈະ​ນຳໃຊ້ ງົບປະມານ 22 ພັນ​ລ້ານ​ໂດ​ລາໃນລະຍະ​ສາມ​ປີ​ ​ເພື່ອ​ປັບປຸງ​ໂຄງ​ລ່າງ ພື້ນຖານຕ່າງໆ ແລະ​ໂຄງ ການ​ການ​ກະ​ເສດ​ທີ່​ຍືນ​ຍົງ​ຖາ​ວອນ​. ປະ​ທາ​ນາ​ທິບໍດີ ບາຣັກ ​ໂອບາ​ມາ ກ່າວ​ວ່າ ​ເຖິງ​ແມ່ນ​ເວລາ​ນີ້ມີ​ສະພາບ ການ​ເສດຖະກິດ​ຕົກ​ຕ່ຳ​ຢູ່​ໃນ​ທົ່ວ​ໂລກຢູ່​ກໍ​ຕາມ ການ​ລົງ​ທຶນ​ທີ່​ບໍ່​ພຽງພໍ​ໃສ່ໃນ​ການ​ພັດ ທະນາ​ດ້ານການ​ກະ​ເສດ​ນັ້ນ ຈະ​ຕ້ອງ​ຖືກ​ຕ່າວປີ້ນ​ ຖ້າ​ຫາກ​ຈະ​ໃຫ້ມີ​ການ​ປັບປຸງ​ຄວາມ​ໝັ້ນຄົງ​ດ້ານ​ສະບຽງ​ອາຫານ​ໃຫ້​ດີ​ຂື້ນ​. ສະຫະລັດ​ກຳລັງຊ່ວຍ​ນຳພາ​ກ່ຽວ​ກັບ​ເລຶ່ອງນີ້ ໂດຍ​ໄດ້​ຮັບປາກ​ວ່າ​ຈະ​ໃຫ້ການຊ່ວຍ​ເຫລືອ​ຢ່າງ​ໜ້ອຍ 3,500 ​ລ້ານ​ໂດ​ລາ.

ໂຄງການ Feed the Future ຫລື​ຊຸບ​ລ້ຽງ​ອະນາຄົດ ຊຶ່ງ​ເປັນໂຄງການລິເລີ່​ມຂອງ​ສະຫະລັດ ​ເພື່ອ​ແກ້​ໄຂ​ຄວາມ​ອຶດຫິວ​ແລະ​ຄວາມ​ໝັ້ນຄົງ​ດ້ານ​ສະບຽງ​ອາຫານ​ຂອງໂລກ ​ໄດ້​ນຳ​ໃຊ້​ຕົວ​ແບບ​ຂອງ​ການ​ພັດທະນາ​ບົນ​ພື້ນຖານ​ຂອງ​ຄວາມ​ເປັນ​ພາຄີ​ກັນ ບໍ່​ແມ່ນຈາກ​ການ​ອຸປະຖຳ​. ພວກ​ປະ​ເທດ​ກຳລັງ​ພັດທະນາ​ທັງຫລາຍ ​ແມ່ນ​ເປັນ​ຜູ້ນຳພາ​ໃຫ້ການ​ອອກ​ແບບຄິດ​ຄົ້ນ ​ແລະ​ຈັດຕັ້ງ​ປະຕິບັດຍຸດ​ທະ​ສາດ​ທີ່​ອິງ​ໃສ່​ຫລັກ​ຖານເປັນ​ຫລັກ ​ແລະ​ມີ​ເປົ້າໝາຍ​ອັນ​ແຈ້ງ​ຂາວ​ ​ໃນ​ການແກ້​ໄຂ​ບັນຫາ​ຄວາມ​ຕ້ອງການ ສະ​ເພາະ​ຂອງ​ພວກ​ເຂົາ​ເຈົ້າ. ສະຫະລັດ​ໄດ້​ຖອດ​ຖອນ​ບົດຮຽນ​ຈາກ​ໂຄງ ການ​ຊ່ວຍ​ເຫລືອຕ່າງໆ​ໃນ​ອ​ະດີດ​ຜ່ານ​ມາ ​ແລະ​ຮຽນ​ຮູ້​ວ່າຄວາມ​ເປັນ​ເຈົ້າຂອງປະ​ເທດ​ທີ່​ແຈ້ງ​ຂາວ ​ແລະ​ຄວາມ​ໝັ້ນ​ໝາຍຢ່າງ​ແຂງ​ແຮງ​ຂອງ​ປະ​ເທດ​ນັ້ນ ​ແມ່ນ​ຈຳ​ເປັນ​ແລະ​ສຳຄັນ​ທີ່​ສຸດຕໍ່​ຄວາມ​ສຳ​ເລັດ​ໃນ​ລະຍະ​ຍາວ.

ເວລາ​ນີ້​ ສະຫະລັດ​ກຳລັງ​ປະຕິບັດ​ງານ​ຮ່ວມກັບ​ຫລາຍໆປະ​ເທດ​ ​ເພື່ອ​ຊອກ​ຫາ​ວິທີ​ສ້າງ​ຄວາມ​ເຂັ້ມ​ແຂງ ​ໃຫ້​ແກ່​ຂັ້ນຕອນຫລື​ຂະ​ບວນການ​ຜະ ລິດດ້ານ​ການ​ກະ​ເສດທັງ​ໝົດ ນັບ​ຕັ້ງ​ແຕ່ຈາ​ກ​ຫ້ອງ​ທົດ​ລອງ ບ່ອນ​ທີ່​ພວກ​ນັກຄົ້ນຄວ້າ​ຊອກ​ຫາ​ທາງ​ພັດ​ທະນາ​ແກ່ນ​ພືດ​ຊະນິດ​ຕ່າງໆ​ ທີ່ສາມາດ​ໃຫ້​ຜົນ​ເກັບ​ກ່ຽວສູງ, ​ໄປ​ຫາຟາ​ມປູກຝັງ ບ່ອນທີ່​ການ​ຄຸ້ມ​ຄອງນ້ຳ​ທີ່​ດີ​ຂື້ນ ການນຳ​ໃຊ້​ຝຸ່ນປຸ໋ຍ ​ແລະ​ການເຝິກອົບ​ຮົມ​ພວກ​ກະ​ເສດ​ຕະກອນ ສາມາດ​ຊ່ວຍ​ປັບປຸງ​ການຜະລິດ, ໄປ​ຫາ​ຕະຫລາດ ບ່ອນ​ທີ່​ສະຫະລັດ​ກຳລັງ​ຊ່ວຍ ໃນການ​ແບ່ງປັນ​ຂໍ້​ມູນກ່ຽວ​ກັບ​ຜົນ​ຜະລິດ ​ແລະກໍ່​ສ້າງ​ໂຄງລ່າງ​ພື້ນຖານ ທີ່​ຈະ​ອຳ​ນວຍໃຫ້​ປະຊາຊົນ​ສາມາດ​ແປ​ຮູບ​ ​ເກັບ​ມ້ຽນ ​ແລະ​ຂົນ​ສົ່ງຜົນລະປູກ​ຂອງ​ພວກ​ເຂົາ​ເຈົ້າ​ໄດ້ຢ່າງ​ມີ​ປະສິດທິ​ຜົນ​ດີ​ຂື້ນ ​ແລະ​ໃນ​ທີ່​ສຸດ​ກໍແມ່ນໄປ​ຫາໂຕ໊​ະ ບ່ອນ​ທີ່​ຜົນລະປູກ​ຂອງ​ເຂົາ​ເຈົ້າກາຍ​ມາເປັນ​ອາຫານທີ່​ສົມບູນ​ ເປົ້າໝາຍ​ຫລັກ​ແລ້ວ​ກໍ​ແມ່ນ​ເພື່ອ​ໃຫ້​ພວກ​ປະຊາຊົນມີ​ໂອກາດ​ທີ່​ຈະ​ຊື້ ​ແລະ​ປູກ​ພືດ​ພັນ​ທີ່​ໃຫ້​ຜົນ​ປະ​ໂຍດ​ຕໍ່ຮ່າງ​ກາຍ ​ແລະ​ໄດ້​ຮັບ​ອາຫານ​ການ​ກິນ​ທີ່​ສົມ​ດູ​ນກັນ.

ສະຫະລັດ​ແມ່ນ​ໄດ້​ອະນຸມັດ​ການ​ຊ່ວຍ​ເຫລືອ​ໃຫ້ແກ່ໂຄງການ Feed the Future ໄປ​ແລ້ວ​ເປັນ​ຈຳນວນ​ເງິນ 812 ລ້ານ​ໂດ​ລາ ຊຶ່ງເປັນ​ສ່ວນນຶ່ງຂອງ​ຈຳນວນ 3 ລ້ານ 5 ​ແສນໂດ​ລາ ທີ່​ໄດ້​ໃຫ້​ຄຳ​ໝັ້ນ​ສັນຍາ​ໄວ້. ​ແລະ​ສະຫະລັດ​ຂໍ​ສັນລະ​ເສີນ​ຕົບມື​ໃຫ້​ແກ່ຄວາມ​ກ້າວ​ໜ້າ​ຢ່າງ​ສຳຄັນ ທີ່​ໄດ້​ມີ​ຂຶ້ນ​ໃນ​ການ​ດຳ​ເນີນຄວາມ​ພະຍາຍາມ​ຂອງໂລກ ​ເພື່ອ​ລົດ​ຜ່ອນ​ຄວ​າມ​ອຶດຫິວ​ ແລະຈຳນວນ​ຜູ້​ຄົນ​ທີ່ບໍ່​ໄດ້​ຮັບ​ອາຫານ​ການ​ກິນ​ຢ່າງ​ພຽງພໍ​ນັ້ນ.

XS
SM
MD
LG