ເຖິງແມ່ນວ່າ ຄວາມສົນໃຈທັງໝົດ ແລະຊັບພະຍາກອນທີ່ສະຫະລັດ ແລະບັນ ດາປະເທດອື່ນໆມີ ໄດ້ສຸມເຂົ້າໃສ່ຄວາມພະຍາຍາມເພື່ອຕໍ່ຕ້ານການກໍ່ການຮ້າຍ ກໍຈິງ ແຕ່ການສັງ ຫານໝູ່ ໃນວັນອາທິດທີ່ຜ່ານມາ ໃນເມືອງ Orlando ລັດ Florida ສະແດງໃຫ້ເຫັນວ່າ ໄພຂົ່ມຂູ່ຈາກການກະທຳຂອງສ່ວນບຸກຄົນທີ່ຍັງມີຢູ່ ແລະມີຄວາມຫຍຸ້ງຍາກເປັນພິເສດສຳລັບລັດຖະບານທີ່ຈະຮັບມືໄດ້.
ຍັງບໍ່ມີຮ່ອງຮອຍສະແດງໃຫ້ເຫັນໃນປັດຈຸບັນນີ້ວ່າ ມືປືນຢູ່ເມືອງ Orlando ໄດ້ມີການຕິດຕໍ່ໂດຍກົງກັບກຸ່ມລັດອິສລາມ ແລະຫົວໜ້າຫ້ອງການສັນຕິບານກາງຫຼື FBI ຂອງສະຫະ ລັດ ທ່ານ James Comey ກ່າວໃນວັນຈັນວານນີ້ວ່າ ຫ້ອງ ການຂອງທ່ານເຊື່ອວ່າ ມືປືນໄດ້ກາຍເປັນຄົນຫົວຮຸນແຮງຜ່ານທາງອິນເຕີແນັດ.
ທ່ານ Eric Rosand ເຈົ້າໜ້າທີ່ອາວຸໂສ ດ້ານນະໂຍບາຍການຕ່າງປະເທດ ທີ່ ສະຖາບັນ Booking ກ່າວວ່າ ການໂຈມຕີນີ້ ເປັນໂຕຢ່າງນຶ່ງທີ່ສະແດງວ່າວິ ທີສົ່ງສານຂອງກຸ່ມລັດອິສລາມໄດ້ຕົກໄປເຖິງມືຂອງພວກຊາວໜຸ່ມທີ່ນັບຖືສາສະ ໜາອິສລາມຫລາຍໆຄົນ ຜູ້ທີ່ບໍ່ໄດ້ປະສານງານກັບກຸ່ມ ແຕ່ວ່າໃຈຮ້າຍ ສູນເສຍ ແລະໄດ້ຍອມຮັບເອົາວິໄສທັດໃນການກໍ່ຄວາມຮຸນແຮງ ແລະການທຳລາຍລ້າງຂອງກຸ່ມດັ່ງກ່າວ.
ທ່ານກ່າວຕໍ່ວີໂອເອ ວ່າ “ບັນດາປະເທດທັງຫລາຍຕ້ອງໄດ້ຮັບມືກັບອັນຕະລາຍ ດ້ວຍຕົນເອງ. ເຂົາເຈົ້າຕ້ອງເຮັດຢ່າງໃດຢ່າງນຶ່ງເພື່ອເຂົ້າມາຫາຄວາມຮູ້ສຶກຂອງບັນດາປະຊາຄົມທີ່ບໍ່ມີຄວາມສຳຄັນ ບັນດາສ່ວນບຸກຄົນທີ່ສູນເສຍຄວາມຮູ້ສຶກ ແລະກົນໄກແມ່ນພ້ອມແລ້ວເພື່ອປ້ອງກັນສິ່ງດັ່ງກ່າວ ຊັບພະຍາກອນທີ່ບໍ່ພຽງພໍ ແລະນະວັດຕະໃໝ່ກຳລັງສຸມໃສ່ເພື່ອປ້ອງກັນບັນຫາທີ່ຈະເກີດຂຶ້ນລະຫວ່າງບັນ ຫາພາຍໃນຂອງແຕ່ລະປະເທດ.”
ກະຊວງຕ່າງປະເທດສະຫະລັດ ກ່າວຢູ່ໃນລາຍງານໃນຕົ້ນເດືອນນີ້ເຖິງຈຳນວນການໂຈມຕີກໍ່ການຮ້າຍຢູ່ໃນທົ່ວໂລກໄດ້ຫລຸດລົງ 13 ເປີເຊັນ ໃນປີກາຍນີ້ ໃນຂະນະທີ່ການຕາຍຫລຸດລົງ 14 ເປີເຊັນ.
