ປະທານາທິບໍດີອັຟການິສຖານ ທ່ານ Ashraf Ghani ມີກຳນົດ
ທີ່ຈະກ່າວຄຳ ປາໄສຕໍ່ກອງປະຊຸມຄົບຄະນະຂອງລັດຖະສະພາ
ສະຫະລັດ ໃນວັນພຸດມື້ນີ້ ນຶ່ງມື້ຫລັງຈາກໄດ້ສົນທະນາຫາລືກັບ
ປະທານາທິບໍດີ Barack Obama ແລະຮັບຮູ້ວ່າ “ຍັງມີວຽກ
ງານອີກຢ່າງຫລວງຫລາຍ” ທີ່ຕ້ອງໄດ້ກະທຳ ໃນການຄ້ຳປະກັນ
ຄວາມປອດໄພໃຫ້ແກ່ປະເທດຂອງທ່ານ
ຢູ່ໃນກອງປະຊຸມຖະແຫຼງຂ່າວຮ່ວມ ຫລັງຈາກການພົບປະກັນ
ໃນວັນອັງຄານວານນີ້ ທີ່ທຳນຽບຂາວແລ້ວ ທ່ານ Obama ໄດ້
ປະກາດວ່່າ ທະຫານສະຫະ ລັດ 9,800 ຄົນທີ່ປະຈຳການຢູ່ໃນ
ອັຟການິສຖານນັ້ນ ຈະຢູ່ຕໍ່ໄປຈົນເຖິງທ້າຍປີນີ້ ຊຶ່ງໄດ້ປັບປ່ຽນ
ແຜນການກ່ອນໜ້ານີ້ຂອງທ່ານ ທີ່ຈະຕັດຈຳນວນທະຫານລົງເຄິ່ງນຶ່ງນັ້ນ.
ທ່ານ Obama ກ່າວວ່າ “ອັຟການິສຖານ ຍັງເປັນບ່ອນທີ່ມີອັນຕະລາຍຮ້າຍແຮງ ແລະ
ພວກກະບົດກໍຍັງທຳການໂຈມຕີ ຮວມທັງການວາງລະເບີດສະລະຊີບ ຕໍ່ພົນລະເຮືອນ
ນຳດ້ວຍ.”
ສະຫະລັດໄດ້ເສັດສີ້ນການປະຕິບັດງານສູ້ລົບຢູ່ໃນອັຟການິສຖານ ຊຶ່ງຄັ້ງນຶ່ງສະຫະລັດ
ເຄີຍມີທະຫານ ເຖິງ 130,000 ຄົນ ແຕ່ທ່ານ Ghani ໄດ້ຮ້ອງຂໍ ໃຫ້ດັດແປງ ການຖອນ
ກຳລັງທະຫານສະຫະລັດ ຕາມຕາລາງເວລາທີ່ໄດ້ວາງເອົາໄວ້ ຊຶ່ງໃນເວລານີ້ຍັງໃຫ້ການ
ເຝິກແອບ ແລະໃຫ້ການແນະນຳແກ່ທະຫານອັຟການິສຖານຢູ່. ເຖິງແມ່ນວ່າ ມີການຊັກ
ຊ້າໃນການຫຼຸດຈຳນວນທະຫານລົງໃນປີນີ້ ແຕ່ທ່ານ Obama ກໍຍັງຄົງມີຄວາມໝາຍໝັ້ນ
ທີ່ຈະຮັກສາກຳລັງທະຫານໄວ້ ໜ້ອຍກວ່າ 1,000 ຄົນ ຢູ່ໃນອັຟການິສຖານ ພາຍໃນຕົ້ນ
ປີ 2017.
ທ່ານ Ghani ກ່າວວ່າ ການປ່ຽນແປງນີ້ “ຈະຖືກນຳໃຊ້ເພື່ອເລັ່ງລັດການປະຕິຮູບເພື່ອຄໍ້າ ປະກັນວ່າ ກຳລັງຮັກສາຄວາມປອດໄພແຫ່ງຊາດ ອັຟການິສຖານ ຈະໄດ້ຮັບການນຳພາ
ທີ່ດີຂື້ນ ປະກອບອາວຸດ ເຝິກແອບ ແລະເພັ່ງເລັງໃສ່ພື້ນຖານການປະຕິບັດງານຂອງເຂົາ
ເຈົ້າ.” ທ່ານຍັງໄດ້ເນັ້ນໜັກເຖິງຄວາມຈຳເປັນເຖິງຂັ້ນຕອນຂອງການສ້າງສັນຕິພາບພາຍ
ໃຕ້ການນຳພາຂອງອັຟການິສຖານ ແຕ່ກໍກ່າວວ່າ ລັດຖະບານຂອງທ່ານຈະບໍ່ສ້າງສັນຕິ
ພາບ ກັບພວກທີ່ຢາກສວຍ ໃຊ້ອັຟການິສຖານ “ເປັນບ່ອນຢັນເພື່ອກໍ່ການຮ້າຍຢູ່ໃນທົ່ວໂລກ.”
