ລິ້ງ ສຳຫລັບເຂົ້າຫາ

ຮອງ​ປະທານາທິບໍ​ດີການາ ຂຶ້ນເປັນ ປະທານາທິບໍດີ ແທນຜູ້ເກົ່າ ທີ່ເສຍຊີວິດໄປ (ເບິ່ງສະໄລດ໌)

  • ທອງປານ ເທບວົງສາ

ຮອງ​ປະທານາທິບໍ​ດີ​ຂອງ​ກາ​ນາ ​John Mahama ໄດ້​ຂຶ້ນນັ່ງຕັ່ງປະຈໍາ​​ຕໍາ​ແໜ່​ງ ປະທານາທິບໍດີ​ເມື່ອ​ວັນ​ອັງຄານ ວັນທີ 24 ກໍລະກົດ, ​ວານ​ນີ້ ພາຍຫຼັງ​ການ​ເສຍ​ຊີວິດ​ຢ່າງ​ກະທັນຫັນ ຂອງ​ປະທານາທິບໍດີ John Atta Mills.

ຮອງ​ປະທານາທິບໍ​ດີ​ຂອງ​ກາ​ນາ​ໄດ້​ສາບານ​ຕົວ​ເຂົ້າຮັບ​ຕໍາ​ແໜ່​ງປະທານາທິບໍດີ​ເມື່ອ​
ວັນ​ອັງຄານ​ວານ​ນີ້ ຫລາຍ​ຊົ່ວ​ໂມງຫຼັງຈາກທາງ​ການ​ກາ​ນາ​ປະກາດຂ່າວ​ການ​ເສຍ​ຊີວິດ
​ຢ່າງ​ກະທັນຫັນຂອງ​ປະທານາທິບໍດີ John Atta Mills.

ທ່ານ John Dramani Mahama ​ເຂົ້າກໍາ​ຕໍາ​ແໜ່​ງສໍາລັບ​ໄລຍະ​ເວລາທີ່​ຍັງ​ເຫຼືອຂອງ
ທ່ານ Mills ທີ່​ເສຍ​ຊີວິດ​ໄປໃນ​ມື້ວານ​ນີ້ ທີ່​ໂຮງໝໍ​ທະຫານ​ໃນ​ເມືອງຫຼວງ Accra ລວມ ອາຍຸ​ໄດ້ 68 ປີ.

ຫ້ອງການປະທານາທິບໍດີ ​ເວົ້າວ່າ ທ່ານ Mill ​ໄດ້​ເສຍ​ຊີວິດ​ລົງ​ຢ່າງ​ກະທັນຫັນ ​ແລະໃນ​ເວລາ
​ອັນ​ບໍ່​ສົມຄວນ ຄື​ບໍ່​ເທົ່​າ​ໃດ​ຊົ່ວ​ໂມງຫຼັງຈາກ​ລົ້ມ​ເຈັບ. ບໍ່​ໄດ້​ມີ​ການ​ໃຫ້ລາຍ​ລະອຽດກ່ຽວ​ກັບ​
ສາ​ເຫດ​ຂອງ​ການ​ເສຍ​ຊີວິດ​ຂອງ​ທ່ານ​.

ປະທານາທິບໍດີ​ບາຣັກ ​ໂອ​ບາ​ມາ ​ໄດ້ກ່າວ​ສະດຸ​ດີ​ທ່ານ Mills ​ໂດຍ​ໄດ້​ຍ້ອງຍໍ​ຄວາມ​ພະຍາ
ຍາມ​ຂອງ​ທ່ານ ໃນ​ການ​ປັບປຸງ​ສິດທິ​ມະນຸດ ​ແລະ​ຄວາມ​ເປັນ​ຢູ່​ຂອງ​ປະຊາຊົນ​ຂອງ​ທ່ານ
​ໃຫ້​ດີ​ຂຶ້ນ.

ປະທານາທິບໍດີ Mills ​ໄດ້​ນໍາພາ​ ປະ​ເທດ​ກາ​ນາ ມາ​ຕັ້ງ​ແຕ່​ເດືອນ​ມັງກອນ ປີ 2009 ຫຼັງ
ຈາກ​ໄດ້​ຮັບໄຊຊະນະໃນການ​ເລືອກ​ຕັ້ງປະທານາທິບໍດີ​ຢ່າງ​ຫວຸດ​ຫວິດ ​ໃນ​ປີ 2008.
ການ​ເລືອກ​ຕັ້ງ​ຄັ້ງ​ນັ້ນ ​ໄດ້​ຮັບ​ການຊົມ​ເຊີຍ​ວ່າ ​ເປັນ​ຕົວຢ່າ​ງທີ່​ດີ​ທີ່​ບໍ່​ຄ່ອຍ​ຈະ​ເຫັນ​ກັນ​ຂອງ​
ການ​ໂອນ​ອໍານາດ​ຢ່າງ​ສັນຕິ​ໃນ ອາ​ຟຣິກາ. ການ​ເລືອກ​ຕັ້ງ​ປະ​ທາ​ນາ​ທິບໍດີກາ​ນາ​ຄັ້ງ​ຕໍ່​ໄປ​
ກໍານົດ​ຈະ​ມີໃນ​ເດືອນ​ທັນວາ​ປີ​ນີ້.

ເບິ່ງສະໄລດ໌ຮູບທີ່ກ່ຽວຂ້ອງກັບເລື້ອງນີ້

XS
SM
MD
LG