ເຢຍຣະມັນກໍາລັງສະຫລອງວັນຄົບຮອບ 20 ປີແຫ່ງການທ້ອນໂຮມ ປະເທດຄືນເຂົ້າກັນ ດ້ວຍການສະແດງແລະຫລີ້ນມ່ວນຊື່ນຕ່າງໆ ແລະ ກ່າວຍ້ອງຍໍສັນລະເສີນຜົນສໍາເລັດຕ່າງໆຂອງປະເທດ ນັບແຕ່ອະດີດ ເຢຍຣະມັນຕາເວັນອອກແລະເຢຍຣະມັນຕາເວັນຕົກໄດ້ໂຮມເຂົ້າກັນເປັນຕົ້ນມາ.
ທ່ານນາງ Angela Merkel ນາຍົກລັດຖະມຸນຕີເຢຍຣະມັນກ່າວຕໍ່ນິຕະຍະສານ Super illu ຂອງເຢຍຣະມັນວ່າ ຊາວເຢຍຣະມັນຕາເວັນອອກ ແມ່ນປະຕິບັດໄດ້ດີຫລາຍໃນການປັບໂຕເຂົ້າກັບການປ່ຽນແປງຕ່າງໆ ຂອງໄລຍະ 20 ປີຜ່ານມານີ້.
ປະທານາທິບໍດີບາຣັກ ໂອບາມາແຫ່ງສະຫະລັດ ກ່າວວ່າ ການທ້ອນໂຮມເຢຍຣະມັນເຂົ້າກັນຄືນ ແມ່ນໄດ້ເປັນຄວາມສໍາເລັດດ້ານປະວັດສາດອັນນຶ່ງ ຂອງປະເທດນຶ່ງໃນບັນດາພັນທະມິດທີ່ໃກ້ຊິດທີ່ສຸດແລະເພື່ອນມິດທີ່ຍິ່ງໃຫຍ່ທີ່ສຸດຂອງອະເມຣິກາ. ທ່ານໂອບາມາກ່າວ ຢູ່ໃນຖະແຫລງການສະບັບນຶ່ງວ່າ ມັນໄດ້ໄຂປະຕູໃຫ້ແກ່ເສລີພາບທີ່ບໍ່ເຄີຍມີມາກ່ອນໃນທົ່ວທະວີບຢູໂຣບ ກໍຄືໃນທົ່ວໂລກ.
ເມືອງ Bremen ໃນພາກຕາເວັນຕົກສຽງເໜືອຂອງເຢຍຣະ ມັນ ເປັນຜູ້ນໍາພາໃນການ ສະເຫລີມສະຫລອງໃນປີນີ້ ໂດຍເປັນເຈົ້າພາບໃນການຈັດງານ ກິນລ້ຽງຂຶ້ນຕາມຖະໜົນສາຍນຶ່ງ ໂດຍມີການສະແດງດົນຕີສົດຊຶ່ງເລີ້ມມາຕັ້ງແຕ່ວັນເສົາວານນີ້. ກຸງ Berlin ນະຄອນຫລວງຂອງປະເທດກໍເປັນເຈົ້າພາບຈັດລາຍການບັນເທີງມ່ວນຊື່ນ ຂຶ້ນຢູ່ຕໍ່ທາງເຂົ້າເມືອງ ທີ່ເອີ້ນວ່າ Bradenburg Gate ນັ້ນ.
ເຢຍຣະມັນໄດ້ຖືກແບ່ງອອກເປັນຄອມມິວນິສຕ໌ເຢຍຣະມັນຕາເວັນອອກ ແລະນາຍທຶນເຢຍຣະມັນຕາເວັນຕົກ ຫລັງຈາກທີ່ພວກ Nazi ໄດ້ຮັບການປາໄຊ ໃນປາງສົງຄາມໂລກຄັ້ງທີສອງ. ສອງປະເທດໄດ້ໂຮມເຂົ້າກັນຄືນໃນວັນທີ 3 ເດືອນຕຸລາ ປີ 1990 ຊຶ່ງເປັນເວລາ 11 ເດືອນ ຫລັງຈາກມີການປະທ້ວງຢ່າງສັນຕິຢ່າງຕໍ່ເນື່ອງໃນເຢຍຣະມັນຕາເວັນອອກ ຊຶ່ງໄດ້ເຮັດໃຫ້ລັດຖະບານຄອມມີວນິດທີ່ອ່ອນແອນັ້ນ ພັງທະລາຍລົງ.
