ປະທານາທິບໍດີ ເຢຍຣະມັນ ລາອອກ ຈາກຕໍາແໜ່ງ

ປະທານາທິບໍດີ​ເຢຍຣະມັນ ທ່ານ Christian Wulff ​ໄດ້​ລາ​ອອກທ່າມກາງ​ທີ່ມີ​ການ​ກ່າວ
ຫາ​ວ່າ ທ່ານ​ໄດ້​ໃຊ້ຕຳ​ແໜ່​ງທາງ​ການ​ເມືອງ​ຂອງ​ທ່ານເມື່ອກ່ອນ​ນີ້​ ໄປ​ໃນ​ທາງ​ທີ່​ບໍ່​ຖືກຕ້ອງ
ໂດຍ​ໄດ້​ຮັບ​ເອົາຂອງຂວັນ​ຈຳນວນ​ນຶ່ງ.

ການ​ປະກາດ​ກ່ຽວ​ກັບ​ການ​ລາ​ອອກ​ຂອງ​ປະທານາທິບໍດີ​ເຢຍຣະມັນ ​ໄດ້​ມີ​ຂຶ້ນ​ໃນມື້ວັນ​ສຸກ​
ວານນີ້ ນຶ່ງ​ມື້ຫຼັງຈາກ​ຄະນະ​ໄອ​ຍະ​ການ ​ໄດ້​ຂໍ​ຮ້ອງ​ໃຫ້​ມີ​ການ​ຍົກ​ເລີກ​ສິດພິ​ເສດ​ຂອງ​ທ່ານ
Wulff ​ເພື່ອ​ພວກ​ເຂົາ​ເຈົ້າ ຈະ​ສາມາດ​ທຳ​ການ​ສືບ​ສວນ​ກ່ຽວກັບ​ວ່າ ທ່ານ​ໄດ້​ໃຊ້​ຕຳ​ແໜ່​ງ
ຂອງ​ທ່ານ ​ໃນ​ຖານະ​ຜູ້​ປົກຄອງ​ລັດ Lower Saxony ​ໄປ​ໃນ​ທາງ​ຜິດ​ຫຼືບໍ່.

ທ່ານ Wulff ​ໄດ້​ປະ​ເຊີນ​ກັບຫຼາຍໆ​ຂໍ້ຫາຮວມທັງ​ອະນຸຍາດ​ໃຫ້ໝູ່​ເພື່ອນຂອງທ່ານ​ຄົນ​ນຶ່ງ
ທີ່​ເປັນ​ຜູ້​ຜະລິດ​ຮູບ​ເງົາ ຈ່າຍ​ຄ່າ​ໂຮງ​ແຮມ​ໃຫ້​ທ່ານ ແລະ​ຮັບ​ເອົາ​ເງິນກູ້​ຢືມ​ກ້ອນ​ໃຫຍ່​ຈາກ
ເພື່ອນ​ທີ່​ຮັ່ງມີ​ຄົນ​ນຶ່ງຂອງ​ພັນ​ລະ​ຍາ​ທ່ານ.

ນາຍົກລັດຖະມົນຕີ Angela Merkel ​ເປັນ​ຄົນ​ເລືອກເອົາ​ທ່ານ Wulff ດ້ວຍໂຕ​ທ່ານ​ນາງ
ເອງ ​ເພື່ອ​ໃຫ້​ເຂົ້າຮັບ​ຕຳ​ແໜ່​ງປະທານາທິບໍດີ ຊຶ່ງ​ຕົ້ນຕໍ​ແລ້ວ​ແມ່ນເປັນ​ຕຳ​ແໜ່​ງທາງດ້ານ​ພິ
ທີການ​ເທົ່າ​ນັ້ນໃນ​ປີ 2010. ນາຍົກລັດຖະມົນຕີ Merkel ​ໄດ້​ເລື່ອນ​ການ​ເດີນທາງ​ໄປ​ຢ້ຽມ
ຢາມ​ອີ​ຕາ​ລີໃນ​ມື້ວັນ​ສຸກ​ວານ​ນີ້ ​ເນື່ອງຈາກ​ມີ​ການ​ຄາດ​ຄະ​ເນ​ກັນ ກ່ຽວ​ກັບ​ການ​ລາ​ອອກຂອງ​
ທ່ານ Wulff.

ບັນດາ​ສະມາຊິກ​ລັດຖະສະພາ​ຂອງ​ເຢຍຣະມັນ ມີ​ເວລາ 30 ມື້ ສຳຫຼັບຈັດ​ກອງປະຊຸມ​ນັດ​
ພິ​ເສດ​ຂຶ້ນເພື່ອ​ເລືອກ​ເອົາ​ຜູ້​ທີ່​ຈະ​ມາ​ຮັບ​ຕຳ​ແໜ່​ງ​ແທນ​ທ່ານ Wulff.