ເຢຍຣະມັນ ໄດ້ເນລະເທດ ຜູ້ສົມຮູ້ຮ່ວມຄິດຄົນນຶ່ງ ໃນການໂຈມຕີກໍ່ການຮ້າຍຢູ່
ສະຫະລັດ ເມື່ອວັນທີ 11 ກັນຍາ ປີ 2001 ກັບຄືນໄປຍັງບ້ານເກີດຂອງລາວ
ຢູ່ປະເທດໂມຣົກໂກ.
ທ້າວມູນຽກ ແອລ ໂມຕັສຊາເດ (Mounir al-Motassadeq) ໄດ້ຖືກຄຸກເກືອບ 15 ປີ
ທີ່ເຢຍຣະມັນ ກ່ອນທີ່ລາວຈະຖືກເນລະເທດ ໄປຍັງໂມຣົກໂກ ໃນມື້ວັນຈັນວານນີ້.
ສື່ມວນຊົນເຢຍຣະມັນ ໄດ້ນຳອອກເຜີຍແຜ່ຮູບຂອງທ້າວ ໂມຕັສຊາເດ ທີ່ປິດໜ້າ
ແລະຄຸມຕົວໂດຍຕຳຫຼວດຕິດອາວຸດ 2 ທ່ານ ໄປຍັງເຮືອບິນເຮລິຕອບເຕີ. ເຈົ້າໜ້າທີ່
ເຢຍຣະມັນ ໄດ້ຢືນຢັນວ່າ ຜູ້ກ່ຽວຈະຖືກສົ່ງຕົວໂດຍເຮືອບິນ ຈາກສະໜາມບິນນະຄອນ
ແຟຣັງເຟີຣ໌ດ ໃນແລງວັນຈັນວານນີ້.
ທ້າວ ໂມຕັສຊາເດ ໄດ້ຖືກພົບເຫັນວ່າ ມີຄວາມຜິດໃນຖານຊ່ອຍທ້າວ ໂມຮາເມັດ ອັຕຕາ
ຊຶ່ງເປັນນັກບິນທີ່ຖືກກ່າວວ່າ ແມ່ນນຶ່ງໃນພວກຈີ້ເຮືອບິນເມື່ອວັນ ທີ 11 ກັນຍານັ້ນ
ແລະນັກບິນສະຫຼະຊີບອື່ນໆທີ່ຊ່ວຍໃນການໂຈມຕີຢູ່ນະຄອນນິວຢອກ ແລະວໍຊີງຕັນ.
ພວກນັກບິນສະຫຼະຊີບ ແມ່ນພາກສ່ວນນຶ່ງຂອງກຸ່ມກໍ່ການຮ້າຍອາລກາອີດາ ທີ່ມີສຳນັກ
ງານທີ່ເມືອງແຮມເບີຣ໌ກ, ປະເທດເຢຍຣະມັນ ບ່ອນທີ່ທ້າວ ໂມຕັສຊາເດ ເຄີຍຢູ່ອາໄສນັ້ນ.
ທ້າວໂມຕັສຊາເດ ແມ່ນຖືກພົບເຫັນວ່າມີຄວາມຜິດ ໃນປີ 2003 ຍ້ອນການເປັນສະມາ
ຊິກຂອງກຸ່ມກໍ່ການຮ້າຍທີ່ຈັດຕັ້ງຂຶ້ນ ແລະເປັນຜູ້ຊ່ອຍໃນການສັງຫານພວກຜູ້ໂດຍສານ
ເທິງເຮືອບິນຂອງ 4 ສາຍການບິນ ທີ່ໃຊ້ ໃນການໂຈມຕີ ເມື່ອວັນທີ 11 ກັນຍາ. ການດຳ
ເນີນຄະດີຂອງລາວເປັນເວລາ 5 ປີ ໃນ ເຢຍຣະມັນນັ້ນ ແມ່ນພົວພັນກັບການ ຂໍອຸທອນ
ໃນຫຼາຍໆຮອບ ການຕ່າວປີ້ນໃນການຕັດສິນ ແລະການຢືນຢັນຄືນໃໝ່ຕໍ່ຄຳພິພາກສາ.
ໃນທີ່ສຸດລາວກໍໄດ້ ຮັບໂທດສູງສຸດ ໃນສານເຢຍຣະມັນ ໂດຍໃຫ້ຜູ້ກ່ຽວຕິດຄຸກເປັນ
ເວລາ 15 ປີ.
ທ້າວໂມຕັສຊາເດ ໄດ້ປະຕິເສດຕໍ່ການພົວພັນໃນການວາງແຜນໂຈມຕີເມື່ອວັນ ທີ 11
ກັນຍາ, ແຕ່ວ່າ ໄດ້ຍອມຮັບຜິດວ່ າເປັນໝູ່ຂອງພວກ ທີ່ໄດ້ກໍ່ການນັ້ນ. ລາວໄດ້ເວົ້າວ່າ
ການກະທຳຂອງລາວ ທີ່ສົ່ງເງິນ ໄປໃຫ້ ນັກບິນສະຫຼະຊີບນັ້ນ ແມ່ນການເອົາໃຈໝູ່
ຂອງລາວ.
ລາວແມ່ນຜູ້ທຳອິດ ທີ່ໄດ້ຮັບໂທດ ທີ່ພົວພັນກັບການໂຈມຕີ ເມື່ອວັນທີ 11 ກັນຍາ ທີ່ຍັງ
ຜົນໃຫ້ເກືອບ 3 ພັນຄົນ ໄດ້ເສຍຊີວິດ.
ທ້າວໂມຕັສຊາເດ ໄດ້ຖືກປ່ອຍ ບໍ່ດົນ ຫຼັງຈາກທີ່ໃຊ້ເວລາຢູ່ໃນຄຸກ ເປັນເວລາ 15 ປີ
ແລ້ວນັ້ນ ໂດຍທີ່ໄດ້ຕົກລົງ ໃຫ້ເນລະເທດ ໄປຍັງໂມອົກໂກ. ເຢຍຣະ ມັນ ກ່າວວ່າ ຕົນຈະ
ທຳການຈັບກຸມລາວອີກ ຖ້າຫາກວ່າລາວ ກັບຄືນໄປຍັງ ເຢຍຣະມັນ.
