ທ່ານ Robert Gates ລັດຖະມຸນຕີປ້ອງກັນປະເທດສະຫະລັດ ກ່າວວ່າ ສະຫະລັດຈະປະກອບສ່ວນໃນການຊ້ອມລົບກັບເກົາຫລີໃຕ້ ເພື່ອ ຕອບໂຕ້ຕໍ່ການເຄື່ອນໄຫວ ແບບເກາະຜິດທາງທະຫານຂອງເກົາຫລີເໜືອໃນຫວ່າງໄວໆຜ່ານມານີ້. ທ່ານປະກາດເລື້ອງນີ້ໃຫ້ຮູ້ໃນວັນເສົາຜ່ານມານີ້ ທ່ີກອງປະຊຸມສຸດຍອດວ່າດ້ວຍຄວາມປອດໄພຂອງເອເຊຍຂອງພວກລັດຖະມຸນຕີປ້ອງກັນປະເທດແລະເຈົ້າໜ້າທ່ີສືບລັບ ທ່ີສິງກະ ໂປ.
ໃນລະຫວ່າງທີ່ກ່າວປາໄສ ຕໍ່ກອງປະຊຸມສຸດຍອດດ້ານຄວາມປອດໄພຂອງເອເຊຍ ທ່ີສິງກະໂປນັ້ນ ທ່ານ Robert Gates ລັດຖະມຸນຕີປ້ອງກັນປະເທດສະຫະລັດ ໄດ້ກ່າວປະນາມອີກຄັ້ງນຶ່ງ ຕໍ່ການເຄື່ອນໄຫວທາງທະຫານແບບເກາະຜິດຂອງເກົາຫລີເໜືອ ໃນການຈົມກຳປັ່ນລົບເກົາຫລີໃຕ້ລຳນຶ່ງເມື່ອເດືອນມີນາຜ່ານມາ ຍັງຜົນໃຫ້ທະຫານເຮືອເກົາຫລີໃຕ້ 46 ຄົນເສຍຊີວິດ. ທ່ານ Gates ເວົ້າວ່າ ເຫດການດັ່ງ ກ່າວ ເປັນພາກສ່ວນນຶ່ງຂອງຄວາມປະພຶດແບບທ້າທາຍ ຂາດຄວາມລະມັດລະວັງ ໃນຂອບເຂດທີ່ກວ້າງໃຫຍ່ກ່ວານັ້ນ ຂອງເກົາຫລີເໜືອ ແລະວ່າເກົາຫລີເໜືອຍັງສືບຕໍ່ບ່ອນທຳລາຍສັນຕິພາບແລະຄວາມປອດໄພໃນເອເຊຍຢູ່ຕໍ່ມາ ຊຶ່ງທ່ານ Gates ກ່າວຕື່ມວ່າ :
“ເປັນເວລາໄລຍະນຶ່ງມາແລ້ວ ທີ່ເກົາຫລີເໜືອໄດ້ປະເຊີນກັບທາງເລືອກ ທີ່ຈະສືບຕໍ່ຕົກຢູ່ໃນສະພາບອົດຢາກຍາກຈົນ ເປັນປະເທດນອກຄອກ ໃນປະຊາຄົມນານາຊາດ ຫລື ວາງເສັ້ນທາງເດີນໃໝ່. ແຕ່ວ່າ ນັບຕັ້ງ ແຕ່ນັ້ນມາ ລັດຖະບານເກົາຫລີເໜືອ ກັບມີແຕ່ໂດດດ່ຽວຕົນເອງອອກ ຈາກປະຊາຄົມນານາຊາດ ຫລາຍຂຶ້ນນັບມື້.”
ເກົາຫລີເໜືອໄດ້ປະຕິເສດວ່າ ຕົນບໍ່ມີສ່ວນພົວພັນໃດໆໃນການໂຈມຕີກຳປັ່ນລົບຂອງເກົາຫລີໃຕ້ລຳນັ້ນ ແຕ່ຄະນະສອບສວນສືບສວນ ທີ່ປະກອບດ້ວຍເຈົ້າໜ້າທ່ີນາໆຊາດກຸ່ມນຶ່ງ ໄດ້ລົງຄວາມເຫັນວ່າ ເກົາ ຫລີເໜືອເປັນຜູ້ຮັບຜິດຊອບໃນເລື້ອງນີ້.
ທ່ານ Gates ໃຫ້ຄຳໝັ້ນສັນຍາວ່າ ສະຫະລັດຈະສືບຕໍ່ໃຫ້ການຊ່ອຍເຫລືອແກ່ເກົາຫລີໃຕ້ ຕໍ່ໄປ ແລະປະກາດວ່າທັງສອງປະເທດຈະດຳ ເນີນການຊ້ອມລົບຮ່ວມກັນ ເພື່ອເປັນການຕອບໂຕ້ຕໍ່ການຈົມກຳປັ່ນລົບຂອງເກົາຫລີໃຕ້ນັ້ນ. ແຕ່ບັນດາເຈົ້າໜ້າທ່ີທຳນຽບຫ້າແຈ ກໍຄືກະຊວງປ້ອງກັນປະເທດຂອງສະຫະລັດ ກ່າວວ່າ ການຊ້ອມລົບທີ່ເວົ້ານັ້ນ ອາດຈະບໍ່ມີຂຶ້ນຈົນກວ່າຈະເປັນທີ່ກະຈ່າງແຈ້ງວ່າ ສະຫະປະຊາຊາດຈະດຳເນີນການແບບໃດ ກ່ຽວກັບເລື້ອງນີ້. ທ່ານ Gates ກ່າວວ່າ ເຈດຕະນາຂອງການຊ້ອມລົບນີ້ ແມ່ນເພື່ອສະແດງໃຫ້ລັດຖະບານພຽງ ຢ້າງ ກໍຄືເກົາຫລີເໜືອເຫັນວ່າ ການບຸກລຸກຂອງຕົນຈະບໍ່ດຳເນີນໄປໄດ້ ໂດຍທ່ີບໍ່ມີການຍັບຍັ້ງຂັດຂວາງໃດໆ. ທ່ານ Gates ຊີ້ແຈງຕື່ມວ່າ:
“ນັບແຕ່ເກີດເຫດການການຈົມກຳປັ່ນ ໂຈນັນ ເປັນຕົ້ນມາ ສະຫະລັດ ສາທາລະນະລັດເກົາຫລີຫລືເກົາຫລີໃຕ້ ແລະປະເທດອື່ນໆ ກໍໄດ້ທຳ ການປຶກສາຫາລືກັນຢ່າງໃກ້ຊິດ. ລັດຖະບານຂອງຂ້າພະເຈົ້າໄດ້ສະເໜີ ໃຫ້ການສະໜັບສະໜູນຢ່າງເຕັມທີ່ແກ່ເກົາຫລີໃຕ້ ພັນທະມິດຂອງພວກເຮົາ ໃນຊ່ວງເວລາທີ່ຫຍຸ້ງຍາກນີ້. ພວກເຮົາຈະດຳເນີນການຊ້ອມລົບຮ່ວມກັນກັບເກົາຫລີໃຕ້ ແລະຈະສະໜັບສະໜູນການເຄື່ອນໄຫວຢູ່ໃນສະພາຄວາມໝັ້ນຄົງອົງການສະຫະປະຊາຊາດ. ໃນເວລາດຽວກັນ ພວກເຮົາກໍກຳລັງພິຈາລະນາຊັ່ງຊາເບິ່ງທາງເລືອກອື່ນໆຕື່ມອີກ ເພື່ອ ບັງຄັບໃຫ້ເກົາຫລີເໜືອຮັບຜິດຊອບກ່ຽວກັບເລື່ອງນີ້.”
ພ້ອມດຽວກັນ ລັດຖະມຸນຕີປ້ອງກັນປະເທດສະຫະລັດໄດ້ຮຽກຮ້ອງໄປຍັງປະເທດອື່ນໆໃນຂົງເຂດ ໃຫ້ທຳຄວາມກົດດັນຮ່ວມກັນຕໍ່ເກົາຫລີເໜືອ ເພື່ອໃຫ້ປ່ຽນແປງການປະພຶດປະຕິບັດແບບກໍ່ສົງຄາມຂອງຕົນນັ້ນ.
ນອກນັ້ນ ທ່ານ Gates ຍັງໄດ້ເວົ້າເຖິງເລື້ອງການຂາດຄວາມຮ່ວມໄມ້ຮ່ວມມືທາງທະຫານ ລະຫວ່າງສະຫະລັດກັບຈີນ ທ່ີເປັນພັນທະມິດທ່ີແຂງແຮງທີ່ສຸດຂອງເກົາຫລີເໜືອ. ຈີນໄດ້ຢຸດເຊົາການຮ່ວມມືດ້ານຍຸດທະສາດຕ່າງໆກັບສະຫະລັດ ຫລັງຈາກລັດຖະບານປະທານາທິບໍດີໂອບາມາ ຕັດສິນໃຈໃນເດືອນມັງກອນຜ່ານມາ ດຳເນີນໄປຕາມແຜນການຂາຍອາວຸດຍຸດໂທປະກອນ ມູນຄ່າ 6,400 ລ້ານດອນລາ ໃຫ້ໄຕ້ຫວັນ ຊຶ່ງທ່ານ Gates ກ່າວປ້ອງກັນການຂາຍອາວຸດນີ້ວ່າ ເປັນນະໂຍບາຍທ່ີມີມາຕັ້ງແຕ່ດົນນານແລ້ວ ແລະເປັນສິ່ງສຳຄັນທ່ີສຸດຕໍ່ຄວາມໝັ້ນຄົງຂອງຂົງເຂດ. ທ່ານ Gates ກ່າວຊີ້ແຈງວ່າ :
“ໄດ້ເປັນທີ່ແຈ້ງຂາວແກ່ທຸກໆຄົນແລ້ວວ່າ ໃນໄລຍະເວລາ 30 ກວ່າປີ ນັບຕັ້ງແຕ່ມີການຈັດຕັ້ງຄວາມສຳພັນແບບປົກກະຕິນຳກັນ ມາຈົນເທົ່າ ເຖິງປັດຈຸບັນນີ້ ການຂັດແຍ້ງກັນຫລາຍໆບັ້ນທີ່ໄດ້ເກີດຂຶໜແລະເຮັດໃຫ້ຄວາມສຳພັນທາງທະຫານຂອງພວກເຮົາກັບຈີນ ຢຸດສະງັກລົງນັ້ນ ຈະບໍ່ສົ່ງຜົນໃຫ້ມີການປ່ຽນແປງໃດໆ ໃນນະໂຍບາຍຂອງສະຫະລັດ ກ່ຽວກັບໄຕ້ຫວັນເລີຍ.”
ພ້ອມດຽວກັນ ທ່ານ Gates ຮຽກຮ້ອງໃຫ້ຈີນ ຮື້ຟື້ນການຮ່ວມໄມ້ຮ່ວມມືທາງທະຫານກັນຄືນອີກ ເພື່ອຫລຸດຜ່ອນຄວາມເຂົ້າໃຈຜິດແລະການຄາດການຜິດຊຶ່ງກັນແລະກັນນັ້ນ.
