ການຍອມຮັບຄວາມເປັນຜູ້ນຳໂລກຂອງສະຫະລັດແມ່ນສູງກວ່າຂອງຈີນ, ອີງຕາມການວິເຄາະຂອງບໍລິສັດທີ່ປຶກສາ ແລະ ວິເຄາະ ນາໆຊາດ Gallup ໃນວັນຈັນມື້ນີ້. ບົດລາຍງານກ່າວວ່າ ເຖິງແມ່ນວ່າຫຼາຍປະເທດຈະມີການສະໜັບສະໜູນ ການນຳພາຂອງສະຫະລັດຫຼາຍກວ່າ, ແຕ່ການສະໜັບສະໜູນທົ່ວໂລກຕໍ່ທັງ ສະຫະລັດ ແລະ ຈີນ ກໍໄດ້ຫຼຸດລົງໃນປີ 2023.
ບົດລາຍງານຍັງລະບຸວ່າ ເຖິງແມ່ນ ສະຫະລັດ ຈະເອົາຊະນະຈີນໃນການອະນຸມັດຜູ້ນຳໂລກ, ແຕ່ການສະໜັບສະໜູນຈະຜັນຜວນໂດຍຂຶ້ນຢູ່ກັບວ່າ ໃຜເປັນຜູ້ນຳ. ຂໍ້ມູນຂອງ Gallup ໃນຕະຫຼອດໄລຍະເກືອບ 20 ປີທີ່ຜ່ານມາ ສະແດງໃຫ້ເຫັນວ່າ ການນໍາພາຂອງພັກເດໂມແຄຣັດ ມີແນວໂນ້ມທີ່ຈະໃຫ້ຜົນຂອງການສະຫນັບສະຫນູນທົ່ວໂລກ ທີ່ສູງກວ່າການນໍາພາຂອງພັກຣີພັບບລີກັນ.
ຈາກການສຳຫຼວດ 133 ປະເທດ ໃນປີ 2023, ສະຫະລັດ ຍັງຮັກສາຄວາມໄດ້ປຽບ 81 ປະເທດ, ແລະ ຈີນ ໃນ 52 ປະເທດ. ສະຫະລັດ ໄດ້ປຽບຫຼາຍທີ່ສຸດໃນປະເທດໂກໂຊໂວ ໃນຂະນະທີ່ຈີນໄດ້ປຽບຫຼາຍທີ່ສຸດໃນ ຣັດເຊຍ.
Gallup ກ່າວໃນບົດລາຍງານວ່າ ການມີຄວາມໄດ້ປຽບໃນການອະນຸມັດການເປັນຜູ້ນໍາ ແມ່ນສໍາຄັນຕໍ່ຄວາມສາມາດຂອງປະເທດໃນການໃຊ້ອິດທິພົນ. “ການຖືເອົາປັດໃຈອື່ນໆຄົງທີ່, ມະຫາອໍານາດທີ່ມີຄວາມໄດ້ປຽບໃນການອະນຸມັດສຸດທິໃນປະເທດທີ່ຕົນມີຄວາມສົນໃຈ ອາດຈະມີໂອກາດທີ່ດີກວ່າ ທີ່ຈະບັນລຸຈຸດປະສົງຂອງຕົນ.”
ບົດລາຍງານຍັງໄດ້ກ່າວອີກວ່າ ຄະແນນການອະນຸມັດສຸດທິ “ສະໜອງຕົວແທນທີ່ເປັນປະໂຫຍດ ສໍາລັບອົງປະກອບທີ່ສໍາຄັນຂອງການໃຊ້ອິດທິພົນທີ່ນິ້ມນວນໃນລະດັບປະຊາກອນ.”
ເຖິງແມ່ນວ່າສະຫະລັດຈະມີຂໍ້ໄດ້ປຽບຢ່າງຈະແຈ້ງ, ການສະຫນັບສະຫນູນ ທັງຈີນ ແລະສະຫະລັດ ກໍຫຼຸດລົງ, ແລະ Gallup ກ່າວໃນບົດລາຍງານວ່າ ສິ່ງນີ້ “ຊີ້ໃຫ້ເຫັນເຖິງການຂາດຄວາມກະຕືລືລົ້ນທີ່ເພີ້ມຂຶ້ນ ສໍາລັບທັງສອງມະຫາອໍານາດໂລກເຫຼົ່ານີ້.”
ຟໍຣັມສະແດງຄວາມຄິດເຫັນ