ພວກຜູ້ນຳປະເທດທີ່ຈະເລີນອຸດສາຫະກຳແລະປະເທດພວກພັດທະນາ ທີ່ສຳຄັນໆຂອງໂລກໄດ້ຮັບຮອງເອົາແຜນການທີ່ຮຽກຮ້ອງໃຫ້ບັນດາປະເທດ ທີ່ຮັ່ງມີທີ່ສຸດຂອງໂລກ ຕັດການຂາດດຸນງົບປະມານລົງໃຫ້ໄດ້ ເຄິ່ງນຶ່ງພາຍໃນສາມປີຂ້າງໜ້ານີ້ ແລະໃຫ້ລົດຜ່ອນໜີ້ສິນລົງໃຫ້ໄດ້ສັດສ່ວນກັບຜົນ ຜະລິດດ້ານເສດຖະກິດ ພາຍໃນປີ 2016.
ທ່ານ Stephen Harper ນາຍົກລັດຖະມົນຕີການາດາ ໄດ້ປະກາດແຜນການດັ່ງກ່າວໃນຕອນປິດກອງ ປະຊຸມສຸດຍອດ ຈີ20 ເມື່ອວັນອາທິດວານນີ້ ທີ່ນະຄອນໂຕຣອນໂຕ.
ໃນການໃຫ້ສຳພາດຕໍ່ສື່ມວນຊົນນັ້ນ ປະທານາທິບໍດີສະຫະລັດ ທ່ານ ບາຣັກ ໂອບາມາ ກໍໄດ້ເຫັນດ້ວຍ ກັບເປົ້າໝາຍທີ່ຈະຕັດການຂາດດຸນງົບປະມານ ຂອງສະຫະລັດລົງໃຫ້ໄດ້ເຄິ່ງນຶ່ງພາຍໃນປີ 2013 ຊຶ່ງທ່ານ ກ່າວວ່າຕາຕະລາງເວລາສຳລັບແຜນການດັ່ງກ່າວນີ້ ແມ່ນສອດຄ່ອງກັບທ່າທີຂອງສະຫະລັດ. ແຕ່ທ່ານ ກ່າວຍ້ຳວ່າ ບູລິມະສິດກ່ອນອື່ນໝົດຂອງທ່ານ ກໍຄືການສ້າງໜ້າວຽກແລະການເຕີບໂຕດ້ານເສດຖະກິດ.
ທ່ານ ໂອບາມາ ໄດ້ສະແດງຄວາມເປັນຫ່ວງວ່າການຕັດການໃຊ້ຊ່າຍລົງຢ່າງໃຫຍ່ຫລວງເກີນໄປນັ້ນ ອາດຂັດຂວາງຕໍ່ການເຕີບໂຕຂອງເສດຖະກິດໄດ້.
ໃນຖະແຫລງການປິດກອງປະຊຸມສຸດຍອດນັ້ນ ບັນດາຜູ້ນຳກຸ່ມ ຈີ20 ໄດ້ເຕືອນວ່າ ຍັງມີສິ່ງທ້າທາຍ ອັນຮ້າຍແຮງຫລາຍຢ່າງຂວາງໜ້າການຟື້ນຕົວຄືນ ຂອງເສດຖະກິດໂລກນັ້ນຢູ່. ພວກຜູ້ນຳເຫລົ່ານັ້ນເວົ້າອີກວ່າ ການເຕີບໂຕດ້ານເສດຖະກິດກຳລັງຫວນຄືນມາ ແຕ່ການຟື້ນຕົວຍັງຖືວ່າ “ບໍ່ສະໝ່ຳສະເໝີ ແລະບໍ່ແຂງແຮງ” ແລະອັດຕາການວ່າງງານໃນຫລາຍໆປະເທດ ຍັງຢູ່ໃນລະດັບທີ່ຮັບເອົາບໍ່ໄດ້.
ພວກຜູ້ນຳ ຈີ20 ກ່າວອີກວ່າ ເພື່ອໃຫ້ການຟື້ນຕົວຄືນຍືນຍົງຖາວອນນັ້ນ ປະຊາຊາດທັງຫລາຍແມ່ນຈະ ຕ້ອງໄດ້ສືບຕໍ່ປະຕິບັດແຜນການກະຕຸກຊຸກຍູ້ ເສດຖະກິດທີ່ມີຢູ່ແລ້ວນັ້ນ ແລະປະຕິບັດງານເພື່ອສ້າງເງື່ອນ ໄຂຕ່າງໆສຳລັບຄວາມຮຽກຮ້ອງຕ້ອງການສິນຄ້າທີ່ເຂັ້ມແຂງຂອງພາກສ່ວນເອກກະຊົນ.
