ລິ້ງ ສຳຫລັບເຂົ້າຫາ

ຜູ້ນຳ ຂອງກຸ່ມ G20 ມ້ວນທ້າຍ ກອງປະຊຸມ ສຸດຍອດ ຢູ່ເມັກຊິໂກ (ວີດີໂອ)

  • ວັນນະສອນ​ ແກ້ວດາຣາ

ກອງປະຊຸມສຸດຍອດຂອງກຸ່ມຜູ້​ນໍາຂອງ​ບັນດາເສດຖະກິດ​ທີ່​ໃຫຍ່​ທີ່​ສຸດ​ຂອງໂລກ G20 ທີ່ Los Cabos, Mexico

​ປະທານາທິບໍດີ ບາຣັກ ​ໂອ​ບາ​ມາ ຈະ​ໃຊ້​ເວລາ​ມື້​ສຸດ​ທ້າຍ​ຂອງ​ກອງ​ປະຊຸມ​ສຸດ​ຍອດ G20 ​ທີ່​ເມັກ​ຊິໂກ ​ໃນ​ວັນ​ອັງຄານ​ມື້​ນີ້ ​ທໍາ​ການ​ໂອ້​ລົ​ມສົນ​ທະ​ນາ​ຕື່ມ​ອີກ ກັບບັນດາຄູ່​ຕໍາ​ແໜ່​ງຂອງ​ທ່ານ​ ກ່ຽວ​ກັບ​ບັນຫາ​ໜີ້​ສິນທີ່​ຍັງ​ແກ້​ໄຂ​ບໍ່​ໄດ້​ຂອງເຂດ ຢູ​ໂຣນັ້ນ.

​ພວກຜູ້​ນໍາຂອງ​ບັນດາເສດຖະກິດ​ທີ່​ໃຫຍ່​ທີ່​ສຸດ​ຂອງໂລກ​ ​ໄດ້ອອກ​ຖະ​ແຫລ​ງ​ການ​ຂັ້ນ​ຕົ້ນ​ໃນ​ວັນ​ຈັນ​ວານ​ນີ້​ ປະກາດ​ວ່າພວກ​ເຂົ້າ​ເຈົ້າ​ພ້ອມ​ແລ້ວ​ທີ່​ຈະ​ດໍາ​ເນີນ​ຄວາມ ​ພະຍາຍາມຢ່າງ​ມີ​ການ​ປະສານ​ງານ​ກັນ ​ເພື່ອ​ສົ່ງ​ເສີມ​ການ​ເຕີບ​ໂຕ​ຂອງເສດຖະກິດ. ທ່າ​ທີ​ດັ່ງກ່າວ​ນີ້ແມ່ນ​ຂັດ​ກັນ​ກັບ ຄວາມພະຍາຍາມ​ຂອງ​ຢູ​ໂຣບ​ໃນ​ການບັງ ຄັບໃຫ້ດໍາເນີນ​ມາດຕະການ​ປະຢັດ​ມັດທະຍັດ ໂດຍມີເຢຍລະ​ມັນເປັນ​ຜູ້​ນໍາ​ໜ້າ​ນັ້ນ ຊຶ່ງໄດ້​ພາ​ໃຫ້ພວກ​ປະ​ເທດ​ທີ່​ມີ​ໜີ້​ສິນ​ຖ້ວ​ມລົ້ນ ຢ່າງກຣີສ ມີ​ຄວາມ​ແຄ້ນ​ເຄືອງ​ທີ່ທາງ​ກຸງ​ເບີລິນ ບໍ່​ຍອມ​ທີ່ຜ່ອນຜັນ​ຂໍ້​ຈໍາກັດ​ຮັດ​ແຄບ​ຕໍ່​ການ​ໃຊ້​ຈ່າຍ ອັນ​ເປັນ​ເງື່ອນ​ໄຂ​ສໍາລັບແລກປ່ຽນກັບການຊ່ວຍ​ເຫລືອທາງ​ການ​ເງິນ​ນັ້ນ.

ທ່ານໂອ​ບາ​ມາ ​ໄດ້​ທໍາ​ການ​ສົນທະນາ​ຫາລືສອງ​ຝ່າຍ​ກັບນາຍົກລັດຖະມົນຕີ ເຢຍລະ​ມັນ ທ່ານ​ນາງ Angela Merkel ​ໃນ​ມື້ທໍາ​ອິດ​ຂອງ​ກອງ​ປະຊຸມ​ສຸດ​ຍອດ ​ໃນ​ວັນ​ຈັນ​ວານ​ນີ້ ​ໃນ​ຄວາມ​ພະຍາຍາມ​ເພື່ອ​ກົດ​ດັນໃຫ້ບັນດາລັດຖະບານ​ໃນ​ກຸ່ມ​ອີຢູ​ ດໍາ​ເນີນບາດກ້າວ​ທີ່​ກ້າຫານ​ກ່ວາ​ເກົ່າ ​ເພື່ອ​ແກ້ໄຂ​ວິ​ກິດ​ການ​ທີ່​ກໍາລັງຄຸກ​ຄາມ ​ເຂດ​ຢູ​ໂຣ ທີ່ປະກອບ​ດ້ວຍ 17 ປະ​ເທດ ທີ່​ໃຊ້​ເງິນຕາສະກຸນຢູໂຣນັ້ນ. ປະທາ ນາທິບໍດີສະຫະລັດ​ໄດ້ກ່າວໂທດ​ວິ​ກິດ​ການ​ໜີ້ສິນ​ຂອງເຂດຢູ​ໂຣ ວ່າ​ໄດ້ສົ່ງ​ຜົນ​ກະທົບ​ອັດຕາການຫວ່າງ​ງານທີ່​ຍັງ​ຢູ່ໃນ​ລະດັບ​ສູງ​ໃນ​ສະຫະລັດ​ນັ້ນ ຊຶ່ງ​ອາດ ​ສາມາດ ​ເປັນ​ອັນຕະລາຍ​ຕໍ່​ຄວາມ​ພະຍາຍາມ​ໃຫ້​ໄດ້​ຮັບ​ເລືອກ​ຕັ້ງ​ເປັນ​ປະທາ ນາທິບໍດີ ​ອີກ​ສະ​ໄໝ​ນຶ່ງ​ຂອງ​ທ່ານໃນ​ເດືອນ​ພະຈິກ​ໜ້າ​ນີ້.

​ປະທານາທິບໍດີ​ສະຫະລັດ​ມີ​ແຜນການ​ຈະ​ໂອ້​ລົມ​ສົນທະນາເປັນ​ການ​ສ່ວນ​ໂຕກັບ ທ່ານ ຫູ ຈິນ​ເຖົາ ປະທານ​ປະ​ເທດ​ຈີນ ​ໃນ​ວັນ​ອັງຄານ​ມື້​ນີ້ ກ່ອນເດີ​ນທາງ​ກັບ​ຄືນ​ສູ່​ວໍ​ຊິງ​ຕັນ.

XS
SM
MD
LG