ສະຫະລັດແລະເກົາຫລີໃຕ້ໄດ້ຕົກລົງກັນທີ່ຈະທຳການເຈລະຈາເລື່ອງການຄ້າເສລີກັນຄືນໃໝ່ ຫລັງຈາກທີ່ຢຸດຊະງັກມາດົນນານ ແລະເລື່ອນເວລາປະຕິບັດແຜນການສຳລັບໃຫ້ກຸງໂຊນເຂົ້າຄວບຄຸມການປະຕິບັດ ການດ້ານທະຫານຂອງຕົນໃນຍາມເສິກສົງຄາມນັ້ນອອກໄປ.
ຫລັງຈາກໄດ້ພົບປະກັນເມື່ອວັນເສົາວານນີ້ ກັບທ່ານ ລີ ມິອຸງ-ບັກ ປະທານາທິບໍດີເກົາຫລີໃຕ້ ທີ່ກອງ ປະຊຸມສຸດຍອດຂອງກຸ່ມ G20 ທີ່ນະຄອນ Toronto ປະເທດການາດາ ປະທານາທິບໍດີ ບາຣັກ ໂອບາມາ ກ່າວວ່າທ່ານຕ້ອງການຈະແກ້ໄຂບັນຫາຕ່າງໆທີ່ຍັງຄ້າງຄາຢູ່ ກ່ຽວກັບຂໍ້ຕົກລົງ ການຄ້າເສລີໃຫ້ແລ້ວ ກ່ອນກອງປະຊຸມສຸດຍອດ G20 ຄັ້ງຕໍ່ໄປ ໃນເດືອນພະຈິກ ແລະວ່າທ່ານຈະນຳສະເໜີຂໍ້ຕົກລົງຕໍ່ ສະພາຄອງແກຣສ ພາຍໃນສອງສາມເດືອນຫລັງຈາກນັ້ນ.
ນອກນີ້ແລ້ວ ຜູ້ນຳທັງສອງຍັງໄດ້ຕົກລົງກັນ ເລື່ອນເວລາໃນການໂອນ ການຄວບຄຸມກຳລັງທະຫານໃນຍາມເສິກສົງຄາມ ໃຫ້ເກົາຫລີໃຕ້ນັ້ນອອກໄປ ຈົນກວ່າປີ 2015 ເພື່ອສ້າງຄວາມເຂັ້ມແຂງແກ່ ແຜນການປ່ຽນແປງນັ້ນຂຶ້ນຕື່ມ.
