ບັນດາຜູ້ນຳຈາກປະເທດອຸສາຫະກຳທີ່ໃຫຍ່ທີ່ສຸດ ຈະພາກັນເພັ່ງເລັງໃສ່ຄວາມວຸ້ນວາຍທາງ
ດ້ານເສດຖະກິດໃນຢູໂຣບເວລາພວກທ່ານເລີ່ມຫາລືກັນອີກໃນວັນເສົາມື້ນີ້ໃນກອງປະຊຸມສຸດ
ຍອດທາງດ້ານເສດຖະກິດປະຈຳປີຂອງພວກທ່ານ.
ປະທານາທິບໍດີສະຫະລັດ ທ່ານບາຣັກ ໂອບາມາ ຈະກົດດັນໃຫ້ພວກຜູ້ນຳ ຂອງກຸ່ມ 8 ປະ
ເທດທີ່ຈະເລີນທາງດ້ານອຸສາຫະກຳຫຼືຈີ 8 ພິຈາລະນາກ່ຽວກັບແຜນການເຕີບໂຕ ໃນຂະນະ
ທີ່ພວກທ່ານສົນທະນາຫາລືກັນເພື່ອຊອກຫາຊ່ອງທາງແກ້ໄຂບັນຫາໜີ້ສິນທີ່ພວມເພີ່ມທະວີ
ຂຶ້ນ ທີ່ຂົ່ມຂູ່ຕໍ່ສະຖຽນລະພາບໃນເຂດທີ່ໃຊ້ເງິນຢູໂຣນັ້ນ.
ບັນຫາທາງດ້ານເສດຖະກິດທີ່ພົວພັນກັບກຸ່ມ 17 ປະເທດທີ່ໃຊ້ເງິນຕາສະກຸນດຽວກັນນັ້ນ
ອາດຈະມີຜົນກະທົບຕໍ່ປະເທດອື່ນໆ ຮວມທັງສະຫະລັດນຳດ້ວຍ.
ເປັນທີ່ຄາດກັນວ່າ ພວກຜູ້ນຳຂອງກຸ່ມຈີ 8 ທີ່ປະກອບດ້ວຍສະຫະລັດ ອັງກິດ ເຢຍຣະມັນ
ຝຣັ່ງ ອີຕາລີ ຍີ່ປຸ່ນ ການາດາແລະຣັດເຊຍ ຈະພາເພັ່ງເລັງໃສ່ກຣີສ ທີ່ມີໜີ້ສິນຖ້ວມຫົວ ຊຶ່ງ
ອາດຈະຢຸດເຊົາໃນການໃຊ້ເງິນຢູໂຣບເພື່ອຫຼົບຫຼີກບໍ່ຢາກປະຕິບັດຕາມມາດຕະການປະຢັດ
ມັດທະຍັດນັ້ນ.
ໃນກອງປະຊຸມຖະແຫຼງຂ່າວໃນມື້ວານນີ້ ປະທານກຳມາທິການຢູໂຣບທ່ານ Jose Manuel
Barroso ກ່າວວ່າ ມັນເປັນເລື່ອງສຳຄັນສຳຫຼັບກຣີສ ແລະປະເທດສະມາຊິກອື່ນໆທີ່ໃຊ້ເງິນ
ຢູໂຣ ທີ່ຈະຕ້ອງໃຫ້ການເຄົາລົບຕໍ່ຄວາມໝາຍ ໝັ້ນຕ່າງໆ.
ພວກຜູ້ນຳທີ່ເຂົ້າຮ່ວມກອງປະຊຸມສຸດຍອດ ຊຶ່ງໄດ້ໄປເຕົ້າໂຮມກັນທີ່ Camp David ບ່ອນ
ພັກຜ່ອນຂອງປະທານາທິບໍດີໃກ້ໆກຸງວໍຊິງຕັນ ໄດ້ຫາລືກັນ ກ່ຽວກັບຄວາມໝັ້ນຄົງຂອງ
ໂລກ ໃນລະຫວ່າງຮັບປະທານອາຫານຄໍ່າໃນມື້ວັນສຸກວານນີ້.
ເບິ່ງວີດີໂອກ່ຽວກັບກອງປະຊຸມທີ່ແຄມປ໌ເດວິດ ໃນວັນທີ 19 ພຶດສະພານີ້:
ພວກເຈົ້າໜ້າທີ່ກ່າວວ່າ ພວກທ່ານໄດ້ຕົກລົງກັນທີ່ຈະສືບຕໍ່ກົດດັນໃຫ້ອີຣ່ານ ເປີດເຜີຍໃຫ້
ຊາບຕື່ມກ່ຽວກັບໂຄງການນິວເຄລຍຂອງຕົນແລະຄວາມຈຳເປັນທີ່ຈະເພັ່ງເລັງໃສ່ການປ່ຽນ
ແປງທາງການເມືອງໃນຊີເຣຍ.
ພວກເຈົ້າໜ້າທີ່ເວົ້າວ່າ ບັນດາຜູ້ນຳຂອງກຸ່ມຈີ 8 ຍັງໄດ້ຫາລືກັນກ່ຽວກັບຄວາມວິຕົກກັງວົນ
ທີ່ວ່າເກົາຫຼີເໜືອອາດຈະທຳການທົດລອງອາວຸດນິວເຄລຍຄັ້ງໃໝ່.
ກອງປະຊຸມສຸດຍອດທີ່ Camp David ແມ່ນເປັນສ່ວນນຶ່ງໃນການເຄື່ອນໄຫວທາງດ້ານການ
ທູດເປັນເວລາສີ່ມື້ ຂອງປະທານາທິບໍດີໂອບາມາ ທີ່ຈະເດີນທາງໃນຕອນແລງຂອງວັນເສົາ
ມື້ນີ້ ໄປຮວມກອງປະຊຸມສຸດຍອດຂອງອົງການເນໂຕ້ ທີ່ນະຄອນ Chicago. ພວກເຈົ້າໜ້າ
ທີ່ເນໂຕ້ຈະເພັ່ງເລັງໃສ່ເລື່ອງສົງຄາມໃນອັຟການິສຖານ.