ບັນດາຜູ້ນຳໂລກໄດ້ໄປເຕົ້າໂຮມກັນທີ່ Toronto ປະເທດການາດາ ເພື່ອຮ່ວມໃນກອງປະຊຸມສຸດຍອດຂອງກຸ່ມ ຈີ-20 ຄືກຸ່ມ 8 ປະເທດຈະເລີນອຸສາຫະກຳ ບວກພວກປະເທດພວມພັດທະນາທີ່ໃຫຍ່ໆຂອງໂລກ ຫລືພວກເສດຖະກິດທີ່ກຳລັງໂຜ່ໂຕຂຶ້ນມາມີຄວາມສຳຄັນນັ້ນ ເພື່ອປຶກ ສາຫາລືກັນກ່ຽວກັບວ່າ ເຮັດແນວໃດຈຶ່ງຈະຮັກສາການຟື້ນໂຕຄືນຂອງເສດຖະກິດໂລກທີ່ບໍ່ແຂງແຮງນັ້ນ ໃຫ້ຍືນຍົງຕໍ່ໄປໄດ້.
ຖະແຫລງການທີ່ຮ່າງໄວ້ ສຳລັບອອກລຸນຫລັງກອງປະຊຸມໃນວັນອາ ທິດມື້ນີ້ ເວົ້າວ່າ ມາຮອດປັດຈຸບັນນີ້ ກຸ່ມ ຈີ-20 ແມ່ນໄດ້ຮັບໝາກຜົນ ດີຈາກການດຳເນີນຄວາມພະຍາຍາມຕ່າງໆຂອງພວກເຂົາເຈົ້າ ແຕ່ກໍ “ຍັງຄົງມີການທ້າທາຍທີ່ຮ້າຍແຮງຫລາຍຢ່າງຢູ່.”
ພວກຜູ້ນຳ ຈີ-20 ກ່າວວ່າ ການຟື້ນໂຕຄືນຂອງເສດຖະກິດໂລກຍັງ “ບໍ່ສະໝ່ຳສະເໝີແລະບອບບາງຢູ່” ໂດຍທີ່ອັດຕາວ່າງງານຢູ່ໃນຫລາຍ ຫລາຍປະເທດ ຍັງຢູ່ໃນລະດັບທີ່ຮັບເອົາບໍ່ໄດ້ ແລະວ່າ ຍັງມີຄວາມຈຳເປັນທີ່ຈະຕ້ອງໄດ້ທຳງານເພື່ອປະຕິຮູບພວກສະຖາບັນການເງິນຕ່າງໆອີກຢູ່.
ໃນວັນເສົາວານນີ້ ທ່ານ Timothy Geithner ລມຕ ການເງິນຂອງສະຫະລັດ ໄດ້ຮຽກຮ້ອງບັນດາຜູ້ນຳໂລກ ໃຫ້ຊອກຫາຄວາມສົມດຸນກັນທີ່ຖືກຕ້ອງ ໃນລະຫວ່າງການນຳໃຊ້ງົບປະມານກະຕຸກຊຸກຍູ້ເສດຖະກິດ ແລະການລຸດຜ່ອນການຂາດດຸນງົບປະມານນັ້ນ. ທ່ານກ່າວວ່າ ຍີ່ປຸ່ນ ແລະພວກປະເທດຢູໂຣບຈຳນວນນຶ່ງ ຕ້ອງໄດ້ເຮັດຫລາຍກ່ວາທີ່ໄດ້ ເຮັດມາແລ້ວ ເພື່ອຊຸກຍູ້ຄວາມຮຽກຮ້ອງຕ້ອງການສິນຄ້າຢູ່ພາຍໃນປະເທດ ແທນທີ່ຈະພຽງແຕ່ພະຍາຍາມຕັດງົບປະມານຂອງຕົນລົງ.
ສ່ວນປະທານາທິບໍດີໂອບາມາ ກັບພວກຜູ້ນຳຄົນອື່ນໆ ກ່າວວ່າພວກທ່ານມີຄວາມເປັນຫ່ວງວ່າ ການຕັດການໃຊ້ຈ່າຍຂອງລັດຖະບານລົງ ຫລາຍເກີນໄປນັ້ນ ອາດສາມາດຍັບຍັ້ງຂັດຂວາງການເຕີບໂຕຂອງ ເສດຖະກິດໄດ້.
