ທີ່ປະເທດເອກົວດໍ ພວກກູ້ໄພຍັງສືບຕໍ່ຊອກຄົ້ນຫາ ພວກທີ່ລອດຊີວິດມາໄດ້ ຢູ່ຕາມຊາກຫັກພັງຂອງແຜ່ນດິນໄຫວ ທີ່ມີຄວາມແຮງ 7.8 ໃນຂະນະທີ່ ພິທີສົ່ງສະການໃຫ້ແກ່ພວກ ເຄາະຮ້າຍຫລາຍກວ່າ 500 ຄົນເລີ້ມຂຶ້ນແລ້ວ.
ມີທ່າທາງວ່າຈຳນວນຜູ້ເສຍຊີວິດຄົງຈະເພີ້ມຂຶ້ນຕື່ມ ໂດຍທີ່ເຈົ້າໜ້າທີ່ບາງຄົນກ່າວວ່າ ມີຫຼາຍກວ່າ 1,700 ຄົນຍັງຫາຍສາບສູນມາໄດ້ 3 ມື້ແລ້ວຫຼັງຈາກໄດ້ເກີດແຜ່ນດິນໄຫວໃນຂັ້ນຕົ້ນ. ຮອງລັດຖະມົນຕີກະຊວງພາຍໃນ ກ່າວຕໍ່ບັນດານັກຂ່າວວ່າ ພວກເຮົາມີລາຍຊື່ 2,000 ຄົນ ທີ່ກຳລັງຊອກຫາ ແຕ່ມາຮອດປັດຈຸບັນນີ້ ມີແຕ່ 300 ຄົນເທົ່ານັ້ນ ໄດ້ຖືກຄົ້ນ ພົບ. ແຕ່ແນວໃດກໍຕາມກະຊວງປ້ອງກັນປະເທດເອກົວດໍ ກ່າວວ່າ ຈຳນວນຜູ້ຫາຍສາບສູນມີແຕ່ 231 ຄົນເທົ່ານັ້ນ.
ອີງຕາມການກະປະມານຂອງລັດຖະບານແລ້ວ ມີຜູ້ໄດ້ຮັບບາດເຈັບຫລາຍກວ່າ 4,600 ຄົນ.
ພວກກູ້ໄພແລະປະຊາຊົນ ຢູ່ເລາະຕາມແຄມຝັ່ງມະຫາສະມຸດປາຊີຟິກ ໄດ້ນຳໃຊ້ທຸກສິ່ງທຸກຢ່າງທີ່ຕົນມີນັບແຕ່ມືເປົ່າ ໝາສືບກິ່ນ ຕະຫລອດທັງອຸບປະກອນໜັກ ຂຸດຄົ້ນຢູ່ຕາມບ້ານເຮືອນແລະຫ້າງຮ້ານ ທີ່ຫັກພັງລົງມາ ແລະກໍຟັງສຽງຮ້ອງຂໍການຊ່ອຍເຫລືອ ທີ່ມາ ຈາກພາຍໃນ.
ມີການຊ່ອຍເອົາພວກທີ່ລອດຊີວິດມາໄດ້ຈຳນວນນຶ່ງອອກມາຈາກຊາກຫັກພັງ ແຕ່ເຈົ້າ ໜ້າທີ່ກ່າວວ່າ ການໂທລະສັບແລະສົ່ງຂໍ້ຄວາມ ຈາກພວກທີ່ຖືກຖົມ ຢູ່ຕາມຊາກຫັກພັງກຳລັງຄ່ອຍໆໝົດໄປ.
ປະທານາທິບໍດີສະຫະລັດ ທ່ານບາຣັກ ໂອບາມາ ໄດ້ໂທລະສັບໄປໂອ້ລົມກັບປະທານາ ທິບໍດີເອກົວດໍ ທ່ານ Rafael Correa ເພື່ອສະແດງຄວາມເສົ້າສະຫລົດໃຈຂອງຊາວອາເມຣິກັນ ກັບພວກທີ່ເສຍຊີວິດຍ້ອນໄພແຜ່ນດິນໄຫວ. ທ່ານໄດ້ໃຫ້ການຄ້ຳປະກັນແກ່ປະ ທານາທິບໍດີ Correa ວ່າ ສະຫະລັດຈະດຳເນີນການທຸກສິ່ງຢ່າງທີ່ຕົນສາມາດເພື່ອຊ່ອຍເອກົວດໍກັບຄືນສູ່ສະພາບເດີມ.