ຄວາມຮຸນແຮງທີ່ເກີດຂຶ້ນພາຍໃນ 24 ຊົ່ວໂມງ ຢູ່ລີເບຍ ໄດ້ສົ່ງຜົນໃຫ້ 61 ຄົນເສຍຊີວິດ ເຮັດໃຫ້ຈຳນວນຄົນຕາຍ ເພີ້ມຂຶ້ນເປັນເກືອບຮອດ 150 ຄົນແລ້ວ ໃນການປະທະກັນ ໃນລະຍະ 2 ອາທິດທີ່ຜ່ານມາ ໃນປະເທດທີ່ຕັ້ງຢູ່ໃນພາກເໜືອຂອງອາຟຣິກາ ແຫ່ງນີ້.
ໄດ້ມີການປະເມີນວ່າ 38 ຄົນຖືກຂ້າຕາຍໃນເມືອງ Benghazi ຢູ່ພາກຕາເວັນອອກ ບ່ອນທີ່ກອງກຳລັງລັດຖະບານລີເບຍ ປະທະກັນກັບ ພວກຫົວຮຸນແຮງອິສລາມຕິດອາວຸດ ໃນວັນເສົາແລະວັນອາທິດວານນີ້.
ແລະມີຄົນງານຊາວອີຈິບຫຼາຍຄົນ ລວມຢູ່ໃນຈຳນວນ 23 ຄົນທີ່ເສຍຊີວິດ ໃນນະຄອນຫລວງ Tripoli ຂອງລີເບຍ ບ່ອນທີ່ການຕໍ່ສູ້ກັນລະຫວ່າງກຸ່ມທະຫານບ້ານທີ່ເປັນປໍລະປັກກັນ ກຳລັງເຂົ້າສູ່ອາທິດທີ 3.
ເກືອບຮອດ 100 ຄົນໄດ້ເສຍຊີວິດ ໃນການປະທະກັນຢ່າງ
ຕໍ່ເນື່ອງ ຢູ່ທີ່ເດີ່ນບິນຂອງ Tripoli ແຫ່ງດຽວເທົ່ານັ້ນ ຕັ້ງແຕ່
ຕົ້ນເດືອນກໍລະກົດ ໃນຂະນະທີ່ກອງກຳລັງລັດຖະບານ ດິ້ນຮົນ
ຕໍ່ສູ້ເພື່ອຄວບຄຸມ ການທະວີຂຶ້ນຢ່າງຮ້າຍແຮງທີ່ສຸດ ໃນຄວາມ
ຮຸນແຮງ ທີ່ລີເບຍໄດ້ປະສົບພົບພໍ້ມາ ນັບແຕ່ສົງຄາມປີ 2011
ທີ່ໄດ້ໂຄນລົ້ມຜູ້ນຳຜະເດັດການ Moammar Gadhafi ນັ້ນ.
ຂະບວນລົດຂອງສະຖານທູດອັງກິດ ທີ່ມຸ້ງໜ້າໄປຫາຊາຍແດນ
ຕິດກັບປະເທດຕູນີເຊຍ ໄດ້ຖືກລະດົມຍິງໃສ່ໃນວັນອາທິດ
ວານນີ້ ໃນການພະຍາຍາມຈີ້ເອົາລົດ ຢູ່ນອກນະຄອນຫລວງ
Tripoli. ບໍ່ມີຜູ້ໃດໄດ້ຮັບບາດເຈັບ.
ສະຫະລັດ ສະຫະປະຊາຊາດ ແລະເທີກີ ໄດ້ຍົກຍ້າຍພະນັກງານການທູດຂອງພວກຕົນ ອອກຈາກລີເບຍ ໃນຂະນະທີ່ຄວາມຮຸນແຮງເພີ້ມຂຶ້ນເລີ້ອຍໆ.
ອີຈິບ ຝຣັ່ງ ເຢຍຣະມັນ ອິນໂດເນເຊຍ ແລະສະເປນ ໄດ້ຮ່ວມກັບປະເທດອື້ນໆ ລວມທັງ ອັງກິດ ເທີກີ ແລະ ສະຫະລັດ ໃນການປະກາດແນະນຳໃຫ້ພົນລະເມືອງຂອງຕົນໃນລີເບຍ ເດີນທາງອອກໄປໂດຍທັນທີ.
