ຫົວໜ້າສູງສຸດຂອງກຸ່ມກໍ່ການຮ້າຍລັດອິສລາມ ຢູ່ໃນອັຟການິສຖານອາດຈະເສຍຊີວິດ
ແລ້ວ ຍ້ອນຖືກສະຫະລັດ ແລະອັຟການິສຖານແນເປົ້າໝາຍໃສ່ໃນໄລຍະທໍາມີການ
ຖະຫລົ່ມຢູ່ໃນຖໍ້າແລະເຂດອຸບໂມງແຫ່ງນຶ່ງ ທີ່ໄດ້ເຮັດໃຫ້ທະຫານຂອງກຳລັງປະຕິບັດ
ງານພິເສດ ຂອງສະຫະລັດ ສອງຄົນເສຍຊີວິດນັ້ນ.
ບັນດາເຈົ້າໜ້າທີ່ທຳນຽບຫ້າແຈກ່າວໃນວັນສຸກວານນີ້ວ່າ ເຂົາເຈົ້າສົງໄສ ທ້າວ Abdul
Hasib ຜູ້ນຳແຂວງ Khorasan ຂອງກຸ່ມ IS ໄດ້ຖືກສັງຫານຢູ່ໃນໄລຍະທີ່ມີການຍິງສູ້
ກັນ ຢ່າງຮຸນແຮງເປັນເວລາສາມຊົ່ວໂມງ ຢູ່ໃນຮ່ອມພູ Momand ໃນເມືອງ Achin
ຂອງແຂວງ Nangarhar ຂອງອັຟການິສຖານ.
ບັນດາເຈົ້າໜ້າທີ່ກ່າວວ່າ ພວກນັກລົບກຸ່ມ IS ອີກ 35 ຄົນໄດ້ເສຍຊີວິດ ແລະກ່າວວ່າ
ເຂົາເຈົ້າກຳລັງສືບສວນເຖິງການຕາຍຂອງທະຫານສະຫະລັດ ທີ່ອາດເປັນໄປວ່າຍ້ອນ
ເປັນຜູ້ເຄາະຮ້າຍຂອງການຍິງໃສ່ຝ່າຍດຽວກັນ.
ຮ້ອຍເອກ Jeff Davis ໂຄສົກທຳນຽບຫ້າແຈ ໄດ້ກ່າວຕໍ່ບັນດານັກຂ່າວວ່າ “ນີ້ິໄດ້ເປັນ
ການປະຕິບັດງານທີ່ເປັນອັນຕະລາຍ ແລະພວກເຮົາຮູ້ວ່າມັນມີກໍລະນີນີ້ເກີດຂຶ້ນຢູ່.
ພວກເຮົາຮູ້ວ່າ ທ້າວ Hasib ໄດ້ຖືກປົກປ້ອງຢ່າງດີ ແລະເຂົາເຈົ້າຈະສູ້ລົບຢ່າງໜັກ
ເພື່ອປ້ອງກັນບໍ່ໃຫ້ລາວຖືກຈັບກຸມ ຫລືຖືກສັງຫານ. ແລະອັນນັ້ນທີ່ຈິງແລ້ວ ແມ່ນສິ່ງທີ່
ເກີດຂຶ້ນແທ້ໆ.”
ການປະຕິບັດງານເພື່ອຈັບກຸມ ຫລືສັງຫານທ້າວ Hasib ໄດ້ເລີ້ມຂຶ້ນຕອນ 10:30 ກາງ
ຄືນ ວັນພຸດຜ່ານມາ ຕາມເວລາໃນທ້ອງຖິ່ນ ໃນຂະນະທີ່ທະຫານລາດຕະເວນຂອງກອງ
ທັບບົກ ສະຫະລັດ 50 ຄົນ ແລະນັກລົບໜ່ວຍກ້າຕາຍຂອງອັຟການິສຖານ 40 ຄົນ ໄດ້
ຂີ່ຍົນເຮລິ ຄອບເຕີຟປເຖິງ ເຂດຄຸ້ມບ່ອນຢູ່ຂອງກຸ່ມລັດອິສລາມ ທີ່ມີກໍາລັງປ້ອງກັນອັນ
ແໜ້ນແກ່ນ.
