ກຸ່ມກະບົດ ໃນຄອງໂກ ຍຶດໄດ້ ອີກເມືອງນຶ່ງ

​ເຮືອບິນ​ເຮ​ລິ​ຄອບ​ເຕີ​ ຂອງ​ສະຫະ​ປະຊາ​ຊາດຫຼາຍລໍາ ບໍ່​ສາມາດ​ທີ່​ຈະ​ສະ ກັດ​ກັ້ນ​ພວກ​ກະບົດ​ບໍ່​ໃຫ້ເຂົ້າຢຶດອີກຫົວເມືອງ​ນຶ່ງ ໃນ​ເຂດ​ພາກ​ຕາ​ເວັນ​ອອກຂອງສາທາລະນະລັດ​ປະຊາທິປະ​ໄຕ​ຄອງ​ໂກ.

​ໂຄສົກ​ສະຫະ​ປະຊາ​ຊາດ ​ເວົ້າ​ວ່າ ພວກ​ກະບົດ​ຈາກ​ກຸ່ມ M23 ​ໄດ້​ສູ້​ລົບ​ກັບ​ກອງທັບລັດ ຖະບານ​ເມື່ອ​ວັນ​ເສົາ​ວາ​ນນີ້ ​ແລະເຂົ້າ​ຍຶດເອົາເມືອງ Kibumba ທີ່ຕັ້ງປະມານ 30 ກິ​ໂລ​ແມັດຫ່າງ​ຈາກ​ເມືອງ Goma ​ໄປ​ທາງ​ທິດ​ເໜືອ ຊຶ່ງ​ເປັນ​ເມືອງຫຼວງຂອງ​ແຂວງ North Kivu ທີ່​ບໍ່​ມີ​ຄວາມ​ສະ​ຫງົບສຸກ​ນັ້ນ.

ພົນລະ​ເຮືອນຫຼາຍພັນ​ຄົນ​ພາກັນຫຼົບໜີ​ຈາກ​ເຂດ​ດັ່ງກ່າວ ທ່າມກາງ​ຄວາມ ​ເປັນ​ຫ່ວງ​ວ່າ ພວກ​ກະບົດ​ອາດ​ພະຍາຍາມ​ຍຶດ​ເອົາ​ເມືອງ Goma ນຳດ້ວຍ .

​ການ​ສູ້​ລົບ​ກັນ​ຄືນ​ອີກ​ລະຫວ່າງພວກ​ກະບົດ ​ແລະທະຫານ​ຂອງ​ລັດຖະບານ ຄອງ​ໂກ ​ແມ່ນ​ໄດ້​ລະ​ເບີດ​ຂຶ້ນ​ເມື່ອ​ວັນ​ພະຫັດ​ຜ່ານ​ມາ ​ໂດຍ​ທີ່​ທັງ​ສອງ​ຝ່າຍຕ່າງ​ກໍຖິ້ມ​ໂທດ​ໃສ່​ກັນ​ແລະ​ກັນ​ວ່າ​ເປັນ​ຜູ້​ເລີ່​ມກໍ່​ເຫດຂຶ້ນ​ກ່ອນ.

ກຳລັງ​ຮັກສາ​ສັນຕິພາບ ຂອງ​ອົງການ​ສະຫະ​ປະຊາ​ຊາດ ທີ່​ເອີ້ນຫຍໍ້​ວ່າ​ MONUSCO ນັ້ນ ​ເວົ້າ​ວ່າ ກຸ່ມ M23 ​ໄດ້​ທໍາ​ການບຸກ​ໂຈມ​ຕີ​ດ້ວຍ​ອາວຸດ​ໜັກ ​ເມື່ອ​ຕອນ​ເຊົ້າວັນ​ເສົາ​ວານ​ນີ້ ​ແຕ່​ທ່ານ​ກໍ​ບໍ່​ໄດ້​ຢືນ​ຢັນ ການ​ກ່າວ​ຫາ​ຂອງ​ລັດຖະບານ​ຄອງ​ໂກ​ທີ່​ວ່າ​ ມີຊາວ Rwanda ຫຼາຍພັນ​ຄົນ​ໄດ້​ເຂົ້າ​ໄປ​ໃນ​ດິນ​ແດນ​ຄອງ​ໂກ​ ​ເພື່ອ​ສະໜັບສະ​ໜຸນ​ພວກ​ກະບົດ.

​ໂຄສົກ​ກຳລັງຮັກສາ​ສັນຕິພາບ​ສະຫະ​ປະຊາ​ຊາດ ​ເວົ້າ​ວ່າ ທ່ານ ພັນ ຄີມູນ ​ເລຂາທິການ​ໃຫຍ່​ອົງການ​ສະຫະ​ປະຊາ​ຊາດ ​ໄດ້​ເວົ້າ​ກັບ​ປະທາ ນາທິບໍດີ Rwanda ທ່ານ Paul Kagame ​ຮຽກຮ້ອງ​ໃຫ້​ທ່ານ​ໃຊ້​ອິດ​ທິພົນຂອງ​ທ່ານ​ຕໍ່​ກຸ່ມ M23 ​ເພື່ອ​ໃຫ້​ສະຖານະ​ການ​ສະຫງົບ​ລົງ.