ປະທານາທິບໍດີຝຣັ່ງ ທ່ານ Francois Hollande ຮຽກຮ້ອງໃຫ້
ສະຫະປະຊາຊາດ ສະໜອງການສະໜັບສະໜຸນ “ເປັນກໍລະນີ
ພິເສດ” ສຳຫລັບລີເບຍ ເພື່ອຊ່ວຍເຫຼືອບັນດາເຈົ້າໜ້າທີ່ ໃນ
ການຟື້ນຟູຄວາມເປັນລະບຽບຂອງປະເທດທີ່ໄດ້ແຕກຫັກລົງ
ຍ້ອນການສູ້ລົບຂອງພວກ ທະຫານບ້ານ ແລະການຊິງດີຊິງເດັ່ນ
ທາງການເມືອງ ໃນປະເທດດັ່ງກ່າວ.
ທ່ານ Hollande ກ່າວໃນວັນພະຫັດມື້ນີ້ ຢູ່ນະຄອນຫລວງປາຣີ
ວ່າ ການທີ່ບໍ່ເອົາມາດຕະການຫຍັງເລີຍນັ້ນອາດນຳໄປສູ່ການ
ແພ່ລາມຂອງການກໍ່ການຮ້າຍໄດ້.
ການໃຫ້ຄຳເຫັນຂອງທ່ານ Hollande ມີຂຶ້ນນຶ່ງມື້ ຫຼັງຈາກຜູ້ແທນພິເສດປະຈຳສະຫະ
ປະຊາຊາດຂອງລີເບຍ ທ່ານ Tarek Mitri ໄດ້ເຕືອນສະພາຄວາມໝັ້ນຄົງ ວ່າ ສະຖາ
ນະການໃນລີເບຍນັ້ນ “ອາດນຳໄປສູ່ສົງຄາມກາງເມືອງຢ່າງເຕັມອັດຕາ.”
ທ່ານ Hollande ກ່າວຕື່ມວ່າ “ໄພຂົ່ມຂູ່ ຈາກການແພ່ຜາຍຂອງກຸ່ມກໍ່ການຮ້າຍນັ້ນ
ແມ່ນເປັນຄວາມເປັນຈິງ. ການມີໜ້າ ແລະ ກິດຈະກຳຕ່າງໆຂອງພວກເຂົາ ຢູ່ໃນ
ຫົວເມືອງຕ່າງໆຂອງລີເບຍ ແມ່ນເປັນທີ່ຮູ້ ກັນຂອງໝົດທຸກຄົນຢູ່ແລ້ວ. ດຽວນີ້
ສະຖານະການ ດ້ານຄວາມປອດໄພທີ່ວຸ້ນວາຍ ແລະຄວາມສາມາດໃນຂອບເຂດ
ຈຳກັດຂອງລັດຖະບານ ເພື່ອຮັບມືກັບໄພຂົ່ມຂູ່ນັ້ນ ອາດຈະເຮັດໃຫ້ເປັນບ່ອນທີ່
ມີໄພອັນຕະລາຍເພີ້ມຂຶ້ນ ຢູ່ໃນລີເບຍເອງ ແລະຕໍ່ປະເທດອື່ນໆອີກດ້ວຍ.”
ລີເບຍໄດ້ປະສົບກັບຄວາມໂກລາຫົນວຸ້ນວາຍມາຕັ້ງແຕ່ ປີ 2011 ຫຼັງຈາກ ຈອມພະເດັດການ Moammar Gadhafi ໄດ້ຖືກໂຄ່ນລົ້ມ.
ກຸ່ມພວກຫົວຮຸນແຮງອິສລາມຕິດອາວຸດຫຼາຍໆກຸ່ມ ກຳລັງຊ່ວງຊິງຍາດ ແຍ່ງອຳນາດ ດ້ວຍ ຄວາມໂຮດຮ້າຍປ່າເຖື່ອນ ໂດຍການຕັ້ງສະພາແຂ່ງກັນ ເລືອກເອົານາຍົກລັດຖະມົນຕີ ແຂ່ງກັນ ແລະ ລັດຖະບານກາງຊົ່ວຄາວ ພວມດີ້ນຮົນຕໍ່ສູ້ຫາທາງຈັດຕັ້ງ ການຮັກສາຄວາມປອດໄພ.
