ຕຳຫຼວດຝຣັ່ງ, ໃນວັນສຸກມື້ນີ້ ໄດ້ຍິງຜູ້ຊາຍທີ່ພົກພາອາວຸດຄົນນຶ່ງເສຍຊີວິດ ຜູ້ທີ່ພະຍາຍາມຈະຈູດໂບດສາສະໜາຢິວໃນເມືອງ ຣູອັງ ທາງພາກເໜືອຂອງປະເທດ.
ລັດຖະມົນຕີກະຊວງພາຍໃນທ່ານ ເຈໂຣລ໌ ດາກມາແນັງ ໄດ້ຂຽນຂໍ້ຄວາມໃນ X, ແຕ່ກ່ອນແມ່ນ Twitter ວ່າ “ຕຳຫຼວດແຫ່ງຊາດ ຣູອັງ ໄດ້ສະກັດກັ້ນຜູ້ຊາຍທີ່ພົກພາມີດ ແລະ ທ່ອນເຫຼັກຄົນນຶ່ງຜູ້ ທີ່ເຫັນໄດ້ເວຊັດວ່າ ຢາກຈູດໂບດສາສະໜາຢິວຂອງເມືອງ.”
ຕຳຫຼວດໄດ້ຕອບສະໜອງຕໍ່ລາຍງານໃນເວລາ 6:45 ຕອນເຊົ້າ ກ່ຽວກັບ “ໄຟໄໝ້ຢູ່ໃກ້ໂບດສາສະໜາຢິວ,” ແຫຼ່ງຂ່າວຕຳຫຼວດໄດ້ກ່າວ.
ແຫຼ່ງຂ່າວທີ່ໃກ້ຊິດກັບກໍລະນີດັ່ງກ່າວບອກອົງການຂ່າວ AFP ວ່າ ຜູ້ຊາຍຄົນນັ້ນ “ມີມີດ ແລະ ທ່ອນເຫຼັກ, ເຊິ່ງລາວໄດ້ເຂົ້າໄປໃກ້ຕຳຫຼວດ, ຜູ້ທີ່ໄດ້ຍິງປືນໃສ່ລາວ. ສົ່ງຜົນໃຫ້ບຸກຄົນດັ່ງກ່າວນັ້ນໄດ້ເສຍຊີວິດ.”
ເຈົ້າຄອງເມືອງ ຣູອັງ ທ່ານ ນິໂຄລາ ມາແຢຣ໌-ໂຣຊີຍອລ໌ ໄດ້ຂຽນໃນ X ວ່າ “ມັນບໍ່ແມ່ນພຽງແຕ່ຊຸມຊົນຊາວ ຢິວ ເທົ່ານັ້ນທີ່ໄດ້ຮັບຜົນກະທົບ. ມັນແມ່ນທົ່ວເມືອງ ຣູອັງ ທີ່ເຈັບຊ້ຳ ແລະ ຕົກໃຈ.”
ທ່ານໄດ້ໃຫ້ຄວາມກະຈ່າງແຈ້ງວ່າ ບໍ່ມີຜູ້ເຄາະຮ້າຍຄົນອື່ນໆ ນອກຈາກຜູ້ໂຈມຕີ.
ການສືບສວນສອບສວນແຍກກັນສອງດ້ານໄດ້ໄຂຂຶ້ນ, ອັນນຶ່ງແມ່ນ ກ່ຽວກັບ ໄຟໄໝ້ຢູ່ໂບດສາສະໜາຢິວ ແລະ ອີກອັນນຶ່ງ ກ່ຽວກັບກໍລະນີການຕາຍຂອງບຸກຄົນທີ່ຖືກຍິງເສຍຊີວິດໂດຍຕຳຫຼວດ, ບັນດາໄອຍະການເມືອງ ຣູອັງ ໄດ້ກ່າວ.
ການສືບສວນໂດຍເຈົ້າໜ້າທີ່ສືບສວນສອບສວນຂອງຕຳຫຼວດຝຣັ່ງໂດຍອັດຕະໂນມັດ ໃນເວລາໃດກໍຕາມທີ່ມີຄົນຖືກຂ້າຕາຍໂດຍເຈົ້າໜ້າທີ່ຕຳຫຼວດ.
ຜູ້ຊາຍດັ່ງກ່າວໄດ້ຂົ່ມຂູ່ເຈົ້າໜ້າທີ່ຕຳຫຼວດດ້ວຍມີດ ແລະ ຕໍາຫຼວດກໍໄດ້ໃຊ້ອາວຸດໃນໜ້າທີ່ຂອງລາວ, ອີງຕາມການກ່າວຂອງໄອຍະການເມືອງ ຣູອັງ.
ຜູ້ຊາຍທີ່ເສຍຊີວິດແມ່ນບໍ່ໄດ້ຖືກລະບຸຕົວໃນທັນທີ, ອີງຕາມການກ່າວຂອງແຫຼ່ງຂ່າວຕຳຫຼວດ.
ຟໍຣັມສະແດງຄວາມຄິດເຫັນ