ກ່ອງດຳ Black box ຫລືກ່ອງບັນທຶກຂໍ້ມູນການບິນ 2 ກ່ອງ
ຈາກ ຖ້ຽວບິນຂອງສາຍການບິນ Air Algerie ທີ່ໄດ້ຕົກລົງ
ຢູ່ໃນປະເທດ ມາລີ ອາທິດແລ້ວນີ້ ເຮັດໃຫ້ທັງໝົດ 118 ຄົນ
ໃນເຮືອບິນເສຍຊີວິດນັ້ນ ໄດ້ຖືກສົ່ງໄປຮອດນະຄອນຫລວງ
ປາຣີ ໃນວັນຈັນວານນີ້ ໃນຂະນະທີ່ຝຣັ່ງເອົາບົດບາດນຳພາ
ໃນການສືບສວນສອບສວນ.
ລັດຖະມົນຕີຂົນສົ່ງຝຣັ່ງ ກ່າວວ່າ ການກວດສອບຂໍ້ມູນຂອງ
ຖ້ຽວບິນດັ່ງກ່າວ ອາດສາມາດໃຊ້ເວລາ “ຫຼາຍອາທິດ.”
ທຸງຊາດໃນທົ່ວປະເທດ ໄດ້ຖືກລົດລົງມາຢູ່ເຄິ່ງເສົາ ໃນວັນ
ຈັນວານນີ້ ໃນຂະນະທີ່ປະເທດຝຣັ່ງເລີ້ມຕົ້ນໄວ້ອາໄລເປັນເວລາ 3 ມື້ ແກ່ຜູ້ໄດ້ຮັບເຄາະ
ຮ້າຍໃນຄັ້ງນີ້ ຊຶ່ງຮວມທັງ ພົນລະເມືອງຝຣັ່ງ 54 ຄົນ.
ຕອນສຸດທ້າຍທີ່ມີການສື່ສານກັບ ຖ້ຽວບິນ MD-83 ແມ່ນ
ຕອນທີ່ນັກບິນ ຂໍ “ຕ່າວຄືນ ເມືອ” ໃນຂະນະທີ່ກຳລັງບິນ
ຈາກ Burkina Faso ໄປຫາ Algeria. ພາຍຸດິນຊາຍໃນ
ພື້ນທີ່ ອາດໄດ້ມີສ່ວນເຮັດໃຫ້ຍົນຕົກ ແຕ່ບໍ່ມີການຢັ້ງຢືນ
ຢ່າງເປັນທາງການຕໍ່ເຫດຜົນໃດໆ.
ຝຣັ່ງ ໄດ້ສົ່ງຜູ້ຊ່ຽວຊານດ້ານເຮືອບິນຕົກ ຈຳນວນນຶ່ງ ແລະ
ຕຳຫລວດ 20 ຄົນ ໄປຍັງບ່ອນເຮືອບິນຕົກ ໃນເຂດແຫ້ງແລ້ງ
ຂອງປະເທດມາລີ ເພື່ອລະບຸຊື່ສຽງຂອງພວກເຄາະຮ້າຍ ແລະ
ລົງຄວາມເຫັນກ່ຽວກັບສາເຫດຂອງເຮືອບິນຕົກ.
ອຸບັດເຫດຄັ້ງ ນີ້ ແມ່ນເປັນໂສກນາດຕະກຳທັງອາກາດຄັ້ງ
ຮ້າຍແຮງທີ່ສຸດ ທີ່ຝຣັ່ງໄດ້ປະສົບມາ ນັບຕັ້ງແຕ່ເຮືອບິນ airbus A300 ຂອງສາຍການບິນ
Air France ຕົກລົງສູ່ທະເລ ໃນລະຫວ່າງຖ້ຽວບິນ ຈາກ Rio de Jeneiro ຫານະຄອນ
ຫລວງປາຣີ ໃນເດືອນມິຖຸນາ ປີ 2009.
