ຝຣັ່ງ ກຳລັງປະເຊີນກັບການປ່ຽນແປງໄປທາງຂວາ, ຊຶ່ງລວມເຖິງຄຳສັນຍາຕ່າງໆ ກ່ຽວກັບ ນະໂຍບາຍການຍົກຍ້າຍຖິ່ນຖານທີ່ເຂັ້ມງວດຂຶ້ນ, ພາຍໃຕ້ລັດຖະບານໃໝ່ຂອງນາຍົກລັດຖະມົນຕີຫົວອະນຸລັກນິຍົມ ທ່ານ ມິແຊລ ບາກເນຍ. ການຄວບຄຸມການຂາດດຸນງົບປະມານທີ່ເພີ່ມສູງຂຶ້ນຂອງປະເທດ ກໍຖືເປັນອີກນຶ່ງປະເດັນທີ່ສຳຄັນ ເຖິງແມ່ນວ່າຝ່າຍຄ້ານຂູ່ວ່າຈະລົງມະຕິບໍ່ໄວ້ວາງໃຈກໍຕາມ, ລີຊາ ບຣາຍອັນ ມີລາຍງານຈາກນະຄອນຫຼວງ ປາຣີ, ເຊິ່ງ ພຸດທະສອນ ຈະນຳລາຍລະອຽດມາສະເໜີທ່ານໃນອັນດັບຕໍ່ໄປ.
ຫຼັງຈາກດົນກວ່າສອງເດືອນໂດຍປາສະຈາກລັດຖະບານທີ່ເຮັດວຽກໄດ້ແທ້ດົນກວ່າສອງເດືອນ, ຄະນະລັດຖະບານໃໝ່ຂອງ ຝຮັ່ງ ໄດ້ເລີ່ມເຮັດວຽກໃນວັນຈັນວານນີ້ ເຊິ່ງວ່າເຂົາເຈົ້າຈະຢູ່ໃນຫ້ອງການໄດ້ດົນປານໃດນັ້ນແມ່ນຍັງບໍ່ຈະແຈ້ງ.
ການເມືອງ ຝຣັ່ງ ໄດ້ຢູ້ໃນພາວະບໍ່ແນ່ນອນຕັ້ງແຕ່ມີການເລືອກຕັ້ງສະພານິຕິບັນຍັດກະທັນຫັນ ເມື່ອປາຍເດືອນມິຖຸນາ ແລະ ຕົ້ນເດືອນກໍລະກົດທີ່ຜ່ານມາ ຊຶ່ງບໍ່ມີຜົນສະຫຼຸບທີ່ຊັດເຈນ ອັນສົ່ງຜົນໃຫ້ພັກຮ່ວມຝ່າຍຊ້າຍໄດ້ຮັບຄະແນນສຽງຫຼາຍທີ່ສຸດ ແລະ ພັກການຊຸມນຸມແຫ່ງຊາດ ຫຼື National Rally ພັກຂວາຈັດກາຍເປັນພັກການເມືອງທີ່ໃຫຍ່ທີ່ສຸດ ຈົນຮອດຕອນນີ້ ຫຼັງຈາກການແຂ່ງຂັນກິລາໂອລິມປິກ ປາຣີ ຈຶ່ງໄດ້ມີການຈັດຕັ້ງລັດຖະບານກາງອຽງຂວາງຊຸດໃໝ່ ຊຶ່ງບໍ່ມີພັກການເມືອງໃດໃນສອງກຸ່ມນີ້ເຂົ້າຮ່ວມ.
ໃນໂທລະພາບເມື່ອຄືນວັນອາທິດທີ່ຜ່ານມາ, ນາຍົກລັດຖະບານ ບາກເນຍ ໄດ້ໃຫ້ລາຍລະອຽດ ກ່ຽວກັບ ບູລິມະສິດສູງສຸດທີ່ກວ້າງຂວາງຈຳນວນນຶ່ງ. ທ່ານໄດ້ຮຽກຮ້ອງສຳລັບການຄວບຄຸມ ແລະ ຈຳກັດຄົນເຂົ້າເມືອງ, ໂດຍກ່າວວ່າຈຳນວນຜູ້ຍົກຍ້າຍຖິ່ນຖານທີ່ໄດ້ມາຮອດຝຣັ່ງ ສູງຈົນຮັບບໍ່ໄຫວ.
ລັດຖະມົນຕີກະຊວງພາຍໃນຄົນໃໝ່ ທ່ານ ບຣູໂນ ເຣີໄຕໂຢ, ສະໜັບສະໜູນການຄວບຄຸມການຍົກຍ້າຍຖິ່ນຖານທີ່ເຂັ້ມງວດກວ່າເກົ່າຢ່າງແຂງແກ່ນ.
ທ່ານ ບຣູໂນ ຍັງຮຽກຮ້ອງສຳລັບສິ່ງທີ່ທ່ານອະທິບາຍດັ່ງກັບ “ຄວາມພະຍາຍາມແຫ່ງຊາດ,” ລວມທັງການເກັບພາສີຄົນຮັ່ງມີ ເພື່ອຫຼຸດຜ່ອນການຂາດດຸນງົບປະມານຂອງປະເທດ, ເຊິ່ງເກີນຂີດຈຳກັດຂອງສະຫະພາບຢູໂຣບຫຼາຍ. ແຕ່ທ່ານໄດ້ກ່າວວ່າທ່ານຈະບໍ່ແຕະຕ້ອງການປ່ຽນແປງສັງຄົມເຊັ່ນການແຕ່ງງານຂອງພວກກະເທີຍ ແລະ ການເຄື່ອນໄຫວຄັ້ງຫຼ້າສຸດເພື່ອປົກປ້ອງເສລີພາບໃນການເຮັດແທ້ງລູກໃນລັດຖະທຳມະນູນ ຝຣັ່ງ.
ລັດຖະບານໃໝ່ຂອງທ່ານ ບາກເນຍ ແມ່ນໄດ້ຮູ້ສຶກເຖິງຄວາມກົດດັນແລ້ວ. ຫຼາຍພັນຄົນໄດ້ອອກມາປະທ້ວງໃນນະຄອນຫຼວງ ປາຣີ ແມ່ນກະທັ້ງກ່ອນທີ່ຄະນະລັດຖະບານຂອງທ່ານຈະຖືກຕັ້ງຂຶ້ນ.
ນັກການເມືອງຊ້າຍຈັດ ທ່ານ ຊັອງ ລູກ ເມລັອງຊົງ ໄດ້ເຕືອນວ່າລັດຖະບານຂອງທ່ານ ບາກເນຍ ບໍ່ມີອະນາຄົດ, ຄຳເຕືອນນີ້ຖືກຍົກຂຶ້ນມາໂດຍຝ່າຍຂວາຈັດ. ຝ່າຍຊາຍໄດ້ໃຫ້ຄຳໝັ້ນສັນຍາວ່າຈະລົງມະຕິບໍ່ໄວ້ວາງໃຈ ແຕ່ບັນດານັກວິເຄາະເຫັນວ່າ ບໍ່ໜ້າຈະປະສົບຄວາມສຳເລັດ.
ອ່ານລາຍງານນີ້ເປັນພາສາອັງກິດ
