ທ່ານ Francois Hollande ປະທານາທິບໍດີຝຣັ່ງຄົນໃໝ່ ກໍາລັງທໍາການ ຈັດແຈງສິ່ງຕ່າງໆໃຫ້ເຂົ້າຮູບເຂົ້າຮອຍເພື່ອເດີນໜ້າກັບແນວທາງໃໝ່ ໄປສູ່ການເປັນປະເທດມະຫາອໍານາດເສດຖະກິດສໍາລັບພາກພື້ນຢູໂຣບ.
ບັນດາຜູ້ຊ່ວຍຂອງທ່ານ ໄດ້ປະກາດການປະກອບຄະນະລັດຖະບານຝຣັ່ງ ຊຸດໃໝ່ເມື່ອວັນພຸດວານນີ້ມື້ນຶ່ງຫຼັງຈາກນັກການເມືອງພັກສັງຄົມນິຍົມທ່ານ ນີ້ໄດ້ສາບານຕົວເຂົ້າຮັບຕໍາແໜ່ງປະທານາທິບໍດີໃນລະຫວ່າງພິທີທີ່ຈັດຂຶ້ນ ທ່າມກາງຝົນຕົກ ໃນນະຄອນຫຼວງປາຣີນັ້ນ.
ຕໍາແໜ່ງວຽກງານທີ່ໄດ້ມີການແຕ່ງຕັ້ງໃໝ່ ກໍມີໂຮມທັງ ທ່ານ Laurent Fabius ອະດີດນາຍົກລັດຖະມົນຕີພັກສັງຄົມນິຍົມເປັນລັດຖະມົນຕີການຕ່າງປະເທດ ແລະທ່ານ Pierre Moscovici ເປັນລັດຖະມົນຕີການເງິນ. ທ່ານ Moscovici ເປັນອະດີດລັດຖະມົນຕີກິດຈະການພາກພື້ນຢູໂຣບ ແລະກໍເຄີຍເປັນຜູ້ອໍານວຍການ ໃນການໂຄສະນາຫາສຽງ ໃຫ້ແກ່ທ່ານ Hollande.
ຄະນະລັດຖະມົນຕີສໍາຄັນອື່ນໆ ກໍມີໂຮມທັງທ່ານ Michael Sapin ເປັນ ລັດຖະມົນຕີກະຊວງແຮງງານຄົນໃໝ່ ທ່ານ Manuel Valls ເປັນລັດຖະ ມົນຕີກະຊວງພາຍໃນຄົນໃໝ່ ແລະ ທ່ານ Jean-Yves Drian ເປັນ ລັດຖະມົນຕີປ້ອງກັນປະເທດ.
ເມື່ອວັນອັງຄານຜ່ານມານີ້ ທ່ານ Hollande ໄດ້ແຕ່ງຕັ້ງທ່ານ Jean-Marc Ayrault ເປັນນາຍົກລັດຖະມົນຕີຄົນໃໝ່ຂອງປະເທດ. ທ່ານ Jean-Marc Ayrault ເປັນຜູ້ນຳພັກສັງຄົມນິຍົມທີ່ປາກເວົ້າພາສາເຢຍຣະມັນ ຢູ່ໃນສະພາຂອງຝຣັ່ງ.
ນອກນີ້ແລ້ວ ປະທານາທິບໍດີ Hollande ຍັງປະກົດວ່າໄດ້ປະຕິບັດຕາມ ຄໍາໝັ້ນສັນຍາທີ່ໄດ້ໃຫ້ໄວ້ໃນລະຫວ່າງການໂຄສະນາຫາສຽງ ທີ່ຈະໃຫ້ມີ ພວກແມ່ຍິງຕາງໜ້າເທົ່າທຽມກັນຢູ່ໃນຄະນະລັດຖະບານ. ໃນຂະນະທີ່ຕໍາແໜ່ງສຳຄັນສ່ວນໃຫຍ່ ຕົກເປັນຂອງຜູ້ຊາຍກໍດີ ແຕ່ຈໍານວນ 17 ຂອງ ທັງໝົດ 34 ຕໍາແໜ່ງນັ້ນ ກໍຕົກເປັນຂອງແມ່ຍິງ.
ແຕ່ແນວໃດກໍດີ ນຶ່ງໃນຈໍານວນນັກການເມືອງແມ່ຍິງລະດັບນໍາໜ້າຂອງປະເທດທີ່ບໍ່ໄດ້ຢູ່ໃນຄະນະລັດຖະບານກໍຄື ທ່ານນາງ Martine Aubry ຜູ້ນໍາພັກສັງຄົມນິຍົມ ຊຶ່ງເປັນຂູ່ແຂ່ງຂອງທ່ານ Hollande ກ່າວວ່າ ທ່ານ ນາງເຫັນພ້ອມທີ່ຈະບໍ່ຮັບຕໍາແໜ່ງເພື່ອປອບໃຈເພາະມັນບໍ່ມີເຫດຜົນພຽງ ພໍ.