ອິນເດຍແລະຝຣັ່ງໄດ້ລົງນາມໃນສັນຍາສະບັບນຶ່ງ ມູນຄ່າ ຫລາຍພັນລ້ານໂດລາ ເພື່ອກໍ່ສ້າງໂຮງໄຟຟ້ານີວເຄລຍ 2 ແຫ່ງໃນອິນເດຍ.
ສັນຍາໃນວົງເງິນເກືອບ 9 ພັນ 500 ລ້ານໂດລາ ໄດ້ມີການລົງນາມກັນໃນວັນຈັນມື້ນີ້ ທີ່ນະຄອນຫລວງນີວເດລີ ໃນລະຫວ່າງການພົບປະກັນລະຫວ່າງທ່ານມັນໂມຫັນ ສິງ ນາຍົກລັດຖະມົນຕີອິນເດຍ ແລະປະທານາທິບໍດີຝຣັ່ງ ທ່ານ Nicolas Sarkozy.
ບໍລິສັດ Areva ນຶ່ງໃນບັນດາບໍລິສັດໄຟຟ້ານີວເຄລຍໃຫຍ່ໆຂອງຝຣັ່ງ ຈະເປັນ ຜູ້ສ້າງເຕົາແຍກນີວເຄລຍ 2 ແຫ່ງ ໃຫ້ອິນເດຍ.
ປະທານາທິບໍດີ Zarkozy ກໍາລັງຢູ່ໃນມື້ທີສາມ ຂອງການຢ້ຽມຢາມອິນເດຍ ເປັນເວລາ 4 ມື້ ບ່ອນທີ່ທ່ານກໍາລັງພະຍາຍາມຊອກຫາທຸລະກິດໃຫ້ປະເທດຂອງທ່ານນັ້ນ.
ນອກນັ້ນ ຝຣັ່ງຍັງກໍາລັງຊອກຫາທາງໃຫ້ໄດ້ສ່ວນແບ່ງຈາກເງິນຫລາຍພັນລ້ານ ໂດລາ ທີ່ອິນເດຍໄດ້ວາງງົບປະມານໄວ້ ສໍ່ລັບປັບປຸງກອງທັບຂອງຕົນໃຫ້ທັນສະໄໝຂຶ້ນນັ້ນ.