ສານປົກຄອງສູງສຸດຂອງຝຣັ່ງ ມີກຳນົດທີ່ຈະຕັດສິນໃນວັນສຸກມື້ນີ້ວ່າ ຈະຫ້າມຫຼືບໍ່ ຕໍ່ການນຸ່ງຊຸດອາບນ້ຳທີ່ປົກຄຸມໂຕທັງໝົດ ຊຶ່ງໄດ້ກາຍເປັນບັນຫາໂຕ້ແຍ້ງລະຫວ່າງປະເທດນັ້ນ.
ການຕັດສິນດັ່ງກ່າວ ກຳນົດວ່່າຈະມີຂຶ້ນໃນຕອນບ່າຍມື້ນີ້ ແລະມີທ່າທາງວ່າຈະກຳນົດນະໂຍບາຍສຳລັບຫົວເມືອງຕ່າງໆຢ່າງໜ້ອຍ 30 ແຫ່ງໃນປະເທດຝຣັ່ງ.
ຫຼາຍໆຫົວເມືອງແຄມທະເລຂອງຝຣັ່ງ ຮວມທັງເມືອງ Riviera ໄດ້ຫ້າມບໍ່ໃຫ້ໃສ່ຊຸດອາບນ້ຳທີ່ປົກຄຸມໝົດທັງຕົວ ທີ່ພວກແມ່ຍິງມຸສລິມຈຳນວນນຶ່ງ ພາກັນໃສ່ກັນນັ້ນ ໃນພື້ນຖານເປັນການລະເມີດຕໍ່ກົດໝາຍ ກ່ຽວກັບຫລັກການທີ່ແບ່ງແຍກລະຫວ່າງລັດຖະບານແລະສາສະໜາ.
ການຫ້າມດັ່ງກ່າວມີຂຶ້ນໃນຂະນະທີ່ໄດ້ມີການສະແດງຄວາມຢ້ານກົວຂອງຊາວຝຣັ່ງຫຼາຍ ຄົນ ກ່ຽວກັບຄວາມປອດໄພສາທາລະນະຫຼັງຈາກໄດ້ມີການໂຈມຕີຂອງພວກຫົວຮຸນແຮງລັດອິສລາມ ທີ່ນະຄອນຫຼວງປາຣີ ເມືອງນິສ ແລະບ່ອນອື່ນໆ ໃນໄລຍະ 20 ເດືອນທີ່ຜ່ານມານີ້.
ສັນນິບາດ ປົກປ້ອງສິດທິມະນຸດຂອງຝຣັ່ງ ໄດ້ຍື່ນຟ້ອງຕໍ່ຄຳສັ່ງຫ້າມທີ່ວ່ານີ້ ຊຶ່ງໄດ້ກໍ່ໃຫ້ເກີດມີການອະພິປາຍກັນຢ່າງເຜັດຮ້ອນ. ກຸ່ມດັ່ງກ່າວເວົ້າວ່າ ພວກແມ່ຍິງຄວນຈະມີສິດໃນການນຸ່ງຫົ່ມໃນສິ່ງທີ່ພວກເຂົາເຈົ້າຕ້ອງການຢູ່ຕາມຫາດແຫ່ງຕ່າງໆໃນປະເທດຝຣັ່ງ.
ອີງຕາມການຢັ່ງຫາງສຽງປະຊາຊົນແລ້ວ ການຫ້າມດັ່ງກ່າວນີ້ ແມ່ນໄດ້ຮັບການສະໜັບ ສະໜຸນຢ່າງກວ້າງຂວາງ ແຕ່ກໍຂຶ້ນຢູ່ກັບສານທີ່ຈະຕັດສິນໃຫ້ຂໍ້ຫ້າມດັ່ງກ່າວນີ້ມີຜົນບັງ ຄັບໃຊ້ຕໍ່ໄປຫຼືບໍ່.
