ໃນວັນອາທິດມື້ນີ້ ປະຊາຊົນຝຣັ່ງ ພາກັນອອກໄປປ່ອນບັດເລືອກຕັ້ງປະທານາທິບໍດີ ຂັ້ນຕັດສິນຊີ້ຂາດ.
ຜົນການຢັ່ງສຽງມະຫາຊົນຄັ້ງລ່າສຸດ ຊີ້ແນະວ່າ ປະທານາທິບໍດີ Nicolas Sarkozy ກໍາລັງໄດ້ຮັບຄະແນນເພີ່ມຂຶ້ນອີກ ຈາກຄະແນນທີ່ຕໍ່າກວ່າຄູ່ແຂ່ງພັກສັງຄົມນິຍົມຂອງທ່ານ ແຕ່ທ່ານ Francois Hollande ກໍຄາດວ່າຈະໂຜ່ໂຕຂຶ້ນມາໄດ້ຮັບໄຊຊະນະ.
ປະທານາທິບໍດີ ຊາໂກຊີ ໄດ້ປະເຊີນກັບການຕໍາໜິຕິຕຽນຢ່າງໃຫຍ່ ສໍາລັບການຮັບມືກັບບັນຫາເສດຖະກິດຂອງທ່ານ ແລະບວກກັບວິທີການບໍລິຫານປະເທດແບບບໍ່ຄິດຢ່າງລອບຄອບຂອງທ່ານໃນໄລຍະການ ດໍາລົງຕໍາແໜ່ງ ປະທານາທິບໍດີຫ້າປີຂອງທ່ານນັ້ນ
ທ່ານ Charles Kupchan ນັກວິເຄາະສະພາວ່າດ້ວຍຄວາມສໍາພັນຕ່າງປະເທດ ກ່າວວ່າ ປະທານາທິບໍດີຊາໂກຊີ ໄດ້ສູນເສຍຄວາມນິຍົມ ຊົມຊອບໄປແລ້ວ ຊຶ່ງຄັ້ງນຶ່ງທີ່ທ່ານເຄີຍມ່ວນຊືນເບີກບານນັ້ນ.
ທ່ານ Hollande ເປັນນັກການເມືອງທີ່ມີປະສົບການສູງ ຜູ້ທີ່ເປັນຫົວໜ້າ ພັກສັງຄົມນິຍົມມາເປັນເວລາຫລາຍປີ ແຕ່ທ່ານກໍບໍ່ເຄີຍດໍາລົງຕໍາແໜ່ງລະ ດັບສູງສຸດໃນວົງການລັດຖະບານ.
ການແຂ່ງຂັນຕໍາແໜ່ງປະທານາທິບໍດີຂອງຜູ້ສະໝັກເລືອກຕັ້ງພັກສັງຄົມນິຍົມ ໄດ້ຮັບຄະແນນສຽງເພີ່ມຫລາຍຂຶ້ນໃນວັນພະຫັດຜ່ານມານີ້ ເວລາ ທ່ານ Francois Bayrou ອະດີດຜູ້ຮັບສະມັກເລືອກຕັ້ງພັກຝ່າຍກາງ ກ່າວວ່າທ່ານຈະປ່ອນບັດໃຫ້ທ່ານ Hollande. ທ່ານ Bayrou ຊະນະ 9 ເປີເຊັນຂອງການປ່ອນບັດເລືອກຕັ້ງປະທານາທິບໍດີຮອບທີນຶ່ງໃນເດືອນຜ່ານມານີ້.
ໃນຂະນະດຽວກັນ ທ່ານນາງ Marine Le Pen ຜູ້ນໍາພັກຂວາຈັດ ທີ່ ໄດ້ຮັບຄະແນນອັນດັບສາມໃນການເລືອກຕັ້ງຮອບທີ່ນຶ່ງເມື່ອເດືອນແລ້ວນີ້ ກໍ ເວົ້າວ່າ ທ່ານນາງຈະບໍ່ຂໍສະໜັບສະໜຸນຝ່າຍໃດໃນການເລືອກຕັ້ງຂັ້ນຕັດ ສິນຊີ້ຂາດນັ້ນ.
ການປ່ອນບັດເລືອກຕັ້ງໃນປະເທດຝຣັ່ງ ແມ່ນໄດ້ເລິ່ມຕົ້ນຂື້ນໃນເວລາ 8 ໂມງເຊົ້າຕາມເວລາທ້ອງຖິ່ນ ແລະຈະປິດລົງ 10 ຊົ່ວໂມງຕໍ່ໄປ.