ຢ່າງໜ້ອຍ 42 ຄົນ ສ່ວນໃຫຍ່ ແມ່ນພວກທີ່ອອກກິນເບ້ຍບຳ
ນານແລ້ວ ເຊື່ອວ່າໄດ້ເສຍຊີວິດ ຍ້ອນອຸປະຕິເຫດລົດຕຳກັນ
ໃກ້ກັບນະຄອນ Bordeau ໃນປະເທດຝຣັ່ງໃນອັນທີ່ຮ້ອງວ່າ
ເປັນອຸປະຕິເຫດ ທີ່ຮ້າຍແຮງສຸດຂອງປະເທດ ໃນໄລຍະສາມ
ທົດສະວັດທີ່ຜ່ານມາ.
ບັນດາເຈົ້າໜ້າທີ່ກ່າວວ່າ ລົດບັນທຸກຄັນນຶ່ງ ໄດ້ແລ່ນເຂົ້າຕຳ
ລົດບັດທີ່ເຕັມໄປດ້ວຍຜູ້ໂດຍສານຢູ່ທາງຄົດລ້ຽວແຫ່ງນຶ່ງໃກ້
ກັບບ້ານ Puisseguinເຮັດໃຫ້ລົດທັງສອງຄັນເກີດໄຟໄໝ້.
ແປດຄົນມີລາຍງານນວ່າ ສາມາດຫລົບໜີຈາກໄຟໄໝ້ ແລະ
ບັນດາເຈົ້າໜ້າທີ່ກູ້ໄພສຸກເສີນຈຳນວນນຶ່ງ ໄດ້ໄປຊ່ອຍຢູ່ບ່ອນເກີດເຫດ.
ປະທານາທິບໍດີ Francois Hollande ໄດ້ກ່າວເຖິງອຸປະຕິເຫດໃນຂະນະທີ່ທ່ານເດີນທາງ
ໄປກຣິສໂດຍກ່າວວ່າ ລັດຖະບານໄດ້ “ສົ່ງການຊ່ວຍເຫລືອຢ່າງເຕັມທີ່” ເພື່ອຮັບມືກັບອັນ
ທີ່ທ່ານຮ້ອງວ່າ “ເປັນໂສກນາດຕະກຳທີ່ຮ້າຍແຮງ.”
ທ່ານຍັງບໍ່ທັນປະຕິເສດເຖິງຄວາມເປັນໄປໄດ້ທີ່ຈະຕັດການເດີນທາງຂອງທ່ານໃຫ້ສັ້ນລົງ
ເພື່ອກັບຄືນມາຝຣັ່ງ. ໃນຂະນະດຽວກັນນາຍົກລັດຖະມົນຕີ ທ່ານ Manuel Valls ລັດຖະ
ມົນຕີພາຍໃນ ທ່ານ Bernard Cazaneuve ແລະລັດຖະມົນຕີຂົນສົ່ງທ່ານ Alain Vidal ກຳລັງເດີນທາງໄປສູ່ບ່ອນເກີດອຸປະຕິເຫດປະມານ 60 ກິໂລແມັດທາງພາກຕາເວັນອອກ
ຂອງນະຄອນ Bordeau.
ອຸປະຕິເຫດຄັ້ງນີ້ ເຊຶ່ອວ່າເປັນອຸປະຕິເຫດບົນທ້ອງຖະໜົນທີ່ຮ້າຍແຮງສຸດນັບແຕ່ປີ 1982 ເປັນຕົ້ນມາ ເວລາ 53 ຄົນ ຮວມທັງເດັກນ້ອຍ 44 ຄົນ ໄດ້ເສຍຊີວິດຍ້ອນລົດບັດຕຳກັນຢູ່
ໃນພາກຕາເວັນອອກຂອງຝຣັ່ງ.
