ລິ້ງ ສຳຫລັບເຂົ້າຫາ

ຝຣັ່ງ ອັງກິດ ພ້ອມແລ້ວ ທີ່ຈະປະກອບອາວຸດ ໃຫ້ຝ່າຍຕໍ່ຕ້ານໃນຊີເຣຍ


ກຸ່ມຕໍ່ຕ້ານຊີເຣຍຈຸນຶ່ງ ຢູ່ໃນເຂດເມືອງ Homs ທີ່ຖືກປິດລ້ອມ, ວັນທີ 9 ມີນາ 2013.
ຝຣັ່ງ​ເວົ້າ​ວ່າຕົນ​ພ້ອມແລ້ວທີ່ຈະ​ປະຕິບັດ​ງານຮ່ວມ​ກັບ​ອັງກິດເພື່ອ​ຊ່ວຍ​ປະກອບ​ອາວຸດ​ ​ໃຫ້ແກ່​ກຸ່ມ​ຕໍ່ຕ້ານ​ຊີ​ເຣຍ ​ເຖິງ​ແມ່ນ​ວ່າ​ບໍ່​ໄດ້​ມີ​ຂໍ້​ຕົກລົງ​ກັນ​ໃດໆ ກັບປະ​ເທດ​ອື່ນໆ ​ເພື່ອ​ສົ່ງ​ອາວຸດໄປ​ຊ່ວຍຝ່າຍ​ຕໍ່ຕ້ານ​ກໍ​ຕາມ.

ການ​ຫ້າມ​ຂາຍ​ອາວຸດ​ຂອງ​ສະຫະພາບ​ຢູ​ໂຣບ​ທີ່​ມີ​ຜົນ​ບັງຄັບ​ໃຊ້​ໃນ​ປັດຈຸບັນ ​ນີ້ ​ໄດ້​ສັ່ງ​ຫ້າມປະ​ເທດ​ສະມາຊິກ​ຂອງ​ຕົນທັງຫຼາຍບໍ່​ໃຫ້​ສະໜອງ​ອາວຸດ​ຍຸດໂທ​ປະກອນ​ແກ່ຝ່າຍຄ້ານຊີ​ເຣຍ.

ທ່ານ Laurent Fabius ລັດ​ຖະມົນຕີ​ຕ່າງປະ​ເທດ​ຝຣັ່ງ ​ເວົ້າ​ເມື່ອ​ວັນ​ພະຫັດ​ມື້​ນີ້​ວ່າ ຝຣັ່ງ​ແລະ​ອັງກິດ​ຢາກ​ໃຫ້​ສະຫະພາບ​ຢູ​ໂຣບ ຫຼືອີ​ຢູຈັດ​ກອງປະຊຸມ​ດ່ວນຂຶ້ນ ​ເພື່ອ​ປຶກສາ​ຫາລືກ່ຽວ​ກັບ​ການຍົກ​ເລີກ​ຂໍ້​ຫ້າ​ມຂາຍ​ອາວຸດແລະ​ວ່າ ການ​ເຈລະຈາດັ່ງກ່າວ​ອາດ​ມີ​ຂຶ້ນກ່ອນ​ໝົດ​ເດືອນ​ນີ້.

ລັດຖະມົນຕີ​ຕ່າງປະ​ເທດ​ຝຣັ່ງ ​ໄດ້​ໃຫ້​ສັນຍານວ່າ​ ​ປະ​ເທດທັງ​ສອງ​ພ້ອມ​ແລ້ວ​ທີ່​ຈະ ເຄື່ອນ​ໄຫວ​ໄປ​ໜ້າດ້ວຍ​ການສົ່ງອາວຸດ​ຕ່າງໆ​ໄປ​ຊ່ວຍກຸ່ມ​ຕໍ່ຕ້ານ​ຊີ​ເຣຍ ​ເຖິງ​ແມ່ນ​ປະ​ເທດ​ອື່ນໆ​ບໍ່​ເຫັນ​ພ້ອມ​ນໍາ​ການ​ຍົກ​ເລີກ​ຂໍ້​ຫ້າມ​ສະບັບ​ນີ້ກໍ​ຕາມ.

​ເມື່ອ​ວັນ​ພຸດ​ວານ​ນີ້ ທ່ານ Sergei Lavrov ລັດຖະມົນຕີ​ຕ່າງປະ​ເທດຣັດ ​ເຊຍ ປະນາມ​ການ​ເຈລະຈາ​ກັນ ​ທີ່​ແນ​ເປົ້າໝາຍ​ໃສ່​ເພື່ອ​ຕິດ​ອາວຸດ​ໃຫ້ກຸ່ມ​ຕໍ່ຕ້ານ​ຊີ​ເຣຍ ​ໂດຍກ່າວ​ວ່າ ການ​ເຄຶ່ອນ​ໄຫວ​ດັ່ງກ່າວ​ນີ້ ຖື​ວ່າ​ບໍ່​ຖືກຕ້ອງ​ຕາມ​ກົດໝາຍ​ສາກົນ.

​ເມື່ອ​ທ້າຍ​ເດືອນ​ຜ່ານ​ມາ ສະຫະລັດໄດ້​ປະກາດ​ໃຫ້​ເງິນ​ຊ່ວຍ​ເຫຼືອ​ ເພີ່ມ​ຕື່ມ​ອີກ 60 ລ້ານ​ໂດ​ລາ​ແກ່​ກຸ່ມ​ຕໍ່ຕ້ານ​ຊີ​ເຣຍ ຊຶ່ງ​ເປັນ​ເທື່ອທໍາ​ອິດທີ່​ໄດ້​ໃຫ້​ການ​ຊ່ວຍເຫຼືອທີ່​ບໍ່​ແມ່ນ​ອາວຸດ ແກ່​ກໍາລັງ​ຂອງ​ຝ່າຍ​ຕໍ່ຕ້ານ​ຊີ​ເຣຍ. ໃນ​ອະດີດ ຜ່ານມາ ຣັດ​ເຊຍເຄີຍໄດ້​ຂາຍ​ອາວຸດ​ໃຫ້​ແກ່​ລັດຖະບານຂອງ​ປະທານາທິບໍ ດີ​ຊີ​ເຣຍ ທ່ານ Bashar al-Assad.
XS
SM
MD
LG