ຕຳຫລວດ 7 ຄົນ ຖືກຂ້າຕາຍ ຢູ່ທີ່ແຂວງໜຶ່ງທາງພາກເໜືອ
ຂອງອັຟການິສຖານ ຫຼັງຈາກປ້ອມກວດກາ ຂອງພວກເຂົາເຈົ້າ
ຖືກໂຈມຕີໂດຍພວກກະບົດ.
ບັນດາເຈົ້າໜ້າທີ່ ໃນແຂວງ Jawzjan ກ່າວວ່າ ຕຳຫລວດອີກ
5 ຄົນ ໄດ້ຮັບບາດເຈັບໃນການໂຈມຕີ ເມື່ອຕອນຄ່ຳຂອງວັນ
ເສົາວານນີ້ ຊຶ່ງພວກຕາລີບານ ໄດ້ອ້າງເອົາຄວາມຮັບຜິດຊອບ.
ຢູ່ໃນເຫດການອີກແຫ່ງນຶ່ງ ພົນລະເຮືອນ 7 ຄົນເສຍຊີວິດ
ເວລາລົດຂອງພວກເຂົາເຈົ້າ ແລ່ນໄປຢຽບລະເບີດທີ່ຝັງໄວ້ຢູ່
ແຄມທາງ ໃນແຂວງ Kunar ທາງພາກຕາເວັນອອກ. ໃນບັນດາຜູ້ເຄາະຮ້າຍ ມີຮວມທັງ
ເດັນກນ້ອຍ 2 ຄົນ. ແລະຜູ້ອື່ນໆ ອີກສາມຄົນ ໄດ້ຮັບບາດເຈັບໃນເຫດລະເບີດຄັ້ງນີ້.
ໃນຕອນຄ່ຳວັນເສົາເຊັ່ນກັນ ນັກຂ່າວອັຟການິສຖານຄົນໜຶ່ງ ເສຍຊີວິດຍ້ອນບາດແຜ ທີ່
ໄດ້ຮັບໃນການໂຈມຕີ ຂອງພວກຕາລີບານ ຕໍ່ໂຮງຮຽນແຫ່ງໜຶ່ງ ທີ່ບໍລິຫານໂດຍຊາວຝຣັ່ງ ເມື່ອຕົ້ນເດືອນນີ້.
ທ້າວ Zubair Hatami ມືກ້ອງຖ່າຍພາບຂອງໂທລະພາບ Mitra ທີ່ເປັນຂອງເອກະຊົນ
ໄດ້ຮັບບາດເຈັບສາຫັດ ເວລາໄວລຸ້ນຄົນໜຶ່ງບີບຂະນວນລະເບີດສະລະຊີບຕົນເອງ ໃນ
ລະຫວ່າງການສະແດງ ທີ່ໂຮງຮຽນມັດຖະຍົມ Etsiqlal ໃນວັນທີ 11 ເດືອນທັນວານີ້.
ພະນັກງານຊ່ວຍເຫຼືອຊາວເຢຍຣະມັນຄົນໜຶ່ງ ກໍໄດ້ເສຍຊີວິດເຊັ່ນກັນ ໃນການໂຈມຕີ
ສະລະຊີບຄັ້ງນັ້ນ.
