ບັນດາເຈົ້າໜ້າທີ່ໄນຈີເຣຍ ກ່າວວ່າ 15 ຄົນໄດ້ເສຍຊີວິດ ແລະ
41 ຄົນໄດ້ຮັບບາດເຈັບຈາກເຫດລະເບີດແຕກ ຢູ່ໃນສອງແຫ່ງ
ໃກ້ກັບນະຄອນຫລວງ Abuja.
ເຫດລະເບີດໃນຕອນກາງຄືນວັນສຸກວານນີ້ ເກີດຂຶ້ນໃນເມືອງ
Nyanya ແລະ ເມືອງ Kuje ຊຶ່ງເປັນເມືອງທີ່ຕັ້ງຢູ່ອ້ອມແອ້ມ
ນະຄອນຫຼວງ Abuja.
ຍັງບໍ່ມີກຸ່ມໃດ ອ້າງເອົາຄວາມຮັບຜິດຊອບໃນທັນທີ ກ່ຽວກັບ
ເຫດລະເບີດແຕກ ແຕ່ວ່າການໂຈມຕີນີ້ແມ່ນມີລັກສະນະແບບ
ດຽວກັບການໂຈມຕີອື່ນໆຂອງພວກ ຫົວຮຸນແຮງຈັດ Boko Haram.
ການໂຈມຕີທັງສອງ ໄດ້ເກີດຂື້ນນຶ່ງມື້ຫລັງຈາກຜູ້ສະລະຊີບສີ່ຄົນ ໄດ້ບີບຄະນວນລະ
ເບີດໃຫ້ແຕກຂຶ້ນ ຢູ່ໃນເມືອງ Maiduguri ເຮັດໃຫ້ມີຜູ້ເສຍຊີວິດ 14 ຄົນ.
ບັນດາເຈົ້າໜ້າທີ່ກ່າວວ່າ ອີກ 39 ຄົນໄດ້ຮັບບາດເຈັບຈາກການໂຈມຕີທັງສີ່ໃນ ຕອນ
ແລງວັນພະຫັດຜ່ານມານີ້.
ໂຄສົກກອງທັບຄົນນຶ່ງກ່າວວ່າ ການໂຈມຕີເກີດຂື້ນໃກ້ກັບບ່ອນຂ້າມທາງລົດໄຟ Ajilari
ໃນເມືອງ Maiduguri ເມືອງເອກຂອງລັດ Borno. ທ່ານໄດ້ຖິ້ມໂທດການໂຈມຕີໃສ່ພວກ
Boko Haram. ຍັງບໍ່ມີໃຜອ້າງເອົາຄວາມຮັບຜິດຊອບຕໍ່ເຫດລະເບີດເຫຼົ່ານີ້.
ເມືອງ Maiduguri ໄດ້ຕົກເປັນເປົ້າໝາຍ ໃນການໂຈມຕີຂອງພວກ Boko Haram
ເລື້ອຍໆ. ໃນວັນທີ 20 ເດືອນກັນຍາທີ່ຜ່ານມາເກືອບ 100 ຄົນໄດ້ຖືກສັງຫານໃນການ
ວາງລະເບີດທີ່ມີການປະສານງານກັນ ທີ່ສົງໄສວ່າເປັນການປະຕິບັດງານຂອງພວກ
ຫົວຮຸນແຮງຈັດອິສລາມກຸ່ມນີ້.
