ນັກການທູດຈາກອັຟການິສຖານ ປາກິສຖານ ຈີນ ແລະສະຫະລັດ
ໄດ້ເລີ້ມການໂອ້ລົມສົນທະນາ 4 ທາງ ຮອບໃໝ່ ທີ່ນະຄອນຫຼວງ
ກາບູລ ທ່າມກາງທີ່ມີຄວາມຄາດຫວັງໄວ້ວ່າ ຄະນະຜູ້ຕາງໜ້າ
ຈະກຳນົດວັນເວລາ ແລະສະຖານທີ່ ເພື່ອເປີດການເຈລະຈາສັນຕິ
ພາບໂດຍກົງ ທີ່ລັດຖະບານອັຟການິສຖານ ຕ້ອງການທີ່ຈະຈັດຂຶ້ນ
ກັບຝ່າຍຕາລີບານ.ໃນການຖະແຫຼງຕໍ່ຄະນະຜູ້ຕາງໜ້າທີ່ເຂົ້າຮ່ວມ ໃນວັນອັງຄານມື້ນີ້ ລັດຖະມົນຕີການຕ່າງປະເທດອັຟການິສຖານ ທ່ານ Salahuddin Rabbani ກ່າວເນັ້ນຢ້ຳໃນການຮຽກຮ້ອງໃຫ້ກຸ່ມຕາລີບານແລະກຸ່ມປະກອບອາວຸດອື່ນໆ ເຂົ້າຮ່ວມໃນການ
ເຈລະຈາ.
ທ່ານໄດ້ກ່າວວ່າ ກຸ່ມ 4 ປະເທດ ແມ່ນໄດ້ກຽມພ້ອມແລ້ວກ່ຽວກັບ “ຂອບແລະແຜນທີ່” ຂອງການເຈລະຈາສັນຕິພາບ ແລະໄດ້ຫວັງວ່າ ການພົບປະກັນໃນວັນອັງຄານມື້ນີ້ ຈະສາ ມາດໃຫ້ເປັນທີ່ແນ່ໃຈໄດ້ຫຼາຍຂຶ້ນ ແລະ ລາຍລະອຽດອື່ນໆກ່ຽວກັບຂໍ້ສະເໜີ ເຊັ່ນວັນເວ ລາແລະສະຖານທີ່ ເພື່ອການເຈລະຈາໂດຍກົງກັບກຸ່ມຕາລີບານກ່ອນທ້າຍເດືອນກຸມພານີ້.
ເຖິງຢ່າງນັ້ນກໍຕາມ ກຸ່ມກໍ່ການຮ້າຍທີ່ວ່ານີ້ ຍັງບໍ່ທັນໄດ້ລະບຸວ່າ ຕົນມີຄວາມຕັ້ງໃຈທີ່ຈະເຂົ້າຮ່ວມຂັ້ນຕອນການເຈລະຈາສັນຕິພາບນີ້ ຫຼືບໍ່. ແທນທີ່ຈະເຂົ້າຮ່ວມການເຈລະຈານີ້
ກຸ່ມຕາລີບານ ກັບຍິ່ງເພີ້ມການໂຈມຕີໄປທົ່ວອັຟການິສຖານ.
ທ່ານ Rabbani ໄດ້ກ່າວເນັ້ນເຖິງຄວາມຈຳເປັນເພື່ອການ
“ຫລຸດຜ່ອນລົງຫຼາຍສົມຄວນ” ໃນຄວາມຮຸນແຮງຂອງພວກກຸ່ມກໍ່ການຮ້າຍ ຮວມຢູ່ໃນ
ມາດຕະການສ້າງຄວາມໄວເນື້ອເຊື່ອໃຈ ໂດຍກ່າວວ່າ ມັນຈະຊ່ອຍໃນ “ຄວາມພະຍາຍາມເພື່ອສ້າງສັນຕິພາບໃຫ້ບັນລຸຜົນ.” ທ່ານຍັງໄດ້ກ່າວເຕືອນວ່າ ກອງກຳລັງຮັກສາຄວາມປອດໄພຂອງອັຟການິສຖານ ແມ່ນຕຽມພ້ອມທີ່ຈະປະເຊີນໜ້າກັບກຸ່ມຕາລີບານ ຊຶ່ງປະຕິເສດຕໍ່ການເຈລະຈາສັນຕິພາບນີ້ ແລະຍັງສືບຕໍ່ທຳການໂຈມຕີແບບນອງເລືອດໃນທົ່ວປະເທດ.
