ກອງທັບບົກສະຫະລັດ ໄດ້ພົບເຫັນສົບທະຫານຕື່ມອີກສີ່ຄົນ ທີ່ໄດ້ຫາຍສາບສູນໄປ ຫລັງ ຈາກລົດຂອງເຂົາເຈົ້າໄດ້ປີ້ນຂວ້ຳ ຍ້ອນນໍ້າຖ້ວມຊຸ ຢູ່ທີ່ຄ້າຍທະຫານ Fort Hood ໃນລັດ Texas ເຮັດໃຫ້ມີຈຳນວນສົບທີ່ພົບເຫັນທັງໝົດເພີ້ມຂຶ້ນເປັນເກົ້າຄົນແລ້ວ.
ລັດຖະມົນຕີປ້ອງກັນປະເທດ ທ່ານ Ash Carter ໃນວັນເສົາມື້ນີ້ ໄດ້ໃຫ້ການຢືນຢັນກ່ຽວ ກັບການເສຍຊີວິດຂອງທະຫານທັງເກົ້າຄົນ ທີ່ຄ້າຍ Fort Hood.
ຫ້າສົບໄດ້ພົບເຫັນເກືອບໃນທັນໃດໃນວັນພະຫັດທີ່ຜ່ານມາ ຫລັງຈາກລົດຂອງພວກທະ ຫານຈຸດັ່ງກ່າວໄດ້ປີ້ນຂວ້ຳ ຍ້ອນເກີດນ້ຳຖ້ວມຊຸຢ່າງວ່ອງໄວ ຢູ່ຫ້ວຍນໍ້າອອ້ມຄ້າຍ ທະຫານ.
ທະຫານສາມຄົນໄດ້ລອດຊີວິດຈາກອຸບັດເຫດ ແລະມີລາຍງານວ່າຢູ່ໃນສະພາບທີ່ໝັ້ນຄົງແລ້ວ.
ພວກທະຫານພວມພາກັນເຝິກແອບຢູ່ທີ່ຄ້າຍ ເວລາລົດຂອງເຂົາເຈົ້າຖືກນໍ້າຖ້ວມຊຸພັດ ໄປ.
ທ່ານ Carter ກ່າວວ່າ ທະຫານຈະ “ຖອດຖອນບົດຮຽນ” ຈາກອຸບັດເຫດ ແລະຈະມີການ ເອົາມາດຕະການ ໃນອະນາຄົດ “ເພື່ອປ້ອງກັນອຸປະຕິເຫດໃນທຳນອງນີ້.”
ຄ້າຍ Fort Hood ຊຶ່ງຕັ້ງຢູ່ 320 ກິໂລແມັດ ທາງພາກຕາເວັນຕົກສຽງເໜືອຂອງນະຄອນ Houston ໄດ້ປະສົບກັບສະພາບຝົນຕົກໜັກເພີ້ມຂຶ້ນໃນໄລຍະສອງສາມມື້ທີ່ຜ່ານມານີ້.
ໄພນໍ້າຖ້ວມແມ່ນມີສາເຫດມາຈາກຝົນຕົກໜັກ ຢູ່ອ້ອມແອ້ມນະຄອນ Houston ໃນກາງ ເດືອນເມສາທີ່ໄດ້ເຮັດໃຫ້ມີຢ່າງໜ້ອຍແປດຄົນເສຍຊີວິດ ແລະສ້າງຄວາມເສຍຫາຍໃຫ້ ແກ່ເຮືອນຊານຫຼາຍກວ່າ 1,000 ຫລັງ. ສະພາບອາກາດປັ່ນປ່ວນ ແລະນໍ້າຖ້ວມໃນທ້າຍ ສັບປະດາທີ່ຜ່ານມາ ໄດ້ເຮັດໃຫ້ສີ່ຄົນເສຍຊີວິດເຊັ່ນກັນ.
ບັນດາເຈົ້າໜ້າທີ່ກຳລັງກະກຽມຮັບມື ກັບຄວາມເປັນໄປໄດ້ ໃນການທີ່ຈະເກີດນໍ້າຖ້ວມຕື່ມອີກ ໃນຂະນະທີ່ລະດູລົມ hurricane ໄດ້ເລີ້ມຢ່າງເປັນທາງການ ໃນວັນທີ 1 ເດືອນມິຖຸນານີ້.
ອ່ານຂ່າວນີ້ເພີ້ມເປັນພາສາອັງກິດ
