ບັນດາເຈົ້າໜ້າທີ່ໃນປະເທດ ຈໍແດັນ ກ່າວວ່າ ກອງກຳລັງຮັກສາຄວາມ ປອດໄພໄດ້ປ່ອຍ ຕົວພວກນັກທ່ອງທ່ຽວທີ່ຕິດຄ້າງຢູ່ໃນຫໍປະສາດຍຸກໂບຮານໃນກາງເມືອງ Karak, ລຸນຫຼັງ ການໂຈມຕີໂດຍພວກມືປືນທີ່ ໄດ້ເຮັດໃຫ້ປະຊາຊົນຢ່າງໜ້ອຍ 14 ຄົນເສຍຊີວິດໃນວັນ ອາທິດວານນີ້. ລາຍງານວ່າຄົນອື່ນໆຢ່າງໜ້ອຍ 22 ຄົນ ລວມທັງພວກພົນລະເຮືອນ ແລະ ຕຳຫຼວດແມ່ນໄດ້ຮັບບາດເຈັບ.
ໜັງສືພິມ Jordan Times ໄດ້ກ່າວວ່າ ແມ່ຍິງສັນຊາດ ການາດາ ແລະ ຕຳຫຼວດຢ່າງ ໜ້ອຍ 5 ຄົນແມ່ນຢູ່ໃນຈຳນວນຜູ້ເສຍຊີວິດ ພ້ອມກັບອີກ 4 ຄົນທີ່ຕໍ່ມາຖືກລະບຸໂດຍແຫຼ່ງ ຂ່າວຮັກສາຄວາມປອດໄພວ່າ ເປັນພວກກໍ່ການຮ້າຍ.
ລາຍງານໄດ້ກ່າວວ່າ ຈຳນວນຜູ້ເສຍຊີວິດ ແລະ ບາດເຈັບສ່ວນໃຫຍ່ແມ່ນເກີດຂຶ້ນຢູ່ບ່ອນ ອື່ນ ໃນເມືອງທີ່ເປັນພູເຂົາເຊິ່ງມີຜູ້ອາໄສຢູ່ 70,000 ຄົນ, ກ່ອນມືປືນໄດ້ບຸກໂຈມຕີຫໍປະ ສາດ ທີ່ຖືກສ້າງຂຶ້ນ ໃນສັດຕະວັດທີ 12, ແລະ ໄດ້ຫາບ່ອນຫຼົບລີ້ຢູ່ໃນສະຖານທີ່ທ່ອງທ່ຽວ ທີ່ມີຊື່ສຽງທີ່ສຸດຂອງປະເທດນັ້ນ.
ໜັງສືພິມໄດ້ອ້າງຄຳເວົ້າຂອງໂຄສົກຕຳຫຼວດວ່າ ພວກພົນລະເຮືອນທີ່ຕິດຄ້າງຢູ່ໃນຫໍປະ ສາດໄດ້ຖືກປ່ອຍເປັນອິດສະຫຼະ ຫຼັງຈາກການ ປະຕິບັດການຮັກສາຄວາມປອດໄພ 5 ຊົ່ວ ໂມງ, ແລະ ພວກເຂົາເຈົ້າໄດ້ກ່າວວ່າ ພວກພົນລະເຮືອນທີ່ອາໄສຢູ່ໃກ້ຄຽງ ກໍຖືກຍົກຍ້າຍ ອອກ ໄປເຊັ່ນກັນ, ໃນຂະນະທີ່ຈຸດເຂົ້າເມືອງທີ່ສຳຄັນໝົດທຸກແຫ່ງຖືກປິດໄວ້.
ຕຳຫຼວດກ່າວວ່າ ມືປືນໄດ້ເດີນທາງເຂົ້າເມືອງ Karak ຈາກເມືອງ Qatraneh, ເປັນເມືອງ ທີ່ມີຄວາມປອດໄພພິເສດ ຕັ້ງຢູ່ຫ່າງອອກໄປ 30 ກິໂລແມັດທາງພາກຕາເວັນອອກສຽງ ເໜືອ.
ບໍ່ມີການອ້າງເອົາຄວາມຮັບຜິດຊອບໂດຍກຸ່ມໃດໃນຕອນແລງຂອງວັນອາທິດວານນີ້, ແລະ ບັນດາເຈົ້າໜ້າທີ່ກໍຍັງບໍ່ໄດ້ເປີດເຜີຍຂໍ້ມູນ ກ່ຽວກັບ ການເຊື່ອມໂຍງໃດໆ ລະຫວ່າງ ມືປືນ ກັບ ກຸ່ມຫົວຮຸນແຮງໃນປະເທດ ຊີເຣຍ ທີ່ຢູ່ໃກ້ຄຽງ.
ປະເທດ ຈໍແດັນ, ທີ່ຖືວ່າເປັນແຫຼ່ງຂອງຄວາມໝັ້ນຄົງໃນເຂດ ຕາເວັນອອກກາງທີ່ມັກມີ ຄວາມຮຸນແຮງເກີດຂຶ້ນເລື້ອຍໆນັ້ນ, ແມ່ນກຳລັງເຂົ້າຮ່ວມໃນການຕໍ່ສູ້ທາງອາກາດນຳໜ້າ ໂດຍ ສະຫະລັດ ກັບພວກຫົວຮຸນແຮງລັດອິສລາມໃນ ຊີເຣຍ ແລະ ອີຣັກ. ການເຂົ້າຮ່ວມ ຕໍ່ສູ້ໄດ້ເກີດຂຶ້ນແມ່ນກະທັ້ງທີ່ປະຊາຊົນ ຈໍແດັນ ໄດ້ຄັດຄ້ານຕໍ່ການຕໍ່ສູ້ທາງອາກາດ.
