ເປັນເວລາປະມານສິບປີມາແລ້ວ ທີ່ອົງການອະນາໄມໂລກ ໄດ້ແນະນໍາໃຫ້ປິ່ນປົວໂຣກ
ປອດແຫ້ງ ໂດຍວິທີໃຫ້ກິນຢາ 4 ເມັດ ທີ່ລວມເອົາຢາສີ່ຊະນິດ ເຂົ້າໃນກ້ອນຫລືເມັດ
ດຽວກັນ ທີ່ມີສ່ວນປະສົມຕົວຢາແບບດຽວກັນກັບຕົວຢາ 14 ເມັດ ທີ່ເຄີຍໃຊ້ກັນແຕ່
ໃດໆມານັ້ນ.
ແຕ່ວ່າ ຄວາມມີເຫດມີຜົນໃນການໃຊ້ຢາໃນຈໍານວນໜ້ອຍເມັດລົງ ຊຶ່ງເປັນການງ່າຍຂຶ້ນ
ສໍາລັບພວກຄົນເຈັບນັ້ນ ຍັງບໍ່ໄດ້ຖືກຮັບຮູ້ເທື່ອ ໃນໝູ່ພວກນາຍແພດຫລາຍຄົນ.
ດ້ວຍເຫດຜົນຫລາຍໆຢ່າງຕ່າງກັນ ພວກນາຍແພດທີ່ປິ່ນປົວໂຣກປອດແຫ້ງທັງຫລາຍ
ບໍ່ພາກັນສັ່ງຕົວຢາທີ່ມີໜ້ອຍ ເມັດນັ້ນ ໃຫ້ພວກຄົນປ່ວຍກິນ.
ແຕ່ການສຶກສາຄົ້ນຄວ້າໃໝ່ອັນນຶ່ງ ຢູ່ໃນຫລາຍໆເຂດທີ່ມີໂຣກປອດແຫ້ງໃນລະດັບສູງ
ຂອງຂົງເຂດອາຟຣິກາ ເອເຊຍ ແລະອາເມຣິກາລາຕິນ ຢືນຢັນວ່າ ຢາເມັດທີ່ລວມຈາກ
ສີ່ຕົວຢານັ້ນ ແມ່ນມີປະສິດທິຜົນເທົ່າໆກັບຢາຊຸດ 14 ເມດນັ້ນ.
Dr. Christian Lienhardt ປະຈໍາອົງການອະນາໄມໂລກ ທີ່ເປັນຜູ້ທໍາການສຶກສາຄົ້ນ
ຄວ້າດັ່ງກ່າວຢູ່ໃນຫລາຍໆປະເທດ ເພື່ອສົມທຽບຫລັກການປິ່ນປົວແບບໃໝ່ແລະແບບ
ເກົ່າ ກ່າວວ່າ:
“ມັນແມ່ນຄວາມຈິງ ທີ່ວ່າພວກຄົນເຈັບຢູ່ທຸກຫົນແຫ່ງໃນໂລກ ບໍ່ມັກກິນຢາຫລາຍ
ເມັດເກີນໄປ ແລະຖ້າຫາກວ່າເຮົາຈະຕ້ອງກິນຢາ 14 ເມັດເປັນປະຈໍາທຸກໆມື້ ເຖິງ
ຫົກເດືອນ ແລະກໍມີທາງເລືອກໃຫ້ກິນສີ່ເມັດໄດ້ແລ້ວ ຂ້າພະເຈົ້າກໍມັກແບບສີ່ເມັດ
ຫັ້ນແຫລະ ແລະຫລາຍໆຄົນກໍຈະມັກແບບ ກິນສີ່ເມດເຊັ່ນກັນ.”
ແຕ່ ດຣ Lienhardt ກ່າວວ່າ ພວກນາຍແພດພາກັນຄັດຄ້ານຕໍ່ການປິ່ນປົວດ້ວຍຢາສີ່
ເມັດນັ້ນ ເພາະວ່າພວກເຂົາເຈົ້າບໍ່ເຊື່ອວ່າ ການປິ່ນປົວທີ່ໃຊ້ຕົວຢາສີ່ເມັດນັ້ນຈະມີປະສິດ
ທິຜົນເທົ່າກັນກັບວິທີກິນ 14 ເມັດ. ດຣ Lienhardt ກ່າວຕໍ່ໄປວ່າ:
“ມັນມີຄວາມສາມັນສໍານຶກຢູ່ແບບນຶ່ງ ຊຶ່ງສ່ວນໃຫຍ່ແມ່ນຢູ່ໃນພວກພະນັກງານ
ການແພດ ຄືສາມັນສໍານຶກທີ່ວ່າ ເວລາໃດເຮົາໃຊ້ຢາຊະນິດເກົ່າ ເຮົາຮູ້ດີວ່າ
ຕົວຢາແຕ່ລະເມັດນັ້ນມີປະສິດທິຜົນດີ ແລະເມື່ອເຮົາລວມຢາເຂົ້າກັນ ມັນກໍອາດ
ຈະພາໃຫ້ສູນເສຍລິດຢາຫລືຄຸນນະພາບຂອງຕົວຢາໄປ ມັນເປັນສາມັນສໍານຶກ
ປະການນຶ່ງ ທີ່ສ່ວນໃຫຍ່ຈະມີຢູ່ໃນວົງການພວກໃຫ້ການຮັກສາພະຍາບານ
ຫລາຍກວ່າ ແທນທີ່ຈະມາຈາກພວກຄົນເຈັບ.”
ໂຣກປອດແຫ້ງເປັນພະຍາດທີ່ມາຈາກແບັກທີເຣຍຫລືເຊື້ອໂຣກທີ່ຫ້າວຫັນພະຍາດນຶ່ງ
ທີ່ບຽດບຽນປອດແລະແຜ່ລະບາດອອກໄປຢ່າງໄວໃນໝູ່ຄົນທີ່ມີລະບົບພູມຕ້ານທານຕໍ່າ.
ທຸກໆປີໃດ ຈະມີຄົນເສຍຊີວິດຍ້ອນໂຣກປອດແຫ້ງ ໄປປະມານເກືອບສອງລ້ານຄົນໃນ
ທົ່ວໂລກ. ພວກນັກຊ່ຽວຊານກ່າວວ່າ ໂຣກປອດແຫ້ງແມ່ນປິ່ນປົວໃຫ້ຫາຍຂາດໄດ້ ຖ້າ
ກິນຢາຕາມທີ່ແພດສັ່ງ.
ໃນການປິ່ນປົວແບບເກົ່ານັ້ນ ຕາມປົກກະຕິແລ້ວ ພວກຄົນປ່ວຍເປັນໂຣກປອດແຫ້ງ
ແມ່ນຈະຕ້ອງກິນຢາ 12 ຫາ 20 ເມັດເປັນປະຈໍາທຸກໆມື້ ຂຶ້ນຢູ່ກັບນໍ້າໜັກຂອງຄົນເຈັບ
ແລະຕາມໄລຍະເວລາທີ່ນາຍແພດສັ່ງ ຊຶ່ງກໍອາດຈະແກ່ຍາວອອກໄປ ຖ້າຫາກບໍ່ກິນຕາມ
ສັ່ງ ແຕ່ການປິ່ນປົວດ້ວຍການກິນຢາທີ່ລວມເຂົ້າໃນເມັດດຽວກັນແລະໃນຈໍານວນໜ້ອຍ
ລົງນັ້ນ ແມ່ນຈະປັບປຸງໂອກາດທີ່ພວກຄົນເຈັບຈະກິນຢາຕາມສັ່ງນັ້ນ ໃຫ້ຄົບແລະໃຫ້ໝົດ ຊຸດໄດ້ໂດຍໄວ.
ເບິ່ງວີດີໂອ ພາສາອັງກິດ:
ໃນການສຶກສາຄົ້ນຄວ້າຢູ່ໃນ 11 ປະເທດນັ້ນ ດຣ Lienhardt ແລະຜູ້ຮ່ວມງານຂອງທ່ານ
ໄດ້ແບ່ງພວກຄົນເຈັບອອກເປັນສອງຈຸ ຄືຈຸນຶ່ງໃຫ້ກິນຢາຊະນິດທີ່ລວມເຂົ້າກັນ ເທື່ອລະ 4
ເມັດ. ສ່ວນອີກຈຸນຶ່ງໃຫ້ກິນຢາເມັດລະຊະນິດ ຫລາຍໆເມັດແບບເກົ່າ. ຜົນການທົດລອງ
ດ້ານການແພດດັ່ງກ່າວ ພົບວ່າພວກຢາທີ່ລວມເຂົ້າກັນນັ້ນ ກໍມີປະສິດທິຜົນເທົ່າທຽມກັນ
ກັບຢາທີ່ກິນຫລາຍໆເມັດ. ດຣ Lienhardt ກ່າວຕື່ມວ່າ:
“ພວກເຮົາຕ້ອງເຜີຍແຜ່ແລະເນ້ນໜັກຄວາມຈິງຂໍ້ນີ້ຢ່າງແຂງແຮງທີ່ສຸດນັ້ນ ກໍຄືວ່າ
ການໃຊ້ຢາຊະນິດລວມກັນນີ້ ກໍມີປະສິດທິຜົນເທົ່າທຽມກັນ ກັບຕົວຢາຊະນິດທໍາ
ມະດາທີ່ເຄີຍໃຊ້ກັນມາ ແລະມັນກໍເປັນເຄຶ່ອງມີທີ່ດີຫລາຍເພື່ອຫລີກລ່ຽງບໍ່ໃຫ້ເກີດ
ອາການດື້ຕໍ່ຢານັ້ນ.”
ຕົວຢາທີ່ມີພະລັງສູງກວ່າປັດຈຸບັນນີ້ ແມ່ນຈໍາເປັນສໍາລັບປາບເຊື້ອໂຣກສາຍພັນທີ່ດື້ຕໍ່ຢາ
ຊຶ່ງບາງສາຍພັນນັ້ນ ກໍຍາກທີ່ຈະປິ່ນປົວດ້ວຍຕົວຢາໃດນຶ່ງໄດ້
Dr. Lee Reichman ທີ່ໄດ້ປະຕິບັດງານເພື່ອຄວບຄຸມໂຣກປອດແຫ້ງມາ ເປັນເວລາ
40 ປີແລ້ວ ກ່າວວ່າ
“ໂຣກປອດແຫ້ງ ຫລືທີບີ ປະເພດທີ່ດື້ຕໍ່ຢາຫລາຍຊະຊິດ ແລະປະເພດທີ່ດື້ຕໍ່ຢາ
ຢ່າງກວ້າງນັ້ນ ແມ່ນຕົວການພາໃຫ້ລະບົບລົ້ມແຫລວ. ໂຣກປອດແຫ້ງເປັນໂຣກ
ທີ່ປິ່ນປົວໃຫ້ຫາຍຂາດ ແລະປ້ອງກັນໄດ້ ແລະຖ້າຫາກວ່າ ພວກເຮົາພົບເຊື້ອ
ປອດແຫ້ງໃນວິທີທີ່ເໝາະສົມ ແລະປິ່ນປົວຢ່າງຖືກຕ້ອງເໝາະສົມແລ້ວ ມັນກໍຈະ
1. ຫາຍຂາດໄດ້ ແລະ 2. ມັນຈະບໍ່ພາໃຫ້ເກີດພະຍາດທີບີທີ່ດື້ຕໍ່ຢາ ບໍ່ວ່າຈະ
ເປັນປະເພດທີ່ດື້ຕໍ່ຢາຫລາຍຊະນິດ ຫລືປະເພດທີ່ດື້ຕໍ່ຢາຢ່າງກວ້າງຂວາງນັ້ນ.”
ພວກນັກຄົ້ນຄວ້າທັງຫລາຍກໍາລັງແນເປົ້າໝາຍ ທີ່ຈະເຮັດໃຫ້ວິທີການປິ່ນປົວທີ່ໃຊ້
ຢາເມັດທີ່ລວມໂຕຢາສີ່ຊະນິດເຂົ້າກັນນັ້ນ ເປັນທີ່ຮັບເອົາແລະໄດ້ຮັບຄວາມນິຍົມສູງ
ໃນບັນດາພວກເຈົ້າໜ້າທີ່ສາທາລະນະສຸກຂອງນາໆຊາດ ພວກຮ່າງນະໂຍບາຍແລະ
ອົງການຕ່າງໆຂອງພວກຄົນເຈັບ ອັນເປັນພາກສ່ວນຂອງການສືບຕໍ່ປຸກລະດົມເພື່ອ ຖອນຮາກໂຣກປອດແຫ້ງນັ້ນ.
