ໃນວັນຈັນວານນີ້ ອະດີດຮອງປະທານາທິບໍດີ ສະຫະລັດ ທ່ານ ໂຈ ບາຍເດັນ ໄດ້ຮັບການຮັບຮອງ ຈາກອະດີດຄູ່ແຂ່ງສຳຄັນ 3 ທ່ານ ໃນການແຂ່ງຂັນເພື່ອເປັນປະທານາທິບໍດີ ຊຶ່ງໄດ້ເພີ້ມແຮງກະຕຸ້ນຕໍ່ການໂຄສະນາຫາສຽງຂອງທ່ານ ຂຶ້ນຕື່ມອີກ ກ່ອນໜ້າການປ່ອນບັດເລືອກຕັ້ງຂັ້ນຕົ້ນໃນວັນອັງຄານມື້ນີ້ ຢູ່ໃນ ຫຼາຍກວ່າ 12 ລັດ ທີ່ຮູ້ຈັກກັນຄື Super Tuesday ຫລືວັນອັງຄານພິເສດ.
ທ່ານນາງເອມີ ໂຄລບູຈາຣ໌ ສະມາຊິກສະພາສູງສະຫະລັດ ໄດ້ສິ້ນສຸດການແຂ່ງຂັນໃຫ້ຖືກແຕ່ງຕັ້ງໃຫ້ເປັນຜູ້ຕາງໜ້າພັກເດໂມແຄຣັດເພື່ອໄປແຂ່ງຂັນເປັນປະທານາທິບໍດີ ເມື່ອວັນຈັນວານນີ້ ແລະໄດ້ພ້ອມກັນກັບ ທ່ານເບໂຕ ໂອຣວກຄ໌, ອະດີດສະມາຊິກສະພາຕ່ຳຈາກລັດເທັກຊັສ ໃຫ້ການຮັບຮອງຢ່າງເປັນທາງການແກ່ທ່ານໄບເດັນ ຢູ່ໃນການໂຮມຊຸມນຸມໃນນະຄອນດາລັສ.
ການຖອນຕົວຂອງທ່ານນາງ ໂຄລບູຈາຣ໌ ໄດ້ມີຂຶນນຶ່ງວັນ ຫຼັງຈາກອະດີດເຈົ້າເມືອງໆເຊົ້າເບັນ ຈາກລັດອິນເດຍນາ, ທ່ານພີດ ບູຕີເຈຈ ສັງກັດພັກເດໂມແຄຣັດ ທີ່ນິຍົມແນວທາງປານກາງ ອີກທ່ານນຶ່ງ ໄດ້ປະກາດການສິ້ນສຸດການໂຄສະນາຫາສຽງຂອງທ່ານເຊັ່ນກັນ. ທ່ານກໍໄດ້ໃຫ້ການຮັບຮອງຢ່າງເປັນທາງການແກ່ທ່ານໄບເດັນ ໃນວັນຈັນວານນີ້ອີກເຊັ່ນກັນ.
ທ່ານນາງ ໂຄລບູຈາຣ໌ ຈາກລັດມີເນໂຊຕາ ຕັ້ງຢູ່ພາກຕາເວັນຕົກຕອນກາງຂອງປະເທດ ໄດ້ເອົາຕົນເອງຕັ້ງຢູ່ໃນທ່າທີທີ່ເປັນຜູ້ອີງໃສ່ສະພາບການປະຕິບັດ ຕົງຈິງເປັນຫລັກໃນການແຂ່ງຂັນເປັນປະທານາທິບໍດີເພື່ອໃຫ້ຖືກແຕ່ງຕັ້ງໃຫ້ເປັນຜູ້ຕາງໜ້າພັກເດໂມແຄຣັດ ໂດຍໄດ້ຕັດສິນໃຈແບບແນວແນ່ວ່າຈະຢູ່ໃນທ່າທີທີ່ຮັບເອົາແນວທາງສາຍກາງກ່ຽວກັບຫຼາຍໆເລື້ອງ ທີ່ລວມທັງ ເລື້ອງການຄັດຄ້ານຕໍ່ການທີ່ລັດຖະບານເຂົ້າມາຄວບຄຸມການປະກັນໄພສຸຂະພາບຢູ່ໃນສະຫະລັດ.
ແຕ່ເຖິງແມ່ນວ່າ ທ່ານນາງຈະໄດ້ຮັບຄະແນນທີ່ພຸ້ງສູງຂຶ້ນເປັນໄລຍະສັ້ນໆ ຢູ່ໃນການສຳຫຼວດດ້ານການເມືອງກໍຕາມ ແຕ່ວ່າ ທ່ານນາງ ກໍບໍ່ສາມາດເຮັດໄດ້ດີເກີນກວ່າໄດ້ ທີ 3 ຫາ ທີ 6 ເມື່ອການແຂ່ງຂັນຢູ່ໃນເລືອກຕັ້ງຂັ້ນຕົ້ນຢູ່ໃນ 4 ລັດທຳອິດ ສັ້ນສຸດລົງເມື່ອເດືອນແລ້ວນີ້. ການສຳຫຼວດກ່ອນໜ້າການເລືອກຕັ້ງ ສຳລັບການປ່ອນບັດໃນວັນອັງຄານພິເສດ ຫລື Super Tuesday ໄດ້ສະແດງໃຫ້ເຫັນວ່າ ທ່ານນາງ ນຳໜ້າໝູ່ ຢູ່ໃນພຽງແຕ່ລັດບ້ານເກີດຂອງທ່ານນາງເທົ່ານັ້ນ.
ໃນວັນເສົາຜ່ານມານີ້ ທ່ານໄບເດັນ ໄດ້ຮັບໄຊຊະນະຢ່າງຂາດລອຍເທື່ອທຳອິດ ໃນການເລືອກຕັ້ງຂັ້ນຕົ້ນຂອງການແຂ່ງຂັນເພື່ອເປັນປະທານາທິບໍດີ 3 ຄັ້ງ ຜ່ານມາ ແລະເປັນໄຊຊະນະທີ່ເຮັດໃຫ້ທ່ານໝັ້ນໃຈຫຼາຍຢູ່ໃນລັດຄາໂຣໄລນາໃຕ້.
ນອກຈາກທ່ານນາງໂຄລບູຈາຣ໌ ແລະ ທ່ານບູຕີເຈຈ ຖອນຕົວອອກໄປແລ້ວ ຍັງມີມະຫາເສດຖີພັນລ້ານ ທ່ານ ທອມ ສເຕເອີ, ນັກອານຸລັກສິ່ງແວດລ້ອມ ກໍໄດ້ຖອນຕົວອອກຈາກການແຂ່ງຂັນເຊັ່ນກັນ ຫຼັງຈາກຜົນງານທີ່ເຂັ້ມແຂງຂອງ ທ່ານໄບເດັນສະແດງອອກມາ ຢູ່ໃນລັດຄາໂຣໄລນາໃຕ້.
