ທ່ານ David Petraeus ອະດີດຫົວໜ້າອົງການສືບລັບ CIA
ຂອງສະຫະລັດ ໄດ້ຖືກປັບໃໝ 100,000 ໂດລາ ໃນວັນພະ
ຫັດວານນີ້ ແລະໄດ້ຖືກຝາກໂທດເປັນເວລາສອງປີ ຍ້ອນເອົາ
ຂໍ້ມູນລັບໃຫ້ແກ່ຜູ້ສາວຂອງທ່ານ ໃນຂະນະທີ່ນາງເຮັດວຽກ
ຂຽນຊີວະປະຫວັດຂອງທ່ານ.
ທ່ານ Petraeus ອາຍຸ 62 ປີ ຄັ້ງນຶ່ງເຄີຍໄດ້ເປັນນາຍພົນ
ທະຫານສະຫະລັດ ຊັ້ນສູງຜູ້ສຳຄັນ ໃນຂະນະທີ່ສະຫະລັດ
ເຮັດສົງຄາມຢູ່ໃນ ປະເທດອີຣັກ ແລະອັຟການິສຖານ ແລະ
ຕໍ່ມາໄດ້ຖືກແຕ່ງຕັ້ງໂດຍ ປະທານາທິບໍດີ Barack Obama
ໃຫ້ເປັນຫົວໜ້າອົງການສືບລັບ CIA. ທ່ານໄດ້ບໍລິຫານງານ
ອົງການສືບລັບດັ່ງກ່າວຂອງປະເທດເປັນເວລານຶ່ງປີ ຈົນເຖິງທ້າຍປີ 2012 ເວລາທ່ານ
ໄດ້ລາອອກ.
ອາຊີບວຽກງານຂອງທ່ານໄດ້ຖືກເຜີຍແບອອກມາໃຫ້ເຫັນເມື່ອສອງປີເຄິ່ງທີ່ຜ່ານມາ ດ້ວຍ
ການເປີດເຜີຍວ່າ ທ່ານມີຄວາມສຳພັນນອກສົມລົດຖານຊູ້ສາວ ກັບນັກຂຽນຊີວະປະຫວັດ
ຂອງທ່ານ ນາງ Paula Broadwell ຜູ້ທີ່ຂຽນປື້ມຍ້ອງຍໍ ທ່ານ All In: The Education
of David Petraeus ທີ່ໄດ້ພິມເຜີຍແຜ່ ເມື່ອສາມປີກ່ອນ ກ່ອນທີ່ຄວາມສຳພັນດັ່ງກ່າວ
ໄດ້ຖືກເປີດເຜີຍໃຫ້ຮູ້.
ເມື່ອສອງເດືອນກ່ອນນີ້ທ່ານ Petraeus ໄດ້ຮັບສາລະພາບວ່າໄດ້ກະທຳຄວາມ ຜິດທາງ
ອາຍາທີ່ບໍ່ຮ້າຍແຮງ ໃນຂໍ້ຫາຍົກຍ້າຍແລະເກັບຮັກສາເອກກະສານລັບ ໂດຍບໍ່ໄດ້ຮັບອະນຸຍາດ.
ບັນດາໄອຍະການ ກ່າວວ່າ ເວລານາງ Broadwell ພວມເຮັດວຽກຂຽນປື້ມຢູ່ນັ້ນ ທ່ານ
Petraeus ໄດ້ເອົາມອບແຟ້ມເອກກະສານລັບຫົວ ທີ່ທ່ານບໍ່ສົມຄວນເກັບໄວ້ ໃນເວລາ
ທີ່ທ່ານໄດ້ເປັນ ຜູ້ບັນຊາການທະຫານສູງສຸດ ຢູ່ໃນອັຟການິສ ຖານ ໃຫ້ແກ່ນາງ. ເອກ
ກະສານເຫຼົ່ານີ້ແມ່ນຮວມທັງລາຍຊື່ຂອງພວກນັກສືບ ທີ່ປະຕິບັດງານລັບ ແຜນຍຸດທະສາດສົງຄາມຂອງພັນທະມິດ ແລະບັນທຶກຄວາມຊົງຈຳຂອງ ທ່ານ Petraeus ໃນການ
ສົນທະນາ ກັບປະທານາທິບໍດີ Barack Obama ແລະ ສະພາຄວາມໝັ້ນຄົງແຫ່ງຊາດ.
ບັນດາໄອຍະການກ່າວວ່າ ທ່ານ Petraeus ທີ່ມີໜ້າທີ່ເປັນນາຍທະຫານຢູ່ໃນ ກອງທັບ
ບົກຂອງສະຫະລັດ ມາໄດ້ເກືອບສີ່ທົດສະວັດນັ້ນ ໃນຕອນຕົ້ນໄດ້ຕົວະຄະນະສືບສວນ
ໂດຍກ່າວອ້າງວ່າ ທ່ານບໍ່ໄດ້ມອບເອກກະສານລັບເຫຼົ່ານັ້ນໃຫ້ແກ່ນາງ Broadwell.
