ອະດີດ ນາຍພົນອະວຸໂສທ່ານນຶ່ງ ຂອງກອງທັບຈີນ ຈະປະເຊີນກັບຂໍ້ຫາຮັບເງິນສິນບົນ ກາຍເປັນເຈົ້າໜ້າທີ່ຂັ້ນສູງ ຄົນຫລ້າສຸດໃນຈຳນວນຫຼາຍໆຄົນທີ່ຖືກຟ້ອງຮ້ອງ ໃນການປາບປາມການສໍ້ລາດບັງຫຼວງຂອງຈີນທີ່ໄດ້ມີການລິເລີ້ມໂດຍປະທານປະເທດຈີນທ່ານ ສີ ຈິ້ນຜິງ.
ອົງການຂ່າວຊິນຫົວຂອງທາງການຈີນ ລາຍງານວ່າ ໄອຍະການມີຫລັກຖານ ທີ່ສະແດງ ໃຫ້ເຫັນວ່າທ່ານ Guo Boxiong ໄດ້ໃຊ້ຕຳແໜ່ງຂອງທ່ານ ຊ່ອຍເຫຼືອຄົນອື່ນໃຫ້ໄດ້ຮັບ ການເລື່ອນຊັ້ນແລະຍ້າຍໄປຮັບຕຳແໜ່ງທີ່ດີໆໃນຂະນະທີ່ທ່ານໄດ້ຮັບເງິນສິນບົນກ້ອນ ໃຫຍ່ ທັງໂດຍທາງກົງແລະຜ່ານທາງຄອບຄົວຂອງທ່ານ.
ລາຍງານຂ່າວແຈ້ງວ່າ ທ່ານ Guo ໄດ້ຮັບສາລະພາບກ່ຽວກັບຂໍ້ຫາທັງໝົດນີ້.
ຄັ້ງນຶ່ງ ທ່ານ Guo ເຄີຍຮັບຕຳແໜ່ງ ເປັນຮອງປະທານ ກຳມາທິການກາງກອງທັບ ແລະ ເປັນສະມາຊິກຄົນນຶ່ງໃນຄະນະກຳມະການກົມການເມືອງສູນກາງພັກ ທີ່ມີອິດທິພົນ 25 ຄົນຂອງຈີນ.
ຄະດີຂອງທ່ານ ແມ່ນມີຂຶ້ນຫລັງຈາກທ່ານ Xu Caihu ອະດີດຮອງປະທານກຳມາທິການ ອີກຄົນນຶ່ງທີ່ໄດ້ຮັບສາລະພາບວ່າຮັບເງິນສິນບົນກ້ອນໃຫຍ່ເພື່ອແລກປ່ຽນກັບການຊ່ອຍ ໃຫ້ຄົນອື່ນໄດ້ຂຶ້ນຊັ້ນ.
ບຸກຄົນທັງສອງເຄີຍຮັບໜ້າທີ່ໃນສະໄໝການດຳລົງຕຳແໜ່ງຂອງອະດີດປະທານປະເທດ ຫູ ຈິນຕ້າວ.
ປະທານປະເທດ ສີ ຈິ້ນຜິງ ໄດ້ເລີ້ມປຸກລະດົມຕໍ່ຕ້ານການສໍ້ລາດບັງຫຼວງນັບຕັ້ງແຕ່ທ່ານ ໄດ້ເຂົ້າກຳຕຳແໜ່ງໃນທ້າຍປີ 2012. ທ່ານກ່າວວ່າການປາບປາມການສໍ້ລາດບັງຫຼວງນີ້ ແມ່ນເປັນເລື້ອງທີ່ຈິງຈັງສຳລັບພັກຄອມມູນິສຈີນ.
