ບັນດາລັດຖະມົນຕີຈາກປະເທດ ອີຣ່ານ ແລະ ກຸ່ມມະຫາອຳນາດໂລກ 6 ປະເທດ ໄດ້ຢູ່ໃນສະຖານະພາບທີ່ຄຸ້ນເຄີຍອີກຄັ້ງ ໃນວັນຈັນມື້ນີ້ ທີ່ນະຄອນຫຼວງ ວຽນນາ, ເຊິ່ງພວກເພິ່ນໄດ້ຮ່ວມກັນປະຊຸມເພື່ອຊອກຫາຂໍ້ຕົກລົງກ່ຽວກັບໂຄງການ ນິວເຄລຍຂອງ ອີຣ່ານ ເປັນຄັ້ງສຸດທ້າຍມື້ໜຶ່ງກ່ອນວັນເສັ້ນຕາຍຄັ້ງຫຼ້າສຸດຂອງພວກເພິ່ນ.
ບັນດານັກການທູດໄດ້ສະແດງການປະສົມປະສານຂອງຄວາມກ້າວ ໜ້າ ແລະ ຄວາມຕ້ອງການເພື່ອບັນລຸ ບັນຫາສຳຄັນທີ່ຍັງບໍ່ທັນໄດ້ມີການແກ້ໄຂ ໃນຄວາມພະຍາຍາມຂອງພວກເພິ່ນ ທີ່ຈະຈຳກັດກິດຈະກຳນິວເຄລຍຂອງ ອິຣ່ານ ເພື່ອແລກປ່ຽນກັບການຫຼຸດຜ່ອນການລົງໂທດທາງດ້ານເສດຖະກິດ.
ລັດຖະມົນຕີຕ່າງປະເທດ ອີຣ່ານ Javad Zarif ກ່າວຕໍ່ນັກຂ່າວໃນຕອນຄ່ຳຂອງວັນອາທິດວານນີ້ວ່າ “ຄວາມແຕກຕ່າງຍັງຄົງມີຢູ່” ຊ່ຶງທັງສອງຝ່າຍແມ່ນ “ກຳລັງພະຍາຍາມຢູ່.”
ລັດຖະມົນຕີຕ່າງປະເທດ ສະຫະລັດ ທ່ານ John Kerry ໄດ້ກ່າວໃນຕອນເຊົ້າຂອງວັນຈັນມື້ນີ້ວ່າ ໃນເມື່ອການຕົກລົງຂອງທ່ານ ກັບທ່ານ Zarif ຍັງບໍ່ເຄີຍຫຍັບໃກ້ເຂົ້າຫາກັນເທື່ອກໍຕາມ, ແຕ່ບັນຫາອື່ນອີກກໍຍັງມີຄ້າງຄ້າງຢູ່.
ທ່ານ Kerry ກ່າວໄວ້ “ພວກເຮົາຍັງບໍ່ທັນໄປຮອດຈຸດນັ້ນເທື່ອ, ຂ້າພະເຈົ້າຂໍເວົ້າເນັ້ນອີກຕື່ມ”.
ທ່ານ Kerry ແລະທ່ານ Zarif ໄດ້ພົບປະກັນຫຼາຍຄັ້ງໃນວັນອາທິດວານນີ້ ເຊິ່ງຕາມມາດ້ວຍການລາຍງານທີ່ວ່າຈະບັນລຸ ໃນເລື້ອງມາດຕະການການລົງໂທດຕ່າງໆອາດຈະຍົກເລີກໄດ້ ແລະ ວ່າການກວດສອບຂອງ ສປຊ ຈະບອກໄດ້ວ່າ ການເຮັດວຽກດ້ານນິວເຄລຍທີ່ຜ່ານມາຂອງ ອີຣ່ານນັ້ນ ພົວພັນກັບຄວາມພະຍາຍາມພັດທະນາອາວຸດຫຼືບໍ່.
ແຫຼ່ງຂ່າວກ່າວຕໍ່ ວີໂອເອ ວ່າ ອີຣ່ານ ແລະ ກຸ່ມປະເທດທີ່ລວມມີ ສະຫະລັດ, ອັງກິດ, ຈີນ, ຝຣັ່ງ, ຣັດເຊຍ ແລະ ເຢຍລະມັນນຳນັ້ນ ຕົກລົງກັນໄດ້ກ່ຽວກັບບັນຫາການລົງໂທດຊົ່ວຄາວ, ແຕ່ວ່າບັນດາລັດຖະມົນຕີດັ່ງກ່່າວແມ່ນຈະຕ້ອງໄດ້ຮັບຮອງເຫັນດີເສຍກ່ອນ.
