ນັກລົງທຶນຕ່າງປະເທດຍັງບໍ່ມີຄວາມເຊື່ອໝັ້ນຕໍ່ຄວາມໝັ້ນຄົງທາງດ້ານການເງິນຂອງລັດຖະບານລາວ. ເພາະເຫັນວ່າ ລັດຖະບານລາວ ຍັງສືບຕໍ່ ຂໍເງິນກູ້ ແລະ ຂໍການຊ່ວຍເຫລືອ ຈາກຕ່າງປະເທດ ຫລາຍຂຶ້ນນັບມື້.
ຜູ້ຊ່ຽວຊານດ້ານການເງິນຂອງ ຕະຫຼາດຫຼັກຊັບແຫ່ງປະເທດໄທ ເປີດເຜີຍວ່າ ນັກລົງທຶນໃນຕະຫລາດຫລັກຊັບແຫ່ງປະເທດໄທ ທັງທີ່ເປັນຄົນໄທ ແລະ ຊາວຕ່າງປະເທດນັ້ນ ຍັງບໍ່ປະກົດວ່າ ມີພາກສ່ວນໃດສະແດງຄວາມສົນໃຈທີ່ຈະລົງທຶນໃນຕະຫຼາດຫຼັກຊັບແຫ່ງຊາດລາວ ໃນປັດຈຸບັນນີ້ ເພາະຍັງບໍ່ມີຄວາມເຊື່ອໝັ້ນຕໍ່ຄວາມໝັ້ນຄົງດ້ານການເງິນຂອງລັດຖະບານລາວ ເຊິ່ງຍັງສືບຕໍ່ຂໍເງິນກູ້ ແລະຂໍການຊ່ວຍເຫຼືອຈາກຕ່າງປະເທດເປັນດ້ານຫລັກ ຈຶ່ງເຮັດໃຫ້ລັດຖະບານລາວ ມີໜີ້ສິນຕ່າງປະເທດເພີ້ມຂຶ້ນນັບມື້ ໂດຍສະເພາະແມ່ນເງິນກູ້ທີ່ນຳໃຊ້ໃນການພັດທະນາລະບົບພື້ນຖານໂຄງລ່າງຕ່າງໆທີ່ກວມເອົາຫຼາຍກວ່າ 60 ເປີເຊັນຂອງໜີ້ສິນຕ່າງປະເທດທັງໝົດຂອງລັດຖະບານລາວ ໃນປັດຈຸບັນ ຊື່ງລວມເຖິງໜີ້ເງິນກູ້ຂອງຈີນ ທີ່ນຳໃຊ້ເຂົ້າໃນການຮ່ວມລົງທຶນໃນການກໍ່ສ້າງທາງລົດໄຟລາວ-ຈີນ ໃນລາວດ້ວຍນັ້ນ ດັ່ງທີ່ຜູ້ຊ່ຽວຊານທາງດ້ານການເງິນ ໄດ້ໃຫ້ການຢືນຢັນວ່າ
“ໜີ້ກວ່າ 100 ເປີເຊັນຂອງ GDP ທີ່ລາວຕິດໜີ້ຢູ່ນີ້ ແທ້ຈິງແລ້ວ ຖ້າເບິ່ງ 60 ເປີເຊັນ ແມ່ນເງິນກູ້ໄລຍະຍາວ ເປັນໜີ້ທີ່ນຳໃຊ້ເຂົ້າໃນການພັດທະນາປະເທດ. ເອົາໜີ້ທີ່ມາໃຊ້ໃນການສ້າງເຂື່ອນ ສ້າງໂຮງໄຟຟ້າ ກໍ່ສ້າງພື້ນຖານໂຄງລ່າງ ສະນັ້ນ ແທ້ຈິງແລ້ວ, ເງິນກູ້ເຫຼົ່ານີ້ ບໍ່ໜ້າຈະມີບັນຫາທີ່ແບບວ່າເງິນຕ້ອງອອກໄປໝົດໃນທັນທີ ແລະມັນກໍ່ແມ່ນໜີ້ສ່ວນຫລາຍ ທີ່ມາຈາກລົດໄຟຟ້າຄວາມໄວສູງ ປະມານ 6,000 ລ້ານໂດລາ, ແຕ່ນີ້ແມ່ນຫນີ້ສິນໄລຍະຍາວ ແລະລາວເປັນເຈົ້າຂອງ 30 ເປີເຊັນ ສະນັ້ນ ຂ້າພະເຈົ້າຄິດວ່າ ບັນຫາຂອງປະເທດລາວ ກໍຄືລາວອາດຈະລົງທຶນຫຼາຍເກີນໄປ ເມື່ອຫນີ້ສິນເບິ່ງຫຼາຍ ມັນກໍສ້າງຄວາມກັງວົນໃຫ້ແກ່ນັກລົງທຶນ.”
ທັງນີ້ ລັດຖະບານລາວໄດ້ວາງເປົ້າໝາຍການດຶງດູດເງິນຕາຕ່າງປະເທດເຂົ້າສູ່ລະບົບທະນາຄານພາຍໃນປະເທດໃຫ້ໄດ້ 70 ເປີເຊັນຂອງມູນຄ່າການສົ່ງອອກທັງໝົດ ໃນຕະຫຼອດປີ 2024 ນີ້ ໂດຍໃນໄລຍະທີ່ຜ່ານມາ ກໍສາມາດປະຕິບັດໄດ້ແລ້ວກວ່າ 60 ເປີເຊັນ ເຊິ່ງເມື່ອສົມທົບກັບໃນໄຕມາດທີ 4 ຂອງປີນີ້ ຈະເປັນໄລຍະທີ່ສາມາດຂຸດຄົ້ນແຮ່ທາດເພື່ືອສົ່ງອອກໄປຕ່າງປະເທດໄດ້ຫຼາຍຂຶ້ນດ້ວຍແລ້ວ ຈຶ່ງເຊື່ອໝັນວ່າ ຈະສາມາດບັນລຸເປົ້າໝາຍດັ່ງກ່າວ ແຕ່ຍັງມີອີກບັນຫາໜຶ່ງທີ່ສົ່ງຜົນກະທົບຕໍ່ຄວາມໝັ້ນຄົງດ້ານເສດຖະກິດຂອງລາວ ແລະຍັງບໍ່ທັນໄດ້ຮັບການແກ້ໄຂນັ້ນ ກໍຄື ໂຄງສ້າງທາງເສດຖະກິດຂອງລາວ ຍັງຂຶ້ນກັບຕ່າງປະເທດຢ່າງຫຼວງຫຼາຍໃນທຸກດ້ານ. ດັ່ງທີ່ຜູ້ຊ່ຽວຊານດ້ານການຄ້າ ແລະການລົງທຶນໃນອາຊຽນ ໄດ້ໃຫ້ການອະທິບາຍວ່າ
“ໂຄງສ້າງທາງເສດຖະກິດຂອງປະເທດລາວ ກໍຄື ເປັນປະເທດທີ່ຕ້ອງເພິ່ງພາສິນຄ້າອຸບປະໂພກບໍລິໂພກ ແລະສິນຄ້າທີ່ຈຳເປັນ ເຊັ່ນນ້ຳມັນຈາກຕ່າງປະເທດ ຈຶ່ງເຮັດໃຫ້ເງິນຕາຕ່າງປະເທດໄຫຼອອກນອກປະເທດ ເພາະສະນັ້ນ ການອ່ອນຄ່າຂອງເງິນກີບ ກໍເຮັດໃຫ້ເງິນຕາຕ່າງປະເທດຫລຸດລົງດ້ວຍ ໃນເມື່ອກ່ອນມີປະມານ 2,000-3,000 ລ້ານໂດລາສະຫະລັດ ໃນປັດຈຸບັນຍັງເຫຼືອຢູ່ປະມານ 1,000 ລ້ານໂດລາສະຫະລັດ ຍ້ອນເຫດນັ້ນ ເງິນຕາຕ່າງປະເທດບໍ່ເຂົ້າ. ໃນເວລາດຽວກັນ, ມັນຈໍາເປັນຕ້ອງກິນ - ຕ້ອງນໍາໃຊ້. ເນື່ອງຈາກວ່າໂຄງສ້າງເສດຖະກິດແມ່ນຂຶ້ນກັບສິນຄ້າຈາກຕ່າງປະເທດ ເງິນຕາຕ່າງປະເທດທີ່ມີຢູ່ ກໍຕ້ອງເອົາໄປຊື້."
ແຕ່ຢ່າງໃດກໍ່ຕາມ ປະລິມານເງິນຕາຕ່າງປະເທດທີ່ໝູນວຽນຢູ່ໃນລະບົບທະນາຄານລາວ ໃນປັດຈຸບັນຄິດເປັນສັດສ່ວນຫຼາຍກວ່າ 70 ເປີເຊັນຂອງມູນຄ່າທັງໝົດນັ້ນ ກໍຄືເງິນຕາທີ່ຝາກໂດຍບັນດາບໍລິສັດຕ່າງປະເທດ ແລະນັກທຸລະກິດຊາວຕ່າງຊາດທີ່ດຳເນີນທຸລະກິດການຄ້າ ແລະລົງທຶນຢູ່ໃນລາວ ໝາຍຄວາມວ່າໃນລະບົບເສດຖະກິດຂອງລາວ ທີ່ຕິດພັນກັບການຊໍາລະເງິນຕາຕ່າງປະເທດ ສາມາດເພິ່ງພາຕົນເອງໄດ້ບໍ່ເຖິງ 30 ເປີເຊັນເທົ່ານັ້ນ.
ສ່ວນລາຍຮັບຈາກການສົ່ງອອກໄຟຟ້າທີ່ມີມູນຄ່າສະເລ່ຍເກີນກວ່າ 2,700 ລ້ານໂດລາສະຫະລັດ ໃນແຕ່ລະປີນັ້ນ ສ່ວນໃຫຍ່ຈະຕ້ອງໃຊ້ເພື່ອຊຳລະຄືນເງິນກູ້ຈາກຕ່າງປະເທດ ຈຶ່ງເຫລືອລາຍຮັບພຽງແຕ່ສ່ວນໜ້ອຍທີ່ຖືກໂອນເຂົ້າສູ່ລະບົບທະນາຄານພາຍໃນລາວ ແລະເຮັດໃຫ້ທະນາຄານໃນລາວ ມີເງິນຕາຕ່າງປະເທດຢ່າງຈຳກັດ ຈຶ່ງບໍ່ສາມາດຕອບສະໜອງຄວາມຕ້ອງການເງິນຕາຕ່າງປະເທດຂອງບັນດາຫົວໜ່ວຍທຸລະກິດໃນລາວ ໄດ້ຢ່າງພຽງພໍ ແລະບັນຫາທີ່ຕາມມາ ກໍຄືການແລກປ່ຽນເງິນຢູ່ນອກລະບົບທະນາຄານ ແລະກໍໄດ້ກາຍເປັນຄວາມບໍ່ເຊື່ອໝັ້ນຕໍ່ຄ່າເງິນກີບຂອງລາວ ໃນປັດຈຸບັນນີ້.
ຟໍຣັມສະແດງຄວາມຄິດເຫັນ