ບັນດານັກດັບເພີງໃນພາກໃຕ້ຂອງລັດຄາລິຟໍເນຍ ກໍາລັງຕໍ່ສູ້ກັບໄຟປ່າຂະໜາດໃຫຍ່ຫຼາຍແຫ່ງໃນຂົງເຂດນະຄອນ ລອສ ແອນ ເຈີເລັສ ໃຫ້ຢູ່ພາຍໃຕ້ການຄວບຄຸມໃນວັນຈັນມື້ນີ້ ເນື່ອງຈາກນັກພະຍາກອນອາກາດອອກມາເຕືອນວ່າ ລົມແຮງທີ່ພັດມາຄັ້ງໃໝ່ອາດເຮັດໃຫ້ເກີດ “ໄຟໄໝ້ລຸກລາມອີກຄັ້ງ.”
ກົມອຸຕຸນິຍົມ ແລະ ອຸທົກກະສາດແຫ່ງຊາດອອກມາເຕືອນວ່າ ໄພຂົ່ມຂູ່ຈາກລົມຄັ້ງໃໝ່, ສ້າງຄວາມກັງວົນທີ່ສຸດທີ່ຈະເກີດຂື້ນໃນວັນອັງຄານມື້ອື່ນນີ້, ຄາດວ່າຄວາມໄວຂອງລົມຈະມີຮອດ 80 ກິໂລແມັດຕໍ່ຊົ່ວໂມງ ແລະຄວາມແຮງຂອງລົມຮອດ 110 ກິໂລແມັດຕໍ່ຊົ່ວໂມງ.
ຄວາມແຮງຂອງລົມ ແລະສະພາບແຫ້ງແລ້ງຢູ່ໃນພື້ນທີ່ ທີ່ບໍ່ມີຝົນຕົກໜັກມາເປັນເວລາຫຼາຍກວ່າ 8 ເດືອນ ສົ່ງຜົນເຮັດໃຫ້ເກີດໄຟໄໝ້ທີ່ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 24 ຄົນ ເຊິ່ງໄດ້ສ້າງຄວາມເສຍຫາຍຫຼາຍຕື້ໂດລາ ນັບຕັ້ງແຕ່ເລີ້ມຕົ້ນຂຶ້ນໃນຊ່ວງນຶ່ງອາທິດທີ່ຜ່ານມາ.
ລົມທີ່ພັດຊ້າລົງໃນຊ່ວງນີ້ ໄດ້ເຮັດໃຫ້ເຈົ້າໜ້າທີ່ດັບເພີງ ສາມາດຄວບຄຸມໄຟໄດ້ບາງສ່ວນ ໂດຍໄດ້ຮັບຄວາມຊ່ວຍເຫຼືອຈາກການຫວ່ານນ້ຳ ແລະສານຄວບຄຸມໄຟ.
ໃນຈຳນວນໄຟໄໝ້ຂະໜາດໃຫຍ່ສາມຄັ້ງທີ່ຍັງໄໝ້ຢູ່ໃນຂົງເຂດນະຄອນ ລອສ ແອນເຈີເລັສ, ກົມດັບເພີງຂອງລັດຄາລິຟໍເນຍກ່າວໃນຕອນແລງຂອງວັນອາທິດວານນີ້ວ່າ ໄຟທີ່ໄໝ້ໃນຂົງເຂດ ພາລິເຊດ ຖືກຄວບຄຸມໄປແລ້ວ 13 ເປີເຊັນ ແລະໄດ້ເຜົາໄໝ້ກິນເນື້ອທີ່ຈໍານວນ 96 ກິໂລແມັດມົນທົນ.
ເຈົ້າໜ້າທີ່ກ່າວວ່າ 8 ຄົນໃນຈໍານວນຜູ້ເສຍຊີວິດ ແມ່ນຍ້ອນໄຟປ່າ ພາລິເຊດ ຢູ່ບໍລິເວນຂົງເຂດ ພາລິເຊດ ປາຊີຟິກ.
ຜູ້ເສຍຊີວິດ 16 ຄົນ ແມ່ນມາຈາກໄຟປ່າ ອີຕັນ (Eaton), ເຊິ່ງຕັ້ງຢູ່ໃນພື້ນທີ່ເລິກເຂົ້າໄປໃນໃນຂົງເຂດ ປາຊາເດນາ ແລະ ອາລຕາເດນາ (Altadena) ຕອນເໜືອ, ເຊິ່ງຄວບຄຸມໄດ້ແລ້ວ 27 ເປີເຊັນ ແລະຖືກເຜົາໄໝ້ປະມານ 60 ກິໂລແມັດມົນທົນ.
In photos: Scale of devastation from California wildfires
ກົມດັບເພີງຂອງລັດຄາລິຟໍເນຍກ່າວວ່າ ແປວໄຟອີກແຫ່ງນຶ່ງ ແມ່ນໄຟປ່າ ເຮີສທ໌ (Hurst) ໃນບໍລິເວນຂົງເຂດ ຊີລມາຣ໌ (Sylmar), ແມ່ນຄວບຄຸມໄດ້ແລ້ວ 89 ເປີເຊັນ, ລຸນຫຼັງໄຟໄດ້ເຜົາໄໝ້ເນື້ອທີ່ຫຼາຍກວ່າ 3 ກິໂລແມັດມົນທົນ.
ໄຟໄໝ້ທັງໝົດ ໄດ້ທໍາລາຍສິ່ງກໍ່ສ້າງຫຼາຍກວ່າ 12,000 ແຫ່ງ.
ປະຊາຊົນປະມານ 100,000 ຄົນ ຍັງຄົງຢູ່ພາຍໃຕ້ຄໍາສັ່ງໃຫ້ອົບພະຍົບໃນຕອນແລງຂອງວັນອາທິດວານນີ້, ໂດຍເຈົ້າໜ້າທີ່ກ່າວວ່າ ຈະບໍ່ອະນຸຍາດໃຫ້ປະຊາຊົນກັບຄືນໄປໃນບໍລິເວນຕ່າງໆທີ່ມີຄວາມສ່ຽງຕໍ່ໄຟໄໝ້ ໃນຂະນະທີ່ຄໍາເຕືອນກ່ຽວກັບລົມແຮງຄັ້ງໃໝ່ຍັງຄົງມີຢູ່.
ໂຮງຮຽນບາງແຫ່ງທີ່ຖືກຍົກເລີກການຮຽນໃນອາທິດແລ້ວນີ້ ແມ່ນໄດ້ເປີດຄືນໃນວັນຈັນມື້ນີ້. ໃນນັ້ນ ທີມບານບ້ວງ ລອສ ແອນເຈີເລັສ ເລກເກີ້ (Los Angeles Lakers) ແລະ ທີມ ລອສ ແອນເຈີເລັສ ຄລິບເປີ (Los Angeles Clippers) ຂອງສະມາຄົມບານບ້ວງແຫ່ງຊາດ ກໍກຽມກັບມາເປີດເກມຄືນອີກຄັ້ງໃນວັນຈັນມື້ນີ້ ລຸນຫຼັງຖືກຍົກເລີກເກມໄປເນື່ອງຈາກເຫດການໄຟໄໝ້.
ຟໍຣັມສະແດງຄວາມຄິດເຫັນ