ຄະນະກຳມະການຕຸລາການຂອງສະພາສູງ ມີໝາຍກຳນົດທີ່ຈະລົງຄະແນນສຽງໃນຕອນ
ເຊົ້າວັນສຸກມື້ນີ້ ກ່ຽວກັບ ການຮັບຮອງເອົາ ການສະເໜີແຕ່ງຕັ້ງໃຫ້ ທ່ານແບຣັດ ຄາແວນໍ
ເປັນຜູ້ພິພາກສາສານສູງສຸດຂອງສະຫະລັດ ນຶ່ງມື້ຫຼັງຈາກໄດ້ມີການໃຫ້ການທີ່ຮ້ອນແຮງ
ຂອງຜູ້ພິພາກສາສານອຸທອນ ແລະ ທ່ານນາງ ຄຣິສຕີນ ແບລຊີ ຝອດ ແມ່ຍິງຜູ້ທີ່ກ່າວຫາ
ທ່ານວ່າ ລວນລາມທາງເພດຕໍ່ທ່ານນາງນັ້ນ.
ຄະນະກຳມະການ ທີ່ປະກອບດ້ວຍສະມາຊິກ ພັກຣີພັບບລີກັນ 11 ຄົນ ແລະ ພັກເດໂມ
ແຄຣັດ 10 ຄົນນັ້ນ ຈະເປັນຜູ້ຕັດສິນ ກ່ຽວກັບວ່າ ຈະສະເໜີແນະໃຫ້ສົ່ງເລື້ອງຂອງທ່ານ
ຄາແວນໍ ໄປໃຫ້ສະພາສູງຄົບຄະນະ ຊຶ່ງຈະເລີ້ມຂັ້ນຕອນໃນການລົງຄະແນນສຽງໃນວັນ
ເສົາມື້ອື່ນນີ້.
ສະມາຄົມພວກນັກກົດໝາຍອາເມຣິກັນທີ່ເອີ້ນຫຍໍ້ວ່າ ABA ໄດ້ຮຽກຮ້ອງໃນຕອນແລງ
ວັນພະຫັດວານນີ້ ໃຫ້ຄະນະກຳມະການຕຸລາການ ແລະສະພາສູງ ຄົບຄະນະເລື່ອນເວ
ລາໃນການລົງຄະແນນສຽງອອກໄປ ຈົນກວ່າອົງການສັນຕິບານກາງຫຼືເອັຟບີອາຍມີເວ
ລາພຽງພໍ ເພື່ອຈະສືບສວນເບິ່ງປະຫວັດໂດຍເຕັມກ່ຽວກັບການກ່າວອ້າງຂອງທ່ານນາງ
ຝອດ ແລະແມ່ຍິງຄົນອື່ນໆ.
ໜັງສືຂອງສະມາຄົມພວກນັກກົດໝາຍອາເມຣິກັນ ທີ່ສົ່ງໄປຫາພວກຜູ້ນຳຂອງຄະນະ
ກຳມະການກ່າວວ່າ “ພວກເຮົາໄດ້ທຳການຂໍຮ້ອງນີ້ເພາະວ່າ ສະມາຄົມ ABA ເຄົາລົບ
ການປົກຄອງດ້ວຍຕົວບົດກົດໝາຍ ແລະຂັ້ນຕອນພາຍໃຕ້ກົດໝາຍ ການແຕ່ງຕັ້ງໃນ
ແຕ່ລະເທື່ອ ເພື່ອເຂົ້າຮັບຕຳແໜ່ງໃນສານສູງສຸດຂອງປະເທດພວກເຮົາ ແມ່ນມີຄວາມ
ສຳຄັນຫຼາຍກວ່າທີ່ຈະເລັ່ງລັດໃນການລົງຄະແນນສຽງ.”
ຍັງບໍ່ທັນເປັນທີ່ຈະແຈ້ງເທື່ອວ່າ ພັກຣີພັບບລີກັນຈະມີຄະແນນພຽງພໍຫຼືບໍ່ເພື່ອຮັບຮອງ
ເອົາການສະເໜີແຕ່ງຕັ້ງຂອງພວກທ່ານ ຫຼັງຈາກໄດ້ມີການໃຫ້ການແບບຮ້ອນແຮງໃນ
ວັນພະຫັດວານນີ້ ເວລາທ່ານຄາແວນໍໄດ້ປະຕິເສດດ້ວຍຄວາມໂກດແຄ້ນ ຕໍ່ການກ່າວ
ຫາວ່າທ່ານລວນລາມທາງເພດ ທ່ານນາງຝອດທີ່ງານພາຕີ້ແຫ່ງນຶ່ງໃນປີ 1982 ໃນເວ
ລາທີ່ພວກທ່ານ ຍັງເປັນໄວລຸ້ນຢູ່ນັ້ນ. ບຸກຄົນທັງສອງ ຕ່າງກໍໄດ້ເລົ່າ ເລື້ອງລາວຂອງ
ພວກທ່ານໃຫ້ຄະນະກຳມະການຕຸລາການຟັງ ໃນການໃຫ້ການທີ່ຍືດຍາວ ເປັນເວລາ
ເກືອບ 9 ຊົ່ວໂມງ.
ໃນຕອນແລງ ຂອງວັນພະຫັດວານນີ້ ສະມາຊິກສະພາສູງ ບອບ ຄອກເກີ ຈາກລັດເທັນ
ເນສຊີປະກາດວ່າ ທ່ານຈະລົງຄະແນນສຽງສະໜັບສະໜຸນໃຫ້ທ່ານຄາແວນໍ ເຂົ້າໄປນັ່ງ
ຢູ່ໃນສານສູງສຸດ ໃນຂະນະທີ່ທ່ານກ່າວວ່າ ມັນເປັນຄວາມກ້າຫານທີ່ທ່ານນາງຝອດໄດ້
ໄປໃຫ້ການ ແຕ່ກໍບໍ່ມີຫຼັກຖານໃດໆ ສະໜັບສະໜຸນຕໍ່ການກ່າວຫາຂອງທ່ານນາງ.
ສ່ວນສະມາຊິກສະພາສູງແຈັຟ ເຟລັກ ຈາກລັດອາຣີໂຊນາ ກ່າວວ່າ ທ່ານກໍເຕັມໃຈທີ່ຊັ່ງ
ຊາການລົງຄະແນນສຽງຂອງທ່ານ ຫຼັງຈາກໄດ້ຮັບຟັງ ຄຳໃຫ້ການ ຂອງທ່ານນາງຝອດ
ແລະທ່ານຄາແວນໍແລ້ວ.
ເມື່ອມີການຖາມວ່າ ທ່ານຈະລົງຄະແນນສຽງແບບໃດນັ້ນ ທ່ານເຟລັກຕອບວ່າ “ປ່ອຍ
ໃຫ້ຂ້ອຍຈັດການກັບມັນເອງ.”
ທ່ານນາງຮາຍດີ ຮີດແຄມປ໌ ສະມາຊິກສະພາສູງ ພັກເດໂມແຄຣັດ ຈາກລັດດາໂກຕ້າ
ເໜືອ ກໍກ່າວວ່າ ທ່ານນາງຕ້ອງການເວລາ ທີ່ຈະຕັດສິນໃຈກ່ຽວກັບວ່າຈະລົງຄະແນນ
ສຽງແບບໃດ. ທ່ານນາງຈະລົງສະໝັກຕື່ມອີກ ຢູ່ໃນລັດ ທີ່ມີການລົງຄະແນນສຽງເປັນ
ສ່ວນໃຫຍ່ ໃຫ້ແກ່ປະທານາທິບໍດີດໍໂນລ ທຣຳ.
