ລິ້ງ ສຳຫລັບເຂົ້າຫາ

logo-print

ປ. ທຣໍາ ຈະໄປ ລັດຄາໂຣໄລນາເໜືອ ມື້ນີ້ ເພື່ອກວດເບິ່ງ ຄວາມເສຍ​ຫາຍ ຈາກພາ​ຍຸ ເຮີຣິເຄນ ຟລໍເຣັນສ໌


ພາບຖ່າຍຈາກເຮືອບິນສະແດງໃຫ້ເຫັນວ່າ ເນື້ອທີ່ສວນຖືກທໍາລາຍຍ້ອນພາຍຸເຮີຣິເຄນຟລໍເຣັນສ໌ ຢູ່ພາກຕາເວັນອອກຂອງລັດຄາໂຣໄລນາເໜືອ ໃນວັນທີ 17 ກັນຍາ, 2018.

ປະທານາທິບໍດີ ດໍໂນລ ທຣໍາ ຂອງສະຫະລັດ ມີແຜນທີ່ຈະໄປຢ້ຽມຢາມລັດຄາໂຣໄລ
ນາເໜືອ ໃນວັນພຸດມື້ນີ້ ເພື່ອກວດ​ກາ ເບິ່ງຄວາມເສຍ​ຫາຍ ທີ່ເກີດ ຂຶ້ນຈາກການ
ທໍາລາຍ ຂອງພາຍຸເຮີຣິເຄນຟລໍເຣັນສ໌ ແລະການດໍາເນີນຄວາມ ພະຍາຍາມບັນ
ເທົາທຸກທີ່ຫຍຸ້ງຍາກລໍາບາກ.

ທ່ານທຣໍາໄດ້ຂຽນລົງໃນທວີດເຕີ ໃນວັນອັງຄານວານນີ້ວ່າ "ທຸກຄົນເວົ້າວ່າ ພວກເຮົາ
ຈັ່ງແມ່ນເຮັດໄດ້ດີ ໃນການຮັບມືກັບພາຍຸເຮີຣິເຄນຟລໍເຣັນສ໌ ແລະ ພວກເຂົາເຈົ້າກໍ
ເວົ້າຖືກ 100 ເປີເຊັນເລີຍ."

ບ້ານເຮືອນໃນລັດຄາໂຣໄລນາເໜືອ ຖືກນໍ້າຖ້ວມ ຍ້ອນພາຍຸເຮີຣິເຄນ ຟລໍເຣນສ໌ ພັດຜ່ານໄປ ໃນວັນທີ 17 ກັນຍາ, 2018
ບ້ານເຮືອນໃນລັດຄາໂຣໄລນາເໜືອ ຖືກນໍ້າຖ້ວມ ຍ້ອນພາຍຸເຮີຣິເຄນ ຟລໍເຣນສ໌ ພັດຜ່ານໄປ ໃນວັນທີ 17 ກັນຍາ, 2018

ທ່ານເອີ້ນພວກເຈົ້າໜ້າທີ່ກູ້ໄພສຸກເສີນຂອງລັດຖະບານກາງ, ພວກທະຫານແລະ
ພວກຮັບມືກັບໄພພິບັດທໍາອິດວ່າ ເປັນພວກ " ເຮັດໄດ້ຢ່າງໜ້າເຫລືອເຊື່ອ." ແຕ່
ທ່ານທຣໍາ ກໍໄດ້ໂຈມຕີພວກທີ່ສັງກັດພັກເດໂມແຄຣັດເຊັ່ນກັນໂດຍ ເວົ້າວ່າພວກ
ເຂົາເຈົ້າ ຈັກໜ້ອຍກໍຈະຕົວະວ່າ ການຮັບມືກັບລົມພາຍຸນີ້ "ແມ່ນຂີ້ຮ້າຍຫລາຍ."

ຖະໜົນ 76 ຢູ່ລັດຄາໂຣໄລນາເໜືອຖືກຕັນໄວ້ ຍ້ອນນໍ້າຖ້ວມໃນວັນທີ 18 ກັນຍາ, 2018 ພາຍຫລັງພາຍຸເຮີຣິເຄນ ຟລໍເຣນສ໌ ໄດ້ພັດຜ່ານໄປແລ້ວ
ຖະໜົນ 76 ຢູ່ລັດຄາໂຣໄລນາເໜືອຖືກຕັນໄວ້ ຍ້ອນນໍ້າຖ້ວມໃນວັນທີ 18 ກັນຍາ, 2018 ພາຍຫລັງພາຍຸເຮີຣິເຄນ ຟລໍເຣນສ໌ ໄດ້ພັດຜ່ານໄປແລ້ວ

ທ່ານປະທານາທິບໍດີມີຄວາມໂກດເຄືອງຕໍ່ເລື້ອງທີ່ທ່ານເຫັນວ່າພວກສັງກັດພັກ
ເດໂມແຄຣັດ ເພີ້ມໂຕເລກຂອງຄົນຕາຍຍ້ອນພາຍຸເຮີຣິເຄນ ຢູ່ໃນເກາະ ເປີໂຕ
ຣິໂກໃນປີກາຍນີ້ ຂຶ້ນ ເພື່ອເຮັດໃຫ້ທ່ານມີພາບພົດອັນບໍ່ດີ.


ພາຍຸເຮີຣິເຄນ ຟລໍ​ເຣັນສ໌ ໄດ້ເຮັດໃຫ້ຢ່າງໜ້ອຍ 32 ຄົນເສຍຊີວິດ ແລະປ່ອຍໃຫ້
ບັນດາເມືອງຕ່າງໆ ຢູ່ໃນລັດຄາໂຣໄລນາເໜືອ ຖືກນໍ້າຂີ້ຕົມແລະນໍ້າເນົ່າເໝັນຖ້ວມ
ໄປໝົດ.

ພວກເຈົ້າໜ້າທີ່ຢູ່ທົ່ວລັດດັ່ງກ່າວ ໄດ້ເຕືອນໃຫ້ປະຊາຊົນອາໄສຢູ່ທີ່ນັ້ນພາກັນລະ
ວັງ ບໍ່ໃຫ້ຫລົງດີໃຈວ່າ ຈະບໍ່ມີນໍ້າຖ້ວມອີກ ເມື່ອເຫັນວ່າມີແດດອອກມາ ໃນວັນ
ອັງຄານວານນີ້ ແລະເວົ້າວ່າ ຄາດກັນວ່າຈະມີນໍ້າຖ້ວມອີກໃນອາທິດນີ້.

ຜູ້ປົກຄອງ​ລັດຄາໂຣໄລນາເໜືອ ທ່ານ​ ຣອຍ ຄູບ​ເປີ ທີ່ສັງກັດພັກເດໂມແຄຣັດ
ເວົ້າວ່າ ແມ່ນໍ້າ 16 ສາຍ ແມ່ນຢູ່ໃນຂັ້ນທີ່ອັ່ງລົ້ນຂຶ້ນມາຖ້ວມຢ່າງໃຫຍ່ ໃນວັນ
ອັງຄານວານນີ້ ແລະອີກສາມສາຍ ຄາດວ່າຈະລົ້ນຂຶ້ນມາຖ້ວມເຊັ່ນກັນ ໃນວັນ
ພະຫັດທີ່ຈະມາເຖິງນີ້.

ທ່ານກ່າວອີກວ່າ “ສະພາບຖະໜົນຫົນທາງກໍາລັງຢູ່ໃນສະພາບທີ່ເລີ້ມໄຄຂຶ້ນ ຢູ່ໃນບາງສ່ວນຂອງລັດພວກເຮົາ ແຕ່ວ່າ ຫ້ວຍຮ່ອງ, ຄອງບຶງ ແລະແມ່ນໍ້າ ທີ່
ກໍາລັງມີນໍ້າຍື່ງຂຶ້ນນັ້ນ ແມ່ນສືບຕໍ່ເຮັດໃຫ້ການເດີນທາງໄປມາ ບໍ່ປອດໄພ.”

ຫລາຍພາກສ່ວນຂອງທາງດ່ວນໃຫຍ່ ທີ່ຕິດຕໍ່ໃສ່ຫລາຍໆລັດສອງສາຍຍັງຖືກ
ນໍ້າຖ້ວມຢູ່ ໃນວັນອັງຄານວານນີ້. ທ່ານ ຄູບ​ເປີ ໄດ້ເຕືອນວ່າ ບັນດາປະຊາຊົນ ທີ່
ອາໄສຢູ່ໃນເມືອງທີ່ແຄມຝັ່ງທະເລ ບາງບ່ອນ ລວມທັງເມືອງວີລມິງຕັນ ທີ່ຖືກ
ນໍ້າຖ້ວມໄວ້ໝົດ ໂດຍບໍ່ສາມາດອອກໄປໃສໄດ້ນັ້ນ ແມ່ນບໍ່ໃຫ້ກັບຄືນໄປຫາ
ເຮືອນຂອງພວກເຂົາເຈົ້າ ເຖິງແມ່ນວ່າ ຢາກໄປຫລາຍປານໃດກໍຕາມ.

ອ່ານ​ຂ່າວນີ້ເພີ້ມເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG