ຫ້າຄົນເສຍຊີວິດ ຈາກການໂຈມຕີ ທີ່ປາກິສຖານ

ບັນດາ​ເຈົ້າ​ໜ້າ​ທີ່ປ​າກິ​ສຖານ ກ່າວ​ວ່າ ພວກ​ກໍ່​ການ​ຮ້າຍທີ່​ນຸ່ງ
​ເຄື່ອງ​ແບບ​ຕໍາ​ຫລວດ ໄດ້ໂຈມ​ຕີໂຮງການຂອງເຈົ້າ​ໜ້າ​ທີ່​ຂັ້ນ
​ສູງ​ຄົນ​ນຶ່ງຂອງ ລັດຖະບານ ທີ່ເມືອງ ​Peshawar ​ທາງພາກ​
ຕາ​ເວັນ​ຕົກ​ສຽງ​ເໜືອ​ຂອງ ປະ​ເທດ ​ໂດຍ​ໄດ້ສັງຫານ​ຢ່າງ​ໜ້ອຍ
5 ​ຄົນ ​ແລະເຮັດ​ໃຫ້​ບາດ​ເຈັບ ​7 ​ຄົນ.

ເຈົ້າ​ໜ້າ​ທີ່​ກ່າວ​ອີກວ່າ ຄົນ​ຮ້າຍ ຢ່າງ​ໜ້ອຍ​ສອງ​ຄົນ ​ເປັນ​ຄົນ​ວາງ​ລ​ະ​ເບີດ​ສະລະ​ຊີບ ທີ່​ກົດ​ຂະ​ນວນ​ລະ​ເບີດຂອງ​ຕົນ​ໃຫ້​ແຕກ​ຂຶ້ນ ​ໃນ​ວັນ​ຈັນ​ມື້​ນີ້ ​ໃນ​ຂະນະ​ທີ່​ພວກ​ກໍ່​ການ​ຮ້າຍ​ຄົນ​ອື່ນ​ໆ​ ພາກັນຍິງ​ສຸມ​ໃສ່​ກໍາລັງ​ຮັກ ສາ​ຄວາມ​ປອດ​ໄພ ຢູ່​ໃນ​ບໍລິ​ເວນ​ໂຮງການ​ນັ້ນ.
ຜູ້​ເສຍ​ຊີວິດ​ມີຮວມ​ທັງ​ເຈົ້າ​ໜ້າ​ທີ່​ຮັກສາ​ຄວາມ​ປອດ​ໄພ​ສີ່​ຄົນ ​ແລະ​ຜູ້​ຊາຍ​ເຖົ້າ ​ອີກ​ນຶ່ງ​ຄົນ.

ຍັງ​ບໍ່​ທັນ​ມີ​ການ​ອ້າງ​ເອົາ​ຄວາມ​ຮັບຜິດຊອບ​ໃນ​ທັນທີນີ້​ເທື່ອ ສໍາລັບການ ​ໂຈມຕີ​ໃນ​ວັນ​ຈັນ​ມື້​ນີ້ ​ແຕ່່​ວ່າຜ່ານ​ມາ ພວກ​ທາ​ລິ​ບານ​ໃນປາ​ກິ​ສຖານ ເຄີຍໄດ້​ທໍາການໂຈມຕີ ທີ່​ຄ້າຍຄື​ກັນ​ນີ້​.

ຢູ່​ແຫ່ງ​ອື່ນ​ໆໃນປາ​ກິ​ສຖານ ​ໃນ​ວັນ​ຈັນ​ມື້​ນີ້ ຊາວ​ Shi’ite ​ໃນເມືອງ Quetta ພາກັນ​ບໍ່​ຍອມ​ຝັງ​ສົບ​ບັນດາ​ຜູ້​ເຄາະ​ຮ້າຍ ​ໃນ​ການ​ວາງ​ລະ​ເບີດ ນອງ​ເລືອດ ທີ່​ໄດ້​ສັງຫານ​ຢ່າງ​ໜ້ອຍ 80 ຄົນ ​ແລະເຮັດ​ໃຫ້​ບາດ​ເຈັບ ອີກຫລາຍ​ກວ່າ 100 ຄົນ ​ໃນ​ວັນ​ເສົາ​ຜ່ານ​ມາ. ​ເຂົາ​ເຈົ້າທວງໃຫ້ກໍາລັງ ຮັກສາຄວາມ​ປອດ​ໄພ ປົກປ້ອງ​ພວກ​ເຂົາ​ເຈົ້າ​ຈາກພວກ​ຫົວ​ຮຸນ​ແຮງ​ທີ່ຢູ່​ເບື້ອງ​ຫລັງ​ການ​ໂຈມ​ຕີ.

ຫລາຍ​ພັນຄົນ​ໄດ້​ພາກັນ​ເຂົ້າຮ່ວມ​ປະ​ທ້ວງ. ຕາມປະ​ເພນີ​ຂອງ​ຊາວ​ມຸສ ລິ​ມ ​ແມ່ນຕ້ອງ​ໄດ້​ນໍາ​ເອົາສົບຄົນ​ຕາຍ​ໄປ​ຝັງ​ໄວ​ເທົ່າ​ທີ່​ຈະ​ໄວ​ໄດ້ ​ແລະ​ການ​ປະປ່ອຍສົບ​ໄວ້​ຢູ່​ເທິງໜ້າ
ດິນ​ ແມ່ນ​ເປັນ​ການສະ​ແດງ​ອອກ​ເຖິງ​ຄວາມໂສກ​ເສົ້າ ​ແລະ​ເຈັບ​ປວດ.

ກຸ່ມ​ກໍ່​ການ​ຮ້າຍ Sunni Lashkar-e-Jhangvi ​ໄດ້ອ້າງ​ເອົາ​ຄວາມ​ຮັບຜິດຊອບ​ສໍາ
ລັບການ​ວາງ​ລ​ະ​ເບີດ​ໃນ​ວັນ​ເສົານັ້ນ ພ້ອມ​ທັງ​ການ​ໂຈມຕີ​ຄ້າຍຄື​ກັນ​ໃນ​ເດືອນ​ແລ້ວ​ນີ້ ທີ່​ໄດ້​ສັງຫານ​ເກືອບ 100 ຄົນ.

​ໃນ​ຂະນະ​ດຽວ​ກັນ ການ​ຢຸດ​ງານໃນ​ວັນ​ຈັນ​ມື້​ນີ້ ເພື່ອເປັນ​ການ​ປະ​ທ້ວງ​ຕ້ານການວາງ​ລ​ະ​ເບີດ​ໃນ​ເມືອງ Quetta ນັ້ນ ​ໄດ້ເຮັດໃຫ້​ Karachi ຊຶ່ງ​ເປັນ​ເມືອງ​ໃຫຍ່​ສຸດ​ຂອງປາ​ກິ​ສຖານ ບໍ່​ມີ​ການ​ເຄື່ອນ​ໄຫວ​ເໜັງ​ຕິງ.

ຄວາມ​ຮຸ່ນ​ແຮງ​ທາງ​ສາສະໜາ ​ໄດ້​ເອົາ​ເສຍຊີວິດ​ໄປ​ຫລາຍກວ່າ 400 ຄົນ​ ​ຢູ່​ໃນປາ​ກິ​ສ
ຖານ ​ໃນ​ປີ​ແລ້ວ​ນີ້.