ລິ້ງ ສຳຫລັບເຂົ້າຫາ

logo-print

ປາ ແລະ ສັດ​ນ້ຳ​ໃນ​ແມ່​ນ້ຳ ລີກ ຕາຍຫຼວງຫຼາຍ​ ໂດຍ​ມີ​ສາ​ເຫດ​ມາ​ຈາກ​ສານ​ເຄ​ມີ​ຮົ່ວ​ໄຫຼ ​ຈາກ​ພື້ນ​ທີ່​ກໍ່​ສ້າງ ​ທາງ​ລົດ​ໄຟ ລາວ-ຈີນ


ຖັງ​ສານ​ເຄ​ມີ​ຢູ່​ສະ​ຖານ​ທີ່​ກໍ່​ສ້າງ​ທາງ​ລົດ​ໄຟ ລາວ ຈີນ.

ປາ ແລະ ສັດ​ນ້ຳ​ໃນ​ແມ່​ນ້ຳ ລີກ ຕາຍ​ເປັນ​ຈຳ​ນວນຫຼວງຫຼາຍ​ ໂດຍ​ມີ​ສາ​ເຫດ​ມາ​ຈາກ​ສານ​ເຄ​ມີ​ຮົ່ວ​ໄຫຼ​ຈາກ​ພື້ນ​ທີ່​ກໍ່​ສ້າງ​ທາງ​ລົດ​ໄຟ ລາວ-ຈີນ ຢູ່​ໃນ​ເຂດ​ເມືອງ ກາ​ສີ ແຂວງວຽງ​ຈັນ.


ເຈົ້າ​ໜ້າ​ທີ່​ໃນ​ຜະ​ແນກ​ຊັ​ບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ​ຂອງ​ແຂວງວຽງ​ຈັນ ໄດ້​ໃຫ້​ການ​ຢືນ​ຢັນ​ວ່າ ສານ​ເຄ​ມີ​ທີ່​ໃຊ້​ສຳ​ລັບ​ເລັ່ງ​ໃຫ້​ປູນ​ຊີ​ເມັນ​ແຫ້ງ​ໄວ​ຂຶ້ນ ທີ່​ກຸ່ມ​ບໍ​ລິ​ສັດ Sino-Hydro ຈາກ ຈີນ ໄດ້​ນຳ​ໃຊ້​ໃນ​ໂຄງ​ການ​ກໍ່​ສ້າງ​ທາງ​ລົດ​ໄຟ ລາວ-ຈີນ ນັ້ນ​ໄດ້​ເກີດ​ການ​ຮົ່ວ​ໄຫຼ​ອອກ​ຈາກ​ຖັງ​ບັນ​ຈຸ​ຂະ​ໜາດ​ 1,000 ລິດ​ແລ້ວ​ໄຫຼ​ລົງ​ສູ່​ຫ້ວ​ຍ​ຫີນ​ຊາ ແລະ ນ້ຳ​ລີກ ຢູ່​ໃນ​ເຂດ​ບ້ານ ໂພນແບ່ງ, ບ້ານ ວຽງ​ຄຳ ແລະ ບ້ານ​ວຽ​ງ​ແກ້ວ ເມືອງ​ກາ​ສີ ເມື່ອ​ວັນ​ທີ 17 ກຸມ​ພາ​ 2020 ຊຶ່ງ​ເຮັດ​ໃຫ້​ປາ ແລະ ສັດ​ນ້ຳ​ຕາຍ​ໄປ​ເປັນ​ຈຳ​ນວນຫຼາຍ ທັງ​ຍັງ​ເຮັດ​ໃຫ້​ປະ​ຊາ​ຊົນ​ຢູ່​ໃນ​ເຂດ​ດັ່ງ​ກ່າວບໍ່​ສາ​ມາດ​ຊົມ​ໃຊ້​ນ້ຳ​ໄດ້​ເລີຍ ຈົນ​ກວ່າ​ວ່າ​ຈະ​ໄດ້​ທຳ​ການ​ກຳ​ຈັດ​ສານ​ເຄ​ມີ ແລະ ຟື້ນ​ຟູ​ໃຫ້​ກັບ​ຄືນ​ສູ່​ສະ​ພາບ​ເດີມ​ເສຍ​ກ່ອນ.

ໂດຍ​ອີງ​ຕາມ​ລາຍ​ງານ​ຂອງ​ກຸ່ມ​ບໍ​ລິ​ສັດ Sino-Hydro ລະ​ບຸ​ວ່າ​ສານ​ເຄ​ມີ​ດັ່ງ​ກ່າວ​ໄດ້​ຮົ່ວ​ໄຫຼ​ລົງ​ຫ້ວຍ ຫີນ​ຊາ ແລະ ນ້ຳ​ລີກ ປະ​ມານ 100 ລິດ ຈຶ່ງ​ຄາດ​ວ່າ​ຈ​ະ​ຕ້ອງ​ໃຊ້​ເວ​ລາ​ 1 ສັບ​ປະ​ດາ​ໃນ​ການ​ກຳ​ຈັດ​ສານ​ເຄ​ມີ ແລະ ຟື້ນ​ຟູ​ສະ​ພາ​ບແວດ​ລ້ອມ​ໃຫ້​ກັບ​ຄືນ​ສູ່​ສະ​ພາບ​ເດີມ ໂດຍ​ບໍ​ລິ​ສັດ ຈີນ ຈະ​ຮັບ​ຜິດ​ຊອບ​ຄ່າ​ໃຊ້​ຈ່າຍ​ທັງ​ໝົດ ລວມ​ທັງ​ຈະ​ຕ້ອງ​ຟື້ນ​ຟູ​ເຂດ​ວັງ​ສະ​ຫງວນ 3 ແຫ່ງ​ທີ່​ບ້ານ​ ໂພນ​ແບ່ງ, ບ້ານ ວຽງ​ຄຳ ແລະ ບ້ານ ວຽງ​ແກ້ວ ໃຫ້​ກັບ​ຄືນ​ສູ່​ສະ​ພາບ​ເດີມ​ໃຫ້​ໄວ​ທີ່​ສຸດ​ອີກ​ດ້ວຍ ດັ່ງ​ເຈົ້າ​ໜ້າ​ທີ່​ເມືອງ​ກາ​ສີ ຢືນ​ຢັນ​ວ່າ

"ບໍ​ລິ​ສັດ​ເຂົາ​ເຈົ້າ​ລະ​ຂໍ​ສະ​ເໜີ​ຟື້ນ​ຟູ​ອັນ​ນີ້ 70 ລ້ານ​ກີບໃຫ້​ແລ້ວ​ໝົດ ແລະ ການ​ຈັດ​ຕັ້ງ​ຂັ້ນ​ເມືອງ​ຂອງ​ພວກ​ເຮົາ​ກໍ​ບໍ່​ໄດ້​ວ່າ​ສິ​ຮັບ​ເອົ​ຊ່ຳ​ນັ້ນ ມີ​ແຕ່​ວ່າ ເອີ​ອັນ​ນີ້​ເປັນ​ການ​ສະ​ເໜີ​ຂອງ​ບໍ​ລິ​ສັດ ແຕ່​ພວກ​ເຮົາ​ສິ​ເຮັດ​ບົດ​ລາຍ​ງານ​ຫາ​ການ​ນຳ​ຂອງ​ແຂວງ ໃຫ້​ແຂວງ​ເພິ່ນ​ຊີ້​ນຳ​ຕື່ມ ແລະ ທາງ​ຄະ​ນະ​ຄຸ້ມ​ຄອງ​ແລ້ວ​ກະ​ທາງ​ບໍ​ລິ​ສັດ​ໃຫຍ່​ໂຄງ​ການ​ທາງ​ລົດ​ໄຟ ລາວ-ຈີນ ເພິ່ນ​ຮັບ​ປາກວ່າ​ຜົນ​ເສຍ​ຫາຍ​ຕ່າງ​ໆ ເພິ່ນ​ສິ​ຮັບ​ຜິດ​ຊອບ​ຢຽວ​ຢາ​ທັງ​ໝົດ."

ກ່ອນ​ໜ້າ​ນີ້ ໂຄງ​ການ​ກໍ່​ສ້າງ​ທາງ​ລົດ​ໄຟ ລາວ-ຈີນ ກໍ​ໄດ້​ປະ​ສົບ​ບັນ​ຫາ​ທີ່​ຄ້າຍ​ຄື​ກັນ​ນີ້​ຢູ່​ທີ່​ແຂວງ ຫຼວງ​ນ້ຳ​ທາ ຊຶ່ງ​ເຮັດ​ໃຫ້​ການ​ກໍ່​ສ້າງ​ເກີດ​ການ​ຊັກ​ຊ້າ​ເປັນ​ເວ​ລາ​ເຖິງ 5 ເດືອນ ເພາະ​ການ​ກໍ່​ສ້າງ​ອຸ​ໂມງ​ຢູ່​ທີ່​ຊາຍ​ແດນ​ຕິດ​ຕໍ່​ລະ​ຫວ່າງ ລາວ ກັບ ຈີນ ນັ້ນ​ໄດ້​ເຈາະ​ພົບ​ແຫຼ່ງ​ແຮ່​ເກືອ​ຂະ​ໜາດ​ໃຫຍ່ ເຮັດ​ໃຫ້​ບໍ​ລິ​ສັດ​ຮັບ​ເໝົາ​ກໍ່​ສ້າງ​ຈາກ ຈີນ ຕ້ອງ​ທຳ​ການ​ສຶກ​ສາ​ວິ​ໄຈ​ເພື່ອ​ຄົ້ນ​ຫາ​ວິ​ທີ​ການ​ນຳ​ໃຊ້​ວັດ​ສະ​ດຸ​ແບບ​ພິ​ເສດ​ທີ່​ທົນ​ຕໍ່​ນ້ຳ​ເກືອ ລວມ​ເຖິງວິ​ທີ​ການ​ປ້ອງ​ກັນ​ບໍ່​ໃຫ້​ນ້ຳ​ເກືອ​ໄຫຼ​ລົງ​ສູ່​ທີ່​ນາ ແລະ ແຫຼ່ງ​ນ້ຳ​ທຳ​ມະ​ຊາດ​ອີກ​ດ້ວຍ ເນື່ອງ​ຈາກວ່າ​ນ້ຳ​ເກືອ​ໄດ້​ໄຫຼ​ລົງ​ສູ່​ນ້ຳ​ທຸງ ເຮັດ​ໃຫ້​ປະ​ຊາ​ຊົນ​ໃນ​ເຂດ​ເມືອງຫຼວງ​ນ້ຳ​ທາ ຕ້ອງ​ຂາດ​ແຄນ​ນ້ຳ​ປະ​ປາ ແລະ ນຳ​ໃຊ້​ນ້ຳ​ຈາກ​ແຫຼ່ງ​ທຳ​ມະ​ຊາດບໍ່​ໄດ້​ເລີຍ​ໃນ​ຊ່ວງ​ເດືອນ​ຕຸ​ລາ ຫາ ທັນ​ວາ 2019 ທີ່​ຜ່ານ​ມາ.

ນອກ​ຈາກ​ນັ້ນ​ປະ​ຊາ​ຊົນ ລາວ ຍັງ​ຕ້ອງ​ປະ​ເຊີນ​ກັບ​ບັນ​ຫາ​ສຸ​ຂະ​ພາບ ແລະ ສິ່ງ​ແວດ​ລ້ອມ​ເປັນ​ພິດ​ທີ່​ເກີດ​ຈາກ​ສານ​ເຄ​ມີ​ຕ່າງໆ​ທີ່​ນຳ​ໃຊ້​ໃນ​ການ​ປູກ​ກ້ວຍ​ຫອມ​ຢູ່​ໃນ ລາວ ເພື່ອ​ສົ່ງ​ອອກ​ໄປ ຈີນ ອີກ​ດ້ວຍ ທັງ​ນີ້​ອົງ​ການ Plan International ອົງ​ການ​ບໍ່​ຂຶ້ນ​ກັບ​ລັດ​ຖະ​ບານໃນ ລາວ ລາຍ​ງານ​ວ່າ ການ​ປູກ​ກ້ວຍ​ໃນ ລາວ ຊຶ່ງ​ສ່ວນ​ໃຫຍ່​ເປັນ​ການ​ສຳ​ປະ​ທານ​ທີ່​ດິນ ແລະ ລົງ​ທຶນ​ໂດຍ​ບັນ​ດາ​ນັກ​ທຸ​ລະ​ກິດ ຈີນ ນັ້ນ​ໄດ້​ເຮັດ​ໃຫ້ ລາວ ກາຍ​ເປັນ​ແຫຼ່ງ​ຜະ​ລິດ​ກ້ວຍ​ທີ່​ສຳ​ຄັນ​ເພື່ອ​ຕອບ​ສະ​ໜອງ​ຄວາມ​ຕ້ອງ​ການ​ໃນ ຈີນ ເພີ່ມ​ຂຶ້ນ​ນັບ​ມື້ ຊຶ່ງ​ເຫັນ​ໄດ້​ຈາກ​ການ​ທີ່ ລາວ ສົ່ງ​ກ້ວຍ​ຫອມ​ໄປ ຈີນ ເພີ່ມ​ຂຶ້ນ​ຈາກ 122 ລ້ານ​ໂດ​ລາ​ໃນ​ປີ 2017 ເປັນ 210 ລ້ານ​ໂດ​ລາ​ໃນ​ປີ 2019 ທີ່​ຜ່ານ​ມາ.

ເຖິງ​ແມ່ນ​ວ່າ​ແຮງ​ງານ ລາວ ໃນ​ເຂດ​ສຳ​ປະ​ທານ​ປູກ​ກ້ວຍ​ຂອງ ຈີນ ຈະ​ໄດ້​ຄ່າ​ຈ້າງ 10-18 ໂດ​ລາ​ຕໍ່​ວັນ​ກໍ​ຖື​ວ່າ​ສູງກວ່າ​ແຮງ​ງານ​ທົ່ວ​ໄປ​ກໍ​ຕາມ ຫາ​ກ​ແຕ່​ແຮງ​ງານ ລາວ ໃນ​ສວນ​ກ້ວຍ​ຂອງ ຈີນ ເຫຼົ່າ​ນີ້​ກໍ​ມີ​ຄວາມ​ສ່ຽງ​ສູງ​ທີ່​ສຸດ​ທີ່​ຈະ​ເຈັບ​ປ່ວຍ​ຈາກ​ການ​ໄດ້​ຮັບ​ສານ​ເຄ​ມີຫຼາ​ຍກວ່າ 100 ຊະ​ນິດ​ທີ່​ນຳ​ໃຊ້​ໃນ​ການ​ປູກ ແລະ ເລັ່ງ​ຜົນ​ຜ​ະ​ລິດ​ກ້ວຍ​ຫອມ ໂດຍ​ສະ​ເພາະ​ໃນ​ແຂວງບໍ່​ແກ້ວ, ອຸ​ດົມ​ໄຊ ແລະ ຫຼວງ​ນ້ຳ​ທາ ນັ້ນ​ຖື​ເປັນ​ພື້ນ​ທີ່ໆ​ໄດ້​ຮັບ​ຜົນ​ກະ​ທົບ​ຢ່າງ​ໜັກ​ໜ່ວງ​ທີ່​ສຸດ ເພາະ​ວ່າບັນ​ດາ​ນັກ​ທຸ​ລະ​ກິດ ຈີນ ໄດ້​ພາ​ກັນ​ລັກ​ລອບ​ນຳ​ເຂົ້າ ແລະ ນຳ​ໃຊ້​ສານ​ເຄ​ມີ​ປ້ອ​ງ​ກັນ​ໂຣກ​ພືດກວ່າ 30 ຊະ​ນິດ, ຢາ​ປາບ​ສັດ​ຕູ​ພືດກວ່າ 20 ຊະ​ນິດ ທັງ​ຍັງ​ນຳ​ໃຊ້​ສານ​ເຄ​ມີ​ເພື່ອ​ເລັ່ງ​ຜົນ​ຜະ​ລິດ​ອີກຫຼາຍກວ່າ 50 ຊະ​ນິດ​ນັ້ນ​ກໍ​ໄດ້​ຄຸກ​ຄ​າມ​ຕໍ່​ສຸ​ຂະ​ພາບ​ອະ​ນາ​ໄມ​ຂອ​ງ​ປະ​ຊາ​ຊົນ ລາວ ແລະ ກະ​ທົບ​ຕໍ່​ສິ່ງ​ແວດ​ລ້ອມ​ທຳ​ມະ​ຊາດ​ຢ່າງກວ້າງ​ຂວາງ​ນັ້ນ​ເອງ.

ເບິ່ງຄວາມເຫັນ (1)

ຟໍຣັມສະແດງຄວາມເຫັນ ກ່ຽວກັບເລື່ອງນີ້ ອັດແລ້ວ

ທ່ານອາດຈະມັກເລື້ອງນີ້ຄືກັນ

XS
SM
MD
LG