ອະດີດນັກບິນອະວະກາດ Sally Ride ຊຶ່ງເປັນຜູ້ຍິງອາເມຣິກັນ ຄົນທໍາອິດ ທີ່ຂຶ້ນບິນຢູ່ໃນອະວະກາດ ໄດ້ເຖິງແກ່ກໍາແລ້ວ ໃນວັນຈັນວານນີ້ ຫລັງຈາກໄດ້ຕໍ່ສູ້ມາເປັນເວລານານ ກັບພະຍາດມະເຮັງມ້າມ. ທ່ານນາງມີອາຍຸໄດ້ 61 ປີ.
ທ່ານນາງ Ride ທີ່ໄດ້ຮັບ 4 ປະລິນຍາ ຮວມທັງປະລິນຍາເອກຂະແໜງຟິຊິກສ໌ ຈາກມະຫາວິທະຍາໄລ Stanford ແມ່ນເປັນພາກສ່ວນນຶ່ງຂອງຫ້ອງຮຽນຂອງອົງການ NASA ຊຸດທໍາອິດທີ່ຮັບເອົານັກບິນອະວະກາດຜູ້ຍິງ ໃນປີ 1978.
ທ່ານນາງ ໄດ້ຂຶ້ນບິນໃນຍານອະວະກາດໄປກັບ Challenger ຮ່ວມກັບນັກບິນອະວະກາດ ຜູ້ຊາຍ 4 ຄົນ ໃນເດືອນມິຖຸນາ ປີ 1983 ແລະໄດ້ກາຍມາເປັນ ວີລະສະຕີ ສໍາລັບພວກເດັກນ້ອຍຜູ້ຍິງ ໃນທົ່ວສະຫະລັດ ໃນຖານະທີ່ເປັນນັກບິນອະວະກາດອາເມຣິກັນຜູ້ຍິງຄົນທໍາອິດ ທີ່ບິນໂຄຈອນຢູ່ໃນຫ້ວງອະວະກາດ.
ທ່ານນາງ Ride ໄດ້ຂຶ້ນບິນໃນຍານອະວະກາດ Challenger ອີກຄັ້ງນຶ່ງໃນ ປີ 1984 ແລະໄດ້ເປັນສະມາຊິກຄະນະກໍາມະການສືບສວນ ອຸປະຕິເຫດຍານ Challenger ລະເບີດຂຶ້ນ ຂະນະທີ່ເຂົ້າມາສູ່ເຂດອາກາດຂອງໂລກ ໃນປີ 1986 ແລະຄວາມພິນາດຂອງຍານອະວະກາດໄປກັບ Columbia ໃນປີ 2003.
ທ່່ານນາງຍັງເປັນຜູ້ກໍ່ຕັ້ງບໍລິສັດ ທີ່ມີເປົ້າໝາຍເພື່ອຊັກຊວນໃຫ້ບັນດາໜຸ່ມນ້ອຍ ຜູ້ຍິງ ພາກັນຫັນມາສົນໃຈ ວິຊາອາຊີບ ດ້ານວິທະຍາສາດ ຄະນິດສາດ ແລະ ເທັກໂນໂລຈີ.
ປະທານາທິບໍດີ Barak Obama ໄດ້ອອກຖະແຫລງການ ສະດຸດີທ່ານນາງ Sally Ride ວ່າ “ເປັນວີລະສະຕີຂອງປະເທດ ແລະເປັນແບບຢ່າງບົດບາດ ອັນເຂັ້ມແຂງ” ຜູ້ທີ່ໄດ້ສົ່ງເສີມການເນັ້ນໜັກຫລາຍຂຶ້ນ ໃສ່ວິຊາເລກຫລື ຄະນິດສາດ ແລະວິທະຍາສາດ ຢູ່ໃນໂຮງຮຽນ ຂອງສະຫະລັດ ອາເມຣິກາ.